சர்ச்சைக்குரிய 323 கொள்கலன்கள் துறைமுகத்திலிருந்து வெளியேற்றப்பட்ட சம்பவம் தொடர்பில் விசாரணை நடத்தும் நாடாளுமன்றத் தெரிவுக்குழுவின் அறிக்கையை அடுத்த வாரத்திற்குள் வெளியிட நடவடிக்கை எடுக்கப்படும் என நீதி மற்றும் தேசிய ஒருமைப்பாட்டு அமைச்சர் ஹர்ஷன நாணயக்கார தெரிவித்துள்ளார்.
குறித்த அறிக்கையைத் தயாரிக்கும் பணிகள் தற்போது இறுதிக்கட்டத்தில் இருப்பதாகவும் அவர் குறிப்பிட்டுள்ளார்.
323 கொள்கலன்கள் துறைமுகத்திலிருந்து வெளியேற்றப்பட்ட சம்பவம் தொடர்பான விசாரணைக் குழுவின் அறிக்கை காணாமல் போயுள்ளதாகச் சமூக ஊடகங்களில் பரப்பப்படும் தகவல்கள் முற்றிலும் பொய்யானவை என்றும் அமைச்சர் தெரிவித்துள்ளார்.
இது தொடர்பில் அவர் மேலும் தெரிவிக்கையில்:
“இன்று பேஸ்புக் உள்ளிட்ட சமூக ஊடகங்களில் ஒரு பொய்யான தகவல் பரப்பப்படுவதை நான் கண்டேன். அதாவது, 323 கொள்கலன்கள் தொடர்பாக நியமிக்கப்பட்ட குழுவின் அறிக்கை காணாமல் போயுள்ளதாகத் தெரிவிக்கப்படுகிறது. இது முற்றிலும் பொய்யான தகவலாகும்.
இவ்வாறான தவறான கருத்துகள் ஏன் சமூகத்தில் பரப்பப்படுகின்றன என்பது எனக்குத் தெரியவில்லை. இந்தக் குழுவைக் கொண்ட சபாநாயகரே நியமித்தார் என்பது உங்களுக்குத் தெரியும்.
அந்தக் குழு 16 சாட்சிகளிடம் சாட்சியங்களைப் பதிவு செய்துள்ளது. அவை தொடர்பான அனைத்து ஆவணங்களும் நாடாளுமன்றத்தில் உள்ளன. அவை அனைத்தும் பதிவுசெய்யப்பட்டுள்ளன” என அமைச்சர் ஹர்ஷன நாணயக்கார தெரிவித்துள்ளார்.
