– அமைச்சர் ஆனந்த விஜேபால
சமூக ஊடகங்கள் ஊடாக வெறுப்புப் பேச்சுகளை வெளியிடும் நபர்கள் தொடர்பில் கணினி குற்றப் புலனாய்வுப் பிரிவுகள் ஊடாக விசாரணைகள் முன்னெடுக்கப்பட்டு வருவதாக பொதுமக்கள் பாதுகாப்பு மற்றும் நாடாளுமன்ற விவகார அமைச்சர் ஆனந்த விஜேபால தெரிவித்துள்ளார்.
இவ்வாறான சம்பவங்களில் சில தொடர்பில் விசேட கவனம் செலுத்தப்பட்டு, நீதிமன்றங்களில் விடயங்கள் அறிக்கையிடப்பட்டுள்ளதாகவும் அவர் குறிப்பிட்டுள்ளார்.
நாடாளுமன்றத்தில் உரையாற்றிய அமைச்சர் ஆனந்த விஜேபால மேலும் தெரிவிக்கையில்,
“சமூக ஊடகங்களில் போலிக் கணக்குகள் ஊடாக முஸ்லிம்கள் மட்டுமன்றி, பல்வேறு இனங்களைச் சேர்ந்த மக்களுக்கு எதிராகவும் வெறுப்புப் பேச்சுகள் வெளியிடப்படுவது அவதானிக்கப்பட்டுள்ளது.
முஸ்லிம்களை இலக்காகக் கொண்டு ஒழுங்கமைக்கப்பட்ட குழுவொன்று செயற்படுவதாக இதுவரை தகவல்கள் எதுவும் வெளியாகவில்லை.
எனினும், உள்நாட்டிலும் வெளிநாட்டிலும் போலிக் கணக்குகளை உருவாக்கி, அனைத்து இனங்களையும் சேர்ந்த நபர்கள் இவ்வாறான வெறுப்புப் பேச்சுகளை வெளியிட்டு வருகின்றனர்.
இது தொடர்பில் கணினி குற்றப் புலனாய்வுப் பிரிவுகள் ஊடாக விசாரணைகள் முன்னெடுக்கப்படுகின்றன. அத்துடன், சில சம்பவங்கள் தொடர்பில் விசேட கவனம் செலுத்தப்பட்டு, நீதிமன்றங்களில் விடயங்கள் அறிக்கையிடப்பட்டுள்ளன” எனத் தெரிவித்துள்ளார்.
