அரச சேவைகளைப் பெற்றுக்கொள்ளும்போது எந்தவொரு அரச அதிகாரிக்கும் இலஞ்சம் வழங்க வேண்டாம் என விவசாயத்துறை அமைச்சர் கே.டி. லால் காந்த பொதுமக்களிடம் கோரிக்கை விடுத்துள்ளார்.
அத்துடன், எந்தவொரு அரசியல்வாதிக்கும் பணம் அல்லது பரிசுப் பொருட்களை வழங்க வேண்டாம் என்றும் அவர் கேட்டுக்கொண்டுள்ளார். பொதுமக்கள் சந்திப்பொன்றில் உரையாற்றும்போதே அவர் இதனைத் தெரிவித்துள்ளார்.
இது தொடர்பில் அவர் மேலும் தெரிவித்ததாவது:
அரச அதிகாரிகளுக்கான சம்பளத்தை அரசாங்கமே வழங்குகின்றது. அந்தச் சம்பளம் போதுமானதாக இல்லாவிட்டால், அரசாங்கம் சம்பளத்தை அதிகரிக்கும். கடந்த கால அரசாங்கங்களும் சம்பளத்தை அதிகரித்துள்ளன. தற்போதைய அரசாங்கமும் சம்பளத்தை அதிகரித்து வருகின்றது. எதிர்காலத்தில் ஆட்சிக்கு வரும் அரசாங்கங்களும் சம்பளத்தை அதிகரிக்கும்.
எனவே, அரச சேவைகளைப் பெற்றுக்கொள்வதற்காக அரச அதிகாரிகளுக்குப் பணம் வழங்க வேண்டிய அவசியமில்லை.
எனினும், சில சந்தர்ப்பங்களில் அரச சேவைகள் முறையாக வழங்கப்படாமை அல்லது வேண்டுமென்றே தாமதப்படுத்தப்படுதல் போன்ற நிலைமைகள் காணப்படுகின்றன என்பதை நாம் அறிவோம். அரசியல்வாதிகள் மத்தியில் இத்தகைய செயற்பாடுகள் இல்லாவிட்டாலும், சில அரச அதிகாரிகளிடம் இவ்வாறான நடைமுறைகளைக் காண முடிகின்றது. காலப்போக்கில் இந்த நிலைமை படிப்படியாகச் சீரடையும்.
இத்தகைய செயற்பாடுகளில் ஈடுபடுபவர்களில் ஒருவர் அல்லது இருவரைக் கைது செய்து, இலஞ்சம் அல்லது ஊழல் குற்றச்சாட்டுகளின் கீழ் விசாரணைகளை முன்னெடுப்பதன் மூலம் இந்தப் பிரச்சினையைக் கட்டுப்படுத்த முடியும்.
இன்னும் இரண்டு அல்லது மூன்று ஆண்டுகளுக்குள் இந்தப் பிரச்சினைக்கு முழுமையான தீர்வைப் பெற்றுக்கொள்ள முடியும் என்றும் அமைச்சர் கே.டி. லால் காந்த மேலும் தெரிவித்துள்ளார்.
