– பொலிஸார் எச்சரிக்கை
சமூக ஊடகங்கள் ஊடாகப் பொய்யான மற்றும் உறுதிப்படுத்தப்படாத தகவல்களைப் பரப்பி, பொதுமக்களைத் தவறாக வழிநடத்துவதுடன் சமூக அமைதியின்மையை ஏற்படுத்துவோருக்கு எதிராகக் கடுமையான சட்ட நடவடிக்கை எடுக்கப்படும் என இலங்கை பொலிஸார் எச்சரித்துள்ளனர்.
சிலர் சமூக ஊடகங்களைத் தவறாகப் பயன்படுத்தி, பொதுமக்களிடையே குழப்பம், அச்சம் மற்றும் தவறான தகவல்களைத் தொடர்ச்சியாகப் பரப்பி வருவது அவதானிக்கப்பட்டுள்ளதாக பொலிஸ் ஊடகப் பேச்சாளரும் உதவிப் பொலிஸ் அத்தியட்சகருமான எஃப். யூ. வூட்லர் தெரிவித்துள்ளார்.
இவ்வாறான நடவடிக்கையில் ஈடுபட்டு, Facebook ஊடாகப் பொதுமக்களைத் தவறாக வழிநடத்தும் வகையிலான சீர்குலைக்கும் பொய்த் தகவல்களைப் பதிவிட்ட சந்தேகநபர் ஒருவர் அண்மையில் நிக்கவரெட்டிய பொலிஸ் பிரிவில் கைது செய்யப்பட்டுள்ளதாகவும் அவர் குறிப்பிட்டுள்ளார்.
கைது செய்யப்பட்ட சந்தேகநபரை நிக்கவரெட்டிய நீதவான் நீதிமன்றத்தில் ஆஜர்படுத்தி, அடுத்தகட்ட சட்ட நடவடிக்கைகளை முன்னெடுக்க விரைவான நடவடிக்கைகள் எடுக்கப்பட்டுள்ளன.
எனவே, உறுதிப்படுத்தப்படாத மற்றும் பொய்யான தகவல்களைச் சமூக ஊடகங்களில் பகிர்வதைத் தவிர்க்குமாறும், இவ்வாறான பிரசாரங்களை நம்பி ஏமாற வேண்டாம் என்றும் பொலிஸ் ஊடகப் பேச்சாளர் பொதுமக்களிடம் கோரிக்கை விடுத்துள்ளார்.
மேலும், கணினிக் குற்றச் சட்டம் மற்றும் தண்டனைச் சட்டக்கோவை ஆகியவற்றின் கீழ் இத்தகைய குற்றங்களில் ஈடுபடுவோருக்கு எதிராக அதிகபட்ச சட்ட நடவடிக்கைகள் எடுக்கப்படும் என்றும் அவர் வலியுறுத்தியுள்ளார்.
