ஜனாதிபதித் தேர்தலில் டலஸ் அழகப்பெருமவுக்கு ஆதரவளிக்க தீர்மானித்துள்ளதாக ஜனநாயக இடதுசாரி முன்னணியின் தலைவர் வாசுதேவ நாணயக்கார தெரிவித்தார்.

மக்களுக்கு விரைவான நிவாரணம் வழங்குவதுடன் மக்களின் பாதுகாப்பையும் உறுதிப்படுத்தும் வகையில் பாரம்பரிய பிளவுகள் இன்றி அனைத்துக் கட்சிகளின் ஒருமித்த வேலைத்திட்டத்தை தயாரிக்கும் சக்தி வாய்ந்த பாராளுமன்ற பிரதிநிதியாக டலஸ் அழகப்பெரும திகழ்வதாக அவர் குறிப்பிட்டுள்ளார்.

உயர்தர தனியார் வகுப்புகளில் கலந்து கொண்ட நான்கு மாணவிகளை நிர்வாண புகைப்படம் எடுத்த சம்பவம் தொடர்பில், தனியார் வகுப்புகளை நடத்தும் பாடசாலை ஆசிரியர் ஒருவர் கைது செய்யப்பட்டுள்ளதாக பொலிஸார் தெரிவித்துள்ளனர்.

சந்தேகத்திற்குரிய ஆசிரியர் ரம்பொடகல்ல மற்றும் மாவத்தகம பிரதேசங்களில் தனியார் வகுப்புகளை நடத்தி வருவதாகவும் சந்தேக நபர் பாடசாலை ஆசிரியர் எனவும் பொலிஸார் மேலும் தெரிவித்தனர்.

நான்கு மாணவிகளையும் காரில் ஏற்றிச் சென்று காரை நிறுத்திவிட்டு மேலும் கற்றுக்கொடுக்கப் போவதாகக் கூறி பின்வரும் புகைப்படங்களை எடுத்ததாக நான்கு மாணவிகளும் பொலிஸாரிடம் தெரிவித்தனர்.

சந்தேகத்தின் பேரில் அந்த நபரின் செல்போனை சோதனையிட்டபோது, ​​அதில் நான்கு மாணவிகளின் நிர்வாண புகைப்படங்கள் பதிவாகியிருந்ததாகவும் பொலீசார் தெரிவித்தனர்.

ஜனாதிபதி தேர்தலுக்கான வாக்கெடுப்பின்போது தமிழ்க் கட்சிகள் நடுநிலை வகிக்க வேண்டும் என நாடாளுமன்ற உறுப்பினர் சிவி விக்கேஸ்வரன் கோரிக்கை விடுத்துள்ளார்.

இன்றைய நாடாளுமன்ற அமர்வில் கலந்துகொண்ட பின்னர் ஊடகங்களிடம் கருத்து வெளியிடுகையிலேயே அவர் இவ்வாறு கோரிக்கை விடுத்தார்.

தமிழ் தேசியக் கூட்டமைப்பு உள்ளிட்ட 11 கட்சிகள் இவ்வாறு நடுநிலை வகிக்க வேண்டும் என அவர் குறிப்பிட்டுள்ளார். 

ஸ்ரீலங்கா பொதுஜன பெரமுனவின் நாடாளுமன்ற உறுப்பினர் டலஸ் அழகப்பெரும வைத்தியசாலையில் அனுமதிக்கப்பட்டுள்ளார்.

அவருடன் அவரது குடும்பத்தினர் பலர் மருத்துவமனையில் அனுமதிக்கப்பட்டுள்ளனர்.

அவர்களுக்கு வைரஸ் காய்ச்சல் தீவிரமடைந்ததால் மருத்துவமனையில் அனுமதிக்கப்பட்டுள்ளனர்.

டலஸ் அழகப்பெரும எதிர்வரும் 20ஆம் திகதி ஜனாதிபதியாக போட்டியிட தயாராக உள்ளார்.

முன்னாள் பாராளுமன்ற உறுப்பினர் ரஞ்சன் ராமநாயக்கவுக்கு ஜனாதிபதி மன்னிப்பு வழங்குவதற்கு தேவையான ஆவணங்களை தயார் செய்யுமாறு பதில் ஜனாதிபதி ரணில் விக்ரமசிங்க அதிகாரிகளுக்கு பணிப்புரை விடுத்துள்ளார்.

அமைச்சர்களான ஹரின் பெர்னாண்டோ மற்றும் மனுஷ நாணயக்கார ஆகியோர் பதில் ஜனாதிபதியை சந்தித்து, முன்னாள் பாராளுமன்ற உறுப்பினர் ரஞ்சன் ராமநாயக்கவிற்கு ஜனாதிபதி மன்னிப்பு வழங்குவதற்கான நடவடிக்கைகளை துரிதப்படுத்துமாறு கோரிக்கை விடுத்துள்ளதாக தகவல்கள் தெரிவிக்கின்றன.

முறையான சட்ட நடைமுறைகளை பின்பற்றி இந்த நடவடிக்கையை துரிதப்படுத்துமாறு பதில் ஜனாதிபதி நீதி அமைச்சர் விஜயதாச ராஜபக்ஷவிற்கு பணிப்புரை விடுத்துள்ளதாக தெரிவிக்கப்படுகின்றது.

மின்சாரம் மற்றும் எரிசக்தி அமைச்சினால் தேசிய எரிபொருள் அனுமதிச் சீட்டு இன்று அறிமுகப்படுத்தப்படவுள்ளது.

புதிய பாஸ் வாராந்திர எரிபொருள் ஒதுக்கீட்டிற்கு உத்தரவாதம் அளிக்கும்.

ஒவ்வொரு தேசிய அடையாள அட்டை எண்ணுக்கும் (NIC) ஒரு QR குறியீடு ஒதுக்கப்படும், வாகனத்தின் சேஸ் எண் மற்றும் விவரங்கள் சரிபார்க்கப்பட்டதும்.

தகவல் தொடர்பு மற்றும் தகவல் தொழில்நுட்ப நிறுவனத்தின் தொழில்நுட்ப ஆதரவுடன் மின்சாரம் மற்றும் எரிசக்தி அமைச்சகத்தால் தேசிய எரிபொருள் பாஸ் அறிமுகப்படுத்தப்படும்.

இலங்கை ஜனாதிபதியின் அலுவலகம் வெற்றிடமாகியுள்ளதாக பாராளுமன்ற செயலாளர் உத்தியோகபூர்வமாக சபைக்கு அறிவித்தார்.

இதன்படி, கோட்டாபய ராஜபக்ஷவின் இராஜினாமா கடிதத்தை பாராளுமன்றத்தின் செயலாளர் நாயகம் தம்மிக்க தசநாயக்க சபையில் வாசித்துவிட்டு ஜனாதிபதி பதவிக்கான வெற்றிடம் இருப்பதாக தெரிவித்தார்.

ஜூலை 19 ஆம் திகதி காலை 10 மணிக்கு சபை கூடியதும் ஜனாதிபதி பதவிக்கான வேட்புமனுக்களை தன்னிடம் சமர்ப்பிக்க வேண்டும் என செயலாளர் நாயகம் சபைக்கு அறிவித்தார்.

ஒன்றுக்கு மேற்பட்ட வேட்பாளர்கள் வேட்புமனுக்களை சமர்ப்பித்தால், ஜனாதிபதியை தெரிவு செய்வதற்கான வாக்கெடுப்பு ஜூலை 20 ஆம் திகதி பாராளுமன்றத்தில் நடத்தப்படும் என்றும் அவர் கூறினார்.

அரசியலமைப்பின் பிரகாரம் கோட்டாபய ராஜபக்சவின் இராஜினாமாவை அறிவிப்பதற்காக பாராளுமன்றத்தின் விசேட அமர்வு இன்று கூடியது

பதில் ஜனாதிபதி ரணில் விக்கிரமசிங்க தலைமையில் முதலாவது அமைச்சரவைக் கூட்டம் இடம்பெற்றுள்ளது.

அமைச்சரவை கூட்டம் நேற்று (15) பிற்பகல் இடம்பெற்றதாக தெரிவிக்கப்பட்டுள்ளது.

ரணில் விக்கிரமசிங்க நேற்று பதில் ஜனாதிபதியாக பதவிப்பிரமாணம் செய்து கொண்டதன் பின்னர் இது இடம்பெற்றது.

அத்தியாவசிய சேவைகள், எரிபொருள் மற்றும் பாதுகாப்பு தொடர்பில் மேற்கொள்ள வேண்டிய அடுத்த கட்ட நடவடிக்கைகள் குறித்து கலந்துரையாடப்பட்டதாக அமைச்சர் பிரசன்ன ரணதுங்க தெரிவித்தார்.

அரச ஊழியர்களுக்கான ஜூலை மாத சம்பளம் வழங்குவதில் சிக்கல் இல்லை என அறிவிக்கப்பட்டுள்ளது.
தற்போதைய பொருளாதார மற்றும் அரசியல் சூழ்நிலை காரணமாக அரச ஊழியர்களுக்கு ஜூலை மாதத்திற்கான சம்பளத்தை வழங்க முடியாது என தகவல்கள் வெளியாகியிருந்தன. எனினும், அவ்வாறானதொரு நிலைமை ஏற்படுவதற்கான சூழல் இல்லை என அரசாங்கத் தகவல்கள் தெரிவிக்கின்றன.

அரச ஊழியர்களுக்கு சம்பளம் வழங்குவதற்கு தேவையான பணம் பொதுவாக அந்தந்த நிறுவனங்களின் கணக்குகளில் வைப்பில் இருக்கும்.

ஏதாவது ஒரு நிறுவனத்தில் பணம் கையிருப்பில் இல்லை எனின் உரிய நிறுவனங்கள் முன்கூட்டியே தெரிவிக்க வேண்டும். ஆனால், அதுபோன்ற எந்த அறிவிப்பும் இதுவரை வெளியிடப்படவில்லை.

ஆக அரச ஊழியர்களுக்கு சம்பளம் வழங்குவதில் தற்போது எந்த பிரச்சினையும் இல்லை. எனவே, அரசு ஊழியர்களுக்கு சம்பளம் வழங்க முடியாத நிலை ஏற்படாது என நிதியமைச்சின் உயர் அதிகாரி ஒருவர் தெரிவித்துள்ளார்.

நாட்டில் தற்போது நிலவும் பொருளாதார மற்றும் அரசியல் நெருக்கடி நிலை காரணமாக அரச ஊழியர்களுக்கு இம்மாத சம்பளம் வழங்க முடியாத நிலை ஏற்பட்டுள்ளதாக அண்மையில் தெரிவிக்கப்பட்டது.

பணத்தை அச்சிடாமல், சம்பளம் வழங்குவதற்குத் தேவையான பணத்தைப் பெற முடியாது என்று அறிக்கைகள் தெரிவித்தன. பணம் அச்சிடுவதற்கு அமைச்சரவையின் அங்கிகாரம் தேவை என்றும், ஆனால் தற்போதைய அரசியல் நெருக்கடியை கருத்தில் கொண்டு அத்தகைய அனுமதியை பெற முடியுமா என்பது நிச்சயமற்றது என்றும் தெரிவிக்கப்பட்டிருந்தது