இரத்தினபுரி, கெஹலோவிதிகம வம்பத்துஹேனேவில் உள்ள லயன் அறையொன்றில் இருந்து குழந்தையின் சடலமும், தாயின் சடலமும் கண்டெடுக்கப்பட்டுள்ளதாக அலபத்த பொலிஸார் தெரிவிக்கின்றனர்.

இரண்டு வயது குழந்தை உயிரிழந்ததையடுத்து, குழந்தையின் 21 வயதுடைய தாயும் தற்கொலை செய்து கொண்டுள்ளதாக அலபாத பொலிஸார் சந்தேகம் வெளியிட்டுள்ளனர்.

குழந்தையை கொன்றுவிட்டு தாய் தற்கொலை செய்து கொண்டிருக்கலாம் என பொலீசார் சந்தேகிக்கின்றனர்

சிவ நாதன் என்ற வசந்தகுமாரியின் கணவர் கடந்த ஐந்து நாட்களுக்கு முன்னர் வீட்டை விட்டு வெளியேறியமை நீதவான் விசாரணையில் தெரியவந்துள்ளது.

இலஞ்ச ஊழல் குற்றச்சாட்டு விசாரணை ஆணைக்குழுவின் தலைவராக டபிள்யூ.எம்.என்.பி.இத்தாவல நியமிக்கப்பட்டுள்ளார்.

ஆணைக்குழுவின் ஏனைய உறுப்பினர்களாக சேத்தியா குணசேகர மற்றும் கே.பெர்னாட் ராஜபக்ஷ ஆகியோர் நியமிக்கப்பட்டுள்ளனர்.

2024 ஆம் ஆண்டு ஜனவரி 1 ஆம் திகதி முதல் அமுலுக்கு வரும் வகையில் ஜனாதிபதி ரணில் விக்கிரமசிங்கவினால் இந்த நியமனங்கள் வழங்கப்பட்டுள்ளன.

தேமுதிக நிறுவனத் தலைவர் விஜயகாந்த்தின் உடல் தேமுதிக தலைமைக் கழக அலுவலகத்தில் நாளை (வெள்ளிக்கிழமை) நல்லடக்கம் செய்யப்படவுள்ளதாக தகவல் வெளியாகியுள்ளது.

தேமுதிக நிறுவனத் தலைவர் விஜயகாந்த் சிகிச்சை பலனின்றி இன்று (டிச.28) காலை காலமானார். அவருக்கு வயது (71). அவரது மறைவால் தேமுதிக கட்சித் தொண்டர்கள், திரை ரசிகர்கள் சோகத்தில் ஆழ்ந்துள்ளனர். விஜயகாந்த் இல்லத்தில் உள்ள தேமுதிக கொடி அரைக்கம்பத்தில் பறக்க விடப்பட்டுள்ளது.

அவரது மறைவு தொடர்பாக மியாட் மருத்துவமனை வெளியிட்ட அறிக்கையில், “நிமோனியா (நுரையீரல் அழற்சி) காரணமாக அனுமதிக்கப்பட்டு வெண்டிலேட்டர் உதவியுடன் சிகிச்சை பெற்றுவந்த விஜயகாந்துக்கு மருத்துவப் பணியாளர்களின் கடின முயற்சி இருந்தபோதிலும் காலமானார்” என்று தெரிவிக்கப்பட்டுள்ளது.

தேமுதிக அலுவலகத்தில் உடல் அடக்கம்: மறைந்த விஜயகாந்த் உடல் அவரின் சாலிகிராம இல்லத்துக்கு முதலில் கொண்டுச் செல்லப்பட்டது. அங்கு குடும்ப உறுப்பினர்கள், தமிழக முதல்வர் ஸ்டாலின், முக்கிய பிரமுகர்கள் அஞ்சலி செலுத்தினர். தொடர்ந்து அவரது உடல் பொதுமக்கள் அஞ்சலிக்காக சாலிகிராமத்தில் இருந்து சென்னை கோயம்பேட்டில் உள்ள தேமுதிக தலைமை அலுவலகத்துக்கு ஊர்வலமாக எடுத்துச் செல்லப்பட்டது.

இதனிடையே, அங்கே அவரது உடல் நாளை (வெள்ளி) மாலை வரை பொதுமக்களின் அஞ்சலிக்கு வைக்கப்படும் என்றும், நாளை மாலை 4.30 மணியளவில் தேமுதிக அலுவகத்தில் விஜயகாந்தின் உடல் அடக்கம் செய்யப்படும் என்றும் தகவல் வெளியானது. இதற்கான ஏற்பாடுகள் தற்போது தொடங்கியுள்ளன.

பொது இடத்தில் அடக்கம் செய்ய கோரிக்கை: எதிர்க்கட்சித் தலைவராக செயல்பட்ட விஜயகாந்த் உடலை பொது இடத்தில் அடக்கம் செய்ய வேண்டும் என அவரது மனைவி பிரேமலதா மற்றும் மைத்துனர் எல்கே சுதீஷ் சார்பில் தமிழக அரசிடம் கோரிக்கை வைத்ததாக சொல்லப்படுகிறது.

ஆனால் பொது இடத்தில் அடக்கம் செய்யும் கோரிக்கை மறுக்கப்பட்டது. அதேநேரம், ராஜாஜி அரங்கில் பொதுமக்களின் அஞ்சலிக்காக விஜயகாந்த் உடல் வைக்கப்பட குடும்ப உறுப்பினர்களுக்கு அனுமதி கொடுக்கப்பட்டது. ஆனால் தேமுதிக தலைமை அலுவலகத்தில் பொதுமக்கள் அஞ்சலி மற்றும் நல்லடக்கம் செய்ய ஏற்பாடு செய்ய குடும்ப உறுப்பினர்கள் முடிவெடுத்தன் பேரில் அங்கே உடல் நல்லடக்கம் செய்யப்படுகிறது. 

அரசு மரியாதை: முன்னதாக, விஜயகாந்த் மறைவுக்கு தமிழக முதல்வர் ஸ்டாலின் இரங்கல் தெரிவித்திருந்தார். அந்த இரங்கல் குறிப்பில், விஜயகாந்த் இறுதிப் பயணத்துக்கு முழு அரசு மரியாதை வழங்கப்படும் என்று தெரிவித்துள்ளார்.

தொடர்ந்து, முதல்வர் ஸ்டாலின் சென்னை சாலிகிராமத்தில் உள்ள அவரின் இல்லத்துக்கு நேரில் சென்ற விஜயகாந்த் உடலுக்கு அஞ்சலி செலுத்தினார். அவருடன் அமைச்சர்கள் எ.வ.வேலு, மா.சுப்பிரமணியன், கே.என்.நேரு, டி.ஆர்.பாலு ஆகியோர் சென்று அஞ்சலி செலுத்தினர்.

எதிர்வரும் ஜனவரி முதலாம் திகதி முதல் தொழிற்சங்க நடவடிக்கையில் ஈடுபடவுள்ளதாக அரச வைத்திய அதிகாரிகள் சங்கம் தெரிவித்துள்ளது.

நாட்டை விட்டு வெளியேறுவது உள்ளிட்ட பிரச்சினைகளுக்கு தீர்வை வழங்காவிட்டால் வைத்தியர்கள் வேலை நிறுத்தம் செய்ய வேண்டி ஏற்படும் என எச்சரிக்கை விடுக்கப்பட்டுள்ளது. 

கொழும்பில் நேற்று (27) இடம்பெற்ற செய்தியாளர் சந்திப்பில் கலந்து கொண்ட அதன் செயலாளர் டொக்டர் ஹரித அலுத்கே இதனைத் தெரிவித்துள்ளார்.

தமிழ் அரசியல் கட்சிகளின் சம்மதத்துடன் அழைப்பு விடுக்கப்பட்டால் அடுத்த ஜனாதிபதி தேர்தலில் வேட்பாளராக களமிறங்க தயார் என தமிழ் மக்கள் கூட்டணியின் தலைவர் சி.வி.விக்னேஸ்வரன் தெரிவித்தார்.

தமிழ் அரசியல் கட்சிகள் தனிப்பட்ட ஜனாதிபதி வேட்பாளர்களை முன்வைப்பதை விட பொது  வேட்பாளரை முன்னிறுத்துவது காலத்துக்கு ஏற்றது எனவும் அவர் குறிப்பிட்டுள்ளார்.

பொது தமிழ் வேட்பாளராக முன்வைக்கப்பட்டால், அதற்கு தாம் மிகவும் பொருத்தமானவர் என்றும் அவர் குறிப்பிட்டுள்ளார்.

அடுத்த ஜனாதிபதித் தேர்தலில் வேட்பாளராக போட்டியிட தனக்கு அதிக விருப்பம் இல்லை என்றும், ஆனால் தெற்கில் ஐம்பது சதவீத வாக்குகளை எவராலும் பெற முடியாது என்பதால், வேட்பாளராக போட்டியிடும் எண்ணம் தனக்கு இருப்பதாகவும் விக்னேஸ்வரன் தெரிவித்தார்.

போதைப்பொருள் கடத்தல்காரர்களை கைது செய்வதற்காக முன்னெடுக்கப்படும் யுக்திய சுற்றிவளைப்பு இன்று(27) முதல் மீள ஆரம்பிக்கப்பட்டுள்ளதாக பொதுமக்கள் பாதுகாப்பு அமைச்சர் டிரான் அலஸ் தெரிவித்துள்ளார்.

போதைப்பொருள் கடத்தல்காரர்கள் சகலரையும் சட்டத்திற்கு முன் நிறுத்தும் வரையில் இந்த சுற்றிவளைப்பு முன்னெடுக்கப்படும் என அவர் தெரிவித்தார்.

நத்தார் பண்டிகையை முன்னிட்டு பொலிஸார் பாதுகாப்பு கடமைகளில் ஈடுபடுத்தப்பட்டமையால் நேற்றும்(26) நேற்று முன்தினமும்(25) யுக்திய சுற்றிவளைப்பு தற்காலிகமாக நிறுத்தப்பட்டிருந்தது.

இதனூடாக ஒரு வாரத்தில் 13,666 பேர் கைது செய்யப்பட்டிருந்தனர். 

கைது செய்யப்பட்டவர்களில் 717 பேர் தடுத்து வைத்து விசாரணை செய்யப்படுகின்றனர்.

மழையுடன் இன்புளுவன்சா நோயாளர்களின் எண்ணிக்கை அதிகரித்துள்ளதாகவும், இதனால் இந்நோய் உள்ள சிலருக்கு இரண்டு அல்லது மூன்று நாட்களுக்கு குரல் வளம் இழக்க நேரிடும் எனவும் களுபோவில போதனா வைத்தியசாலையின் உடல் நோய்கள் தொடர்பான நிபுணர் டொக்டர் நந்தன திக்மதுகொட தெரிவிக்கின்றார்.

அண்மைக்காலமாக பெய்து வரும் மழையுடன் கூடிய காலநிலை காரணமாக இந்த வைரஸ் தாக்கம் அதிகரித்துள்ளதாக திக்மதுகொட குறிப்பிடுகின்றார்.

இது வேகமாகப் பரவி வருவதால், இந்நிலை நீண்ட நாட்களாக நீடித்தால் கவனமாக இருக்குமாறு வலியுறுத்தியுள்ளார்.

“இதற்கு ஆன்டிபயாடிக் மருந்துகள் கொடுக்கப்பட்டதை நான் பார்த்தேன். இதையெல்லாம் செய்யவே கூடாது. இந்த விடுமுறை காலத்தில் நாங்கள் பயணம் செய்கிறோம். இது காற்றில் பரவுகிறது. கோவிட் சூழ்நிலையில் நாம் பயன்படுத்திய நல்ல  நடைமுறைகளை மீண்டும் பின்பற்ற வேண்டும். ஆபத்து பகுதிகளில் உள்ளவர்கள் சிறப்பு கவனம் செலுத்த வேண்டும். காய்ச்சலைப் போலவே டெங்குவும் பரவி வருகிறது. தற்போது பதிவாகியுள்ள 87,000 நோயாளிகளில் 17,000 பேர் மேல் மாகாணத்தைச் சேர்ந்தவர்கள். டெங்கு போன்ற காய்ச்சலுக்கு சிகிச்சை அளிக்க வேண்டும். அல்லது அது அதிகரிக்கும் போது ஆபத்தாக முடியும்" என் அவர் மேலும் குறிப்பிடுகிறார்.