மட்டக்களப்பு மாவட்டத்தில் மகாவலி காணிகளைச் சிங்கள விவசாயிகளுக்கு பகிர்ந்தளிப்பதற்கு எதிராக 2021ஆம் ஆண்டு தாம் மேன்முறையீட்டு நீதிமன்றத்தை நாடியதாகத் தமிழ்த் தேசியக் கூட்டமைப்பின் நாடாளுமன்ற உறுப்பினர் சாணக்கியன் இராசமாணிக்கம் தெரிவித்துள்ளார்.
தமிழ் கால்நடை வளர்ப்பாளர்கள் தமது மாடுகளுக்கு மேய்ச்சல் வழங்குவதற்காக சுமார் 100 ஆண்டுகளாகப் பயன்படுத்தி வந்த காணிகள், அப்போதைய ஜனாதிபதி கோட்டாபய ராஜபக்ஷ மற்றும் கிழக்கு மாகாண ஆளுநர் அனுராதா யஹம்பத்தின் தேவைக்கேற்ப, சட்டவிரோதமாகச் சிங்கள விவசாயிகளுக்கு விவசாய நடவடிக்கைகளுக்காக வழங்கப்பட்டதாக அவர் குற்றஞ்சாட்டியுள்ளார்.
மேலும், குறித்த மேய்ச்சல் நிலங்களைக் கைப்பற்றி விவசாயம் செய்பவர்கள் திவுலபத்தான கிராமத்தில் வசிக்கும் சிங்கள மக்கள் அல்லர் என்றும், வெளிப்பகுதிகளில் இருந்து வந்து இனவாத முரண்பாட்டை உருவாக்க முயற்சிக்கும் குழுவினரே அவர்கள் என்றும் சாணக்கியன் தெரிவித்துள்ளார்.
திவுலபத்தான கிராம மக்கள் தமக்கு ஆதரவாக இருப்பதாகவும் அவர் மேலும் குறிப்பிட்டுள்ளார்.
