நாடு முழுவதும் டெங்கு காய்ச்சல் வேகமாக பரவி வருவதையடுத்து, கம்பஹா, கொழும்பு, மாத்தறை, களுத்துறை, கண்டி, இரத்தினபுரி மற்றும் காலி ஆகிய 7 மாவட்டங்களும், 175 சுகாதார மருத்துவ அதிகாரி (MOH) பிரிவுகளும் தொடர்ந்து டெங்கு உயர் அபாயப் பகுதிகளாக அடையாளம் காணப்பட்டுள்ளதாக தேசிய டெங்கு கட்டுப்பாட்டு பிரிவு அறிவித்துள்ளது.
அதிகாரப்பூர்வ புள்ளிவிபரங்களின்படி, இந்த ஆண்டில் இதுவரை நாடு முழுவதும் 68,672 டெங்கு நோயாளிகள் பதிவாகியுள்ளதுடன், 47 உயிரிழப்புகளும் ஏற்பட்டுள்ளன.
மேலும், ஜூலை மாதத்தின் முதல் 12 நாட்களிலேயே 13,293 புதிய டெங்கு நோயாளிகள் பதிவாகியிருப்பது கவலைக்கிடமான நிலையை வெளிப்படுத்துகிறது.
தற்போது நிலவும் மழையுடன் கூடிய காலநிலை காரணமாக, எதிர்வரும் நாட்களில் டெங்கு பரவல் மேலும் அதிகரிக்கும் அபாயம் இருப்பதாக தேசிய டெங்கு கட்டுப்பாட்டு பிரிவு எச்சரித்துள்ளது.
எனவே, மக்கள் தாங்கள் வசிக்கும் பகுதிகளில் கொசுக்கள் பெருகும் இடங்களை உடனடியாக அகற்றி, டெங்கு ஒழிப்பு நடவடிக்கைகளுக்கு சுகாதார அதிகாரிகளுக்கு முழுமையான ஒத்துழைப்பை வழங்குமாறு தேசிய டெங்கு கட்டுப்பாட்டு பிரிவு பொதுமக்களிடம் வலியுறுத்தியுள்ளது.
