"பல கட்சிகள் உருவாகலாம், கட்சிகளைப் பயன்படுத்தி பல கூட்டணிகள் - கூட்டமைப்புக்கள் அமையலாம். ஆனால், தமிழ் மக்களின் ஏகோபித்த கட்சி எது என்பதைத் தேர்தலில் மக்கள் தங்கள் வாக்குகளால் நிரூபித்துக் காட்டுவார்கள். எனவே, 5 தமிழ்க் கட்சிகளைக் கொண்டு யாழ்ப்பாணத்தில் நேற்று உருவான புதிய கூட்டணி தொடர்பில் நான் அலட்டிக்கொள்ள விரும்பவில்லை."

- இவ்வாறு தமிழ்த் தேசியக் கூட்டமைப்பின் தலைவரும் இலங்கைத் தமிழரசுக் கட்சியின் அரசியல் குழுத் தலைவருமான இரா.சம்பந்தன் தெரிவித்தார்.

தமிழ் ஈழ விடுதலை இயக்கம் (ரெலோ), ஜனநாயக மக்கள் விடுதலை முன்னணி (புளொட்), ஈழ மக்கள் புரட்சிகர விடுதலை முன்னணி (ஈ.பி.ஆர்.எல்.எவ்.), தமிழ்த் தேசியக் கட்சி மற்றும் ஜனநாயகப் போராளிகள் கட்சி ஆகிய 5 தமிழ்க் கட்சிகளும் இணைந்து புதிய கூட்டணிக்கான புரிந்துணர்வு உடன்படிக்கையில் நேற்று கைச்சாத்திட்டுள்ளன. 5 தமிழ்க் கட்சிகளும் 'ஜனநாயகத் தமிழ்த் தேசியக் கூட்டணி' எனும் பெயரில் தமிழ்த் தேசியக் கூட்டமைப்பாகத் தங்களைப் பிரகடனப்படுத்தியுள்ளன.

இது தொடர்பில் சம்பந்தன் எம்.பியிடம் வினவிய போதே அவர் மேற்கண்டவாறு கூறினார்.

அவர் மேலும் தெரிவித்ததாவது:-  

"எவரும் ஜனநாயக உரிமைகளைப் பயன்படுத்திக் கட்சிகள், கூட்டணிகள் - கூட்டமைப்புக்கள் அமைப்பதை நான் எதிர்க்கவில்லை.

ஆனால், தேர்தலில் பல கட்சிகள் போட்டியிட்டால் அது மக்களைத்தான் தாக்கும்; மக்களைப் பலவீனப்படுத்தும். தமிழ் மக்கள் இந்தக் கருமத்தில் மிகவும் விழிப்பாக இருக்க வேண்டும்.

இலங்கைத் தமிழரசுக் கட்சி நீண்டகால வரலாற்றைக் கொண்ட கட்சி. தமிழ் மக்களின் பாரம்பரிய கட்சி; 1949 ஆம் ஆண்டு தொடக்கம் உள்ளக சுயநிர்ணய உரிமையின் அடிப்படையில் தமிழ் மக்களின் பிரச்சினைகள் தீர்க்கப்பட வேண்டும் என்று தொடர்ந்து வலியுறுத்தி வரும் கட்சி; தமிழ் மக்களுக்காக அறவழியில் போராடி பல தியாகங்களைச் செய்த கட்சி.

எதிர்வரும் உள்ளூராட்சி சபைத் தேர்தலையொட்டி கொழும்பில் எனது இல்லத்தில் நடைபெற்ற தமிழ்த் தேசியக் கூட்டமைப்பின் ஒருங்கிணைப்புக்குழுக் கூட்டத்தில் எடுக்கப்பட்ட தீர்மானத்துக்கமைய தமிழரசுக் கட்சி செயற்படுகின்றது. ஆனால், கூட்டமைப்பின் ஏனைய இரு பங்காளிக் கட்சிகளும் (ரெலோ, புளொட்) அந்தத் தீர்மானத்துக்கு எதிர்மறையாகச் செயற்படுகின்றன. இது தொடர்பில் நான் அலட்டிக்கொள்ள விரும்பவில்லை.

தமிழ் மக்களின் நலனைக் கருத்தில்கொண்டு செயற்படும் இலங்கைத் தமிழரசுக் கட்சியை மக்கள் ஆதரிப்பார்கள் என்பது எனது திடமான நம்பிக்கை.

எனவே, உள்ளூராட்சி சபைத் தேர்தல் காலத்தில் நான் எதிர்ப்பு அரசியல் செய்ய விரும்பவில்லை. இதுவரை காலமும் நடந்த விடயங்கள், நடக்கின்ற விடயங்கள் ஆகியவற்றைத் தமிழ் மக்கள் கவனமாகச் சிந்தித்து யாருக்கு வாக்களிக்க வேண்டும் என உறுதியான முடிவை எடுக்க வேண்டும் என்று பணிவுடன் கேட்டுக்கொள்கின்றேன்" - என்றார்.

ஏசியன் மிரர் வாசகர்கள் அனைவருக்கும் இனிய பொங்கல் வாழ்த்துக்கள்..! 

நடைபெறவுள்ள உள்ளூராட்சி மன்றத் தேர்தலில் தேர்தல் கடமைகளுக்காக பொலிஸ் உத்தியோகத்தர்களை ஈடுபடுத்துவதில் சிக்கல் நிலை ஏற்பட்டுள்ளது.

கடந்த பொதுத் தேர்தலில் பொலிஸ் உத்தியோகத்தர்களுக்கு பல்வேறு கடமைகள் காரணமாக வழங்க வேண்டிய தொகை இதுவரை வழங்கப்படவில்லை என பொலிஸ் மா அதிபர் சி.டி.விக்ரமரத்ன தேர்தல்கள் ஆணைக்குழுவிற்கு அறிவித்துள்ளார்.

அதன் காரணமாக உள்ளூராட்சி மன்றத் தேர்தலில் பொலிஸ் உத்தியோகத்தர்கள் கடமையாற்றுவதில் சிக்கல் ஏற்பட்டுள்ளதாகவும் பொலிஸ் மா அதிபர் தெரிவித்துள்ளார்.

பொதுத் தேர்தல் கடமைகளுக்காக பொலிஸாருக்கு வழங்க வேண்டிய பணம் இதுவரை கிடைக்கப்பெறாத காரணத்தினால் பொலிஸ் திணைக்களம் நிதிப் பிரச்சினையில் சிக்கியுள்ளதாக தேர்தல்கள் ஆணைக்குழுவிற்கு பொலிஸ் மா அதிபர் அறிவித்துள்ளதோடு, நிலுவைத் தொகையை வழங்குமாறும் கோரிக்கை விடுத்துள்ளார். உள்ளூராட்சித் தேர்தல் பணிகளை ஆரம்பிக்கும் முன்னர் கடந்த பொதுத் தேர்தலுக்கான பணத்தைத் திருப்பிக் கொடுக்க வேண்டும் என்கிறார். 

இது அடிமட்டத் தேர்தல் என்பதால் பல்வேறு குழுக்களுக்கிடையில் முரண்பாடுகள் ஏற்பட்டால் விசேட அதிரடிப் படையினரை வரவழைத்து கட்டுப்படுத்த முடியாவிட்டால் இராணுவத்தினரைக் கூட வரவழைக்க வேண்டிய நிலை ஏற்படும் என்று கூறியுள்ளார்.

மேலும், தேர்தலின்போது காவல்துறைக்கு ஒதுக்கப்பட்டுள்ள சட்டவிரோத விளம்பர கட்அவுட் பேனர்களை அகற்றும் பணியை கூலித் தொழிலாளர்கள் செய்வதாகவும், அவற்றுக்கான கட்டணத்தை முதலில் போலீஸார் செலுத்தி பின்னர் தேர்தல் ஆணையத்திடம் இருந்து பெறுவதாகவும் கூறப்படுகிறது. 

வேடுவர் சமூகத்தின் தலைவரான உருவிகேலகே வன்னில அத்தோ தலைமையிலான குழு எதிர்வரும் உள்ளுராட்சி தேர்தலில் முதன்முறையாக போட்டியிட தீர்மானித்துள்ளது.

மஹியங்கனை, சொரணதொட்டை மற்றும் ஹாலிஎல பிரதேச சபைகளுக்கும் பதுளை மாநகர சபைக்கும் தேசிய ஜனநாயக முன்னணியின் கீழ் இவர்கள் போட்டியிடவுள்ளனர்.

தேசிய ஜனநாயக முன்னணியின் மஹியங்கனைக்கான தேர்தல் அமைப்பாளரும் குழுவின் தலைவருமான இந்திக நுவன் குமார மற்றும் ஏனைய வேட்பாளர்கள் நேற்று பதுளை மாவட்ட தேர்தல் அலுவலகத்தில் கட்டுப்பணம் செலுத்தினர்.

தேசிய ஜனநாயக முன்னணியின் தலைவராக வன்னில அத்தோ தெரிவு செய்யப்படுவார் எனவும் அம்பாறை மாவட்டத்தில் உள்ள அனைத்து உள்ளூராட்சி சபைகளுக்கான தேர்தலில் வேடுவர் சமூகம் போட்டியிடவுள்ளதாகவும் அவர் ஊடகங்களுக்கு தெரிவித்தார்.

“வேடுவர் இனத்தைச் சேர்ந்த பல வேட்பாளர்கள் தேர்தலில் போட்டியிடுவார்கள். சுதந்திரத்திற்குப் பிறகு அடுத்தடுத்த தேர்தல்களில் நாங்கள் முக்கிய அரசியல் கட்சிகளுக்கு வாக்களித்தோம், ஆனால் அவை எங்களை கைவிட்டு விட்டன," என்று அவர் கூறினார்.