கிறிஷ் (Krrish) கொடுக்கல் வாங்கல் வழக்கில் பாராளுமன்ற உறுப்பினர் நாமல் ராஜபக்ஷவுக்கு கொழும்பு பிரதம நீதவான் நீதிமன்றம் இன்று (03) பிணை வழங்கி உத்தரவிட்டுள்ளது.
எனினும், அவருக்கு எதிராக நிலுவையில் உள்ள ஏனைய வழக்குகளில் பிணை கிடைக்காத காரணத்தினால், அவர் தொடர்ந்தும் விளக்கமறியலில் வைக்கப்படவுள்ளார்.
கொழும்பு பிரதம நீதவான் அசங்க போதரகம முன்னிலையில் இன்று குறித்த வழக்கு விசாரணைக்கு எடுத்துக்கொள்ளப்பட்டபோதே இந்த உத்தரவு பிறப்பிக்கப்பட்டுள்ளது.
நாமல் ராஜபக்ஷவை தலா 50 இலட்சம் ரூபாய் பெறுமதியான மூன்று சரீரப் பிணைகளிலும், ஒரு இலட்சம் ரூபாய் ரொக்கப் பிணையிலும் விடுவிக்க நீதிமன்றம் உத்தரவிட்டுள்ளது.
அத்துடன், அவருக்கு வெளிநாட்டுப் பயணத் தடையும் விதிக்கப்பட்டுள்ளது. மேலும், வழக்கின் சாட்சியாளர்களுக்கு எவ்வித அழுத்தங்களையும் பிரயோகிக்கக் கூடாது எனவும் நீதிமன்றம் நிபந்தனை விதித்துள்ளது.
கிறிஷ் கொடுக்கல் வாங்கல் வழக்கில் பிணை வழங்கப்பட்டுள்ள போதிலும், எயார்பஸ் (Airbus) கொடுக்கல் வாங்கல் விவகாரம் உள்ளிட்ட ஏனைய வழக்குகளில் பிணை கிடைக்காததால் நாமல் ராஜபக்ஷவின் விளக்கமறியல் தொடர்கிறது.
கிறிஷ் நிறுவனத்திடமிருந்து சுமார் 70 மில்லியன் ரூபாய் (7 கோடி ரூபாய்) பணத்தைப் பெற்றுக்கொண்டு, அதனை முறைகேடாகப் பயன்படுத்தியதாக நாமல் ராஜபக்ஷவுக்கு எதிராக இலஞ்ச ஊழல் விசாரணை ஆணைக்குழுவினால் குற்றச்சாட்டுகள் முன்வைக்கப்பட்டிருந்தன.
இதே வழக்கில் கைது செய்யப்பட்டிருந்த கிறிஷ் நிறுவனத்தின் முன்னாள் பணிப்பாளர் ஜானகி சிறிவர்தனவுக்கும் இன்று நீதிமன்றம் பிணை வழங்கியுள்ளது.
