2027ஆம் ஆண்டுக்கான வரவு செலவுத் திட்டத்தின் ஊடாக இலங்கையின் மூலதனச் சந்தையை மேம்படுத்துவதற்கு அதிக கவனம் செலுத்த அரசாங்கம் திட்டமிட்டுள்ளது. இதற்கமைய, மூலதனச் செலவினங்களுக்காக 2 டிரில்லியன் ரூபா ஒதுக்கப்படவுள்ளதாகத் தகவல்கள் தெரிவிக்கின்றன.
பொருளாதார ஸ்திரத்தன்மையை உறுதிப்படுத்திய பின்னர், நாட்டைப் பொருளாதார மாற்றத்தை நோக்கி வழிநடத்துவதே அரசாங்கத்தின் அடுத்த முக்கிய இலக்காகும் என அமைச்சர் அனில் ஜயந்த பெர்னாண்டோ தெரிவித்துள்ளார்.
இந்த இலக்கை அடைவதற்கு உள்நாட்டு மற்றும் வெளிநாட்டு முதலீடுகளை அதிகரிப்பதுடன், மூலதனச் சந்தையை வலுப்படுத்துவதும் அவசியம் என அமைச்சர் சுட்டிக்காட்டியுள்ளார்.
இலங்கை பிணையங்கள் மற்றும் பரிவர்த்தனை ஆணைக்குழு மற்றும் கொழும்பு பங்குச் சந்தை ஆகியன இணைந்து ஏற்பாடு செய்திருந்த கருத்தரங்கில் கலந்துகொண்டு உரையாற்றும்போதே அவர் இதனைத் தெரிவித்துள்ளார்.
2027ஆம் ஆண்டுக்கான வரவு செலவுத் திட்ட முன்மொழிவுகள் எதிர்வரும் 12ஆம் திகதி நாடாளுமன்றத்தில் சமர்ப்பிக்கப்படவுள்ளன. இந்த வரவு செலவுத் திட்டத்தின் ஊடாக மூலதனச் சந்தை மேம்பாடு தொடர்பான அரசாங்கத்தின் கொள்கைகள் மற்றும் திட்டங்கள் மேலும் தெளிவாக வெளிப்படும் எனவும் அமைச்சர் குறிப்பிட்டுள்ளார்.
இதற்கிடையில், இலங்கை பிணையங்கள் மற்றும் பரிவர்த்தனை ஆணைக்குழுவினால் முன்வைக்கப்பட்ட மூலதனச் சந்தை மேம்பாடு தொடர்பான 12 முன்மொழிவுகளில் பெரும்பாலானவை குறித்து நிதி அமைச்சுடன் கலந்துரையாடி இணக்கப்பாடு எட்டப்பட்டுள்ளது.
அந்த முன்மொழிவுகளில் சிலவற்றை 2027ஆம் ஆண்டுக்கான வரவு செலவுத் திட்டத்தில் உள்ளடக்க எதிர்பார்ப்பதாகவும் அமைச்சர் மேலும் தெரிவித்துள்ளார்.
