இலங்கை தமிழ்த் தேசிய கட்சி செயலாளர் சிவாஜிலிங்கம் மதிமுக பொதுச்செயலாளர் வைகோவை சந்தித்து பேசினார்.

இலங்கை நாடாளுமன்றத்தில் இரண்டு முறை உறுப்பினர் பொறுப்பு வகித்த, தமிழ்த் தேசிய கட்சி செயலாளர் சிவாஜிலிங்கம் தாயகத்தில் மதிமுக பொதுச்செயலாளர் வைகோ சந்தித்தார்.

தமிழக முதல்வர், அனைத்து கட்சிகளையும் ஒருங்கிணைத்து ஒரு தூதுக்குழு அமைத்து, டெல்லி சென்று குடியரசுத் தலைவர், பிரதமர் மற்றும் கட்சித் தலைவர்களை சந்தித்து, தமிழ் ஈழமா அல்லது இலங்கையுடன் சேர்ந்து வாழ்வதா என்ற தலைப்பில் இலங்கையின் வடக்கு கிழக்கு மாநில மக்களிடம் பொதுவாக்கெடுப்பு நடத்த வேண்டும் எனவும் அதற்கு வைகோ உதவி செய்ய வேண்டும் எனவும் கோரினார். 

இருவரும், ஈழத்தமிழர் பிரச்சனை குறித்து நீண்ட நேரம் கருத்துகளைப் பரிமாறிக் கொண்டனர்.

காணி மற்றும் வீடுகள் இன்மையால் குறைந்த வசதிகளுடன் வாழ்கின்ற வாடகைக் குடியிருப்பாளர்களின் பிரச்சினைக்குத் தீர்வுகாணும் நோக்கில் உறுதிப்பத்திர வாடகை வீடு´ எனும் பெயரில் முன்மொழிவுத் திட்டமொன்றை நடைமுறைப்படுத்துவதற்காக கிராமிய வீடமைப்பு, கட்டுமானங்கள் மற்றும் கட்டிடப் பொருட்கள் தொழிற்றுறை ஊக்குவிப்பு இராஜாங்க அமைச்சு திட்டமிட்டுள்ளது.

குறித்த கருத்திட்டத்தின் கீழ் 04 மாடிகளுடன் கூடிய அடுக்குமாடிக் குடியிருப்புக்களை நிர்மாணிப்பதற்கும், முதலாம் கட்டத்தின் கீழ் மாகாண மட்டத்தில் 464 வீடுகளுடன் கூடிய 09 வீடமைப்புத் தொகுதியை நிர்மாணிப்பதற்கும் திட்டமிடப்பட்டுள்ளது.

தெரிவுசெய்யப்படும் பயனாளிகளுக்கு ஆரம்பக் கொடுப்பனவை செலுத்துவதற்கான இயலுமை இன்மையால், மாதாந்தம் 15,000/- ரூபா வாடகைப் பணமாக 31 வருடங்களுக்கு அறவிடுவதற்கும், இரண்டாவது அல்லது மூன்றாவது பரம்பரைக்கு வீட்டு உரிமையை ஒப்படைக்கக் கூடிய வகையிலும், எந்தவொரு காரணத்திற்காகவும் வீட்டை விற்பனை செய்வதற்கு இயலாத வகையிலும் பயனாளிகளுடன் ஒப்பந்தமொன்றை மேற்கொள்வதற்கும் திட்டமிடப்பட்டுள்ளது.

அதற்கமைய, குறித்த கருத்திட்டத்தை நடைமுறைப்படுத்துவதற்காக நகர அபிவிருத்தி மற்றும் வீடமைப்பு அமைச்சராக பிரதமர் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

பயங்கரவாதத் தடுப்பு (தற்காலிக திருத்தம்) சட்டமூலத்தின் இரண்டாம் வாசிப்பு மீதான வாக்கெடுப்பு இன்று (22) பாராளுமன்றத்தில் இடம்பெற்றது.

இதன்படி, சட்டமூலத்திற்கு ஆதரவாக 86 வாக்குகளும் எதிராக 35 வாக்குகளும் அளிக்கப்பட்டன.

ஜனாதிபதி கோட்டாபய ராஜபக்ஷ தலைமையில், நாளை மறுதினம் நடைபெறவுள்ள சர்வ கட்சி மாநாட்டை புறக்கணிப்பதற்கு தமிழ் முற்போக்கு கூட்டணி தீர்மானித்துள்ளது.

பொருளாதார துறையில் மட்டுமல்லாது, சகல துறைகளிலும் நாடு பாரிய வீழ்ச்சியை சந்தித்துள்ள பின்னணியில், சர்வகட்சி மாநாட்டில் கலந்துக்கொள்ளுமாறு விடுக்கப்பட்ட அழைப்பை கவனமாக பரிசீலித்து, இம்மாநாட்டில் கலந்துக்கொள்வதில்லை என தீர்மானிக்கப்பட்டதாக தமிழ் முற்போக்கு கூட்டணியின் தலைவரும் பாராளுளுமன்ற உறுப்பினருமான மனோ கணேசன் தெரிவித்துள்ளார்.

அத்துடன் இது அரசாங்கத்தின் தோல்வியை எதிரணியின் தலைகளில் சுமத்துவதற்கான முயற்சி என்றும் அரசாங்கத்தின் பங்காளி கட்சியான ஸ்ரீ லங்கா சுதந்திர கட்சியை திருப்திப்படுத்த அரசாங்கம் செய்யும் முயற்சி என்றும் அவர் தெரிவித்தார்.

பிரதமர் மகிந்த ராஜபக்ச தலைமயிலான ஆளுங்கட்சி நாடாளுமன்ற கூட்டம் இன்று அவசரமாக கூடுகின்றது. 

இதன்போது, அரசாங்கத்தின் தீர்மானங்கள் மற்றும் நாட்டின் நெருக்கடி நிலைமைகள் குறித்து முக்கியத்துவம் கொடுத்து ஆராயப்படவுள்ளதாக தெரிவிக்கப்படுகின்றது.

நாட்டில் ஏற்பட்டுள்ள அத்தியாவசிய பொருட்களுக்கான தட்டுப்பாட்டு நிலைமை மற்றும் பொருட்களை பெற்றுக்கொள்ள மக்கள் வரிசையில் நின்று ஆவேசப்பட்டு அரசாங்கத்தை மோசமாக விமர்சிக்கின்ற நிலையில், அரசாங்கத்தின் தீர்மானங்கள் தொடர்பில் ஆளுங்கட்சிக்குள்ளும் இது பாரிய குழப்பத்தையும் நெருக்கடியையும் ஏற்படுத்தியுள்ளதாக தெரிவிக்கப்படுகின்றது.

அரசாங்கம் உடனடியாக ஏதேனும் தீர்மானம் எடுக்காவிட்டால் நிலைமைகள் மோசமடையும் என பங்காளிக்கட்சிகளும் ஆளுந்தரப்பு உறுப்பினர்கள் பலரும் ஜனாதிபதி, பிரதமர் மற்றும் நிதி அமைச்சரிடத்தில் சுட்டிக்காட்டியுள்ளனர்.

அத்தியாவசிய பொருட்களுக்கு நாட்டில் ஏற்பட்டுள்ள பாரிய தட்டுப்பாட்டு நிலைமையை அடுத்து நாளாந்தம் மக்கள் வீதிகளில் வரிசையில் நின்று தமக்கான பொருட்களை பெற்றுக்கொள்ள வேண்டிய நிலைமை உருவாகியுள்ளது.

இந்நிலையில் மக்களின் ஆவேசமான செயற்பாடுகள் மற்றும் அரசாங்கத்தை மிக மோசமாக விமர்சித்து தமது எதிர்ப்பை வெளிப்படுத்தி வருகின்ற காரணத்தினால் அரசாங்கத்தில் பலரும் இது குறித்து அரச மேலிடத்துடன் முரண்படும் நிலைமை ஏற்பட்டுள்ளதாக தெரிய வருகின்றது.

குறிப்பாக பிரதான பங்காளிக்கட்சியான ஸ்ரீலங்கா சுதந்திர கட்சியும் நாடாளுமன்ற உறுப்பினர்களான விமல், கம்மன்பில, வாசுதேவ நாணயக்கார உள்ளிட்ட பங்காளிக்கட்சிகளும் அரசாங்கத்தின் மீதே கடுமையாக பழி சுமத்தி வருகின்ற நிலையில் தற்போது ஆளுங்கட்சி பின்வரிசை உறுப்பினர்களும், அமைச்சரவை அமைச்சர்கள் சிலரும் அரசாங்கத்தின் செயற்பாடுகளை கண்டிக்க ஆரம்பித்துள்ளதாக தெரிய வருகின்றது.

இந்நிலையில் பிரதமர் தலைமையில் இன்று ஆளுங்கட்சி நாடாளுமன்ற குழு கூடுகின்றது. அலரிமாளிகையில் கூடும் இன்றைய கூட்டத்தின் போதும் நாட்டின் நெருக்கடி நிலைமைகள் குறித்தும், உடனடியாக முன்னெடுக்க வேண்டிய வேலைத்திட்டங்கள் குறித்தும் கலந்துரையாடப்படும் எனவும் ஆளுங்கட்சி உறுப்பினர் சன்ன ஜயசுமன தெரிவித்தார்.    

இலங்கையின் தலைமன்னாரில் இருந்து தனுஷ்கோடி அரிச்சல்முனை வரையுள்ள 29 கிமீ தொலைவை 13 மணிநேரம் 10 நிமிட நேரத்தில் கடலில் நீந்தி வந்து சாதனை படைத்திருக்கிறார் ஆட்டிசம் ஸ்பெக்டரம் நோயால் பாதிக்கப்பட்டுள்ள மாற்றுத்திறனாளி சிறுமி ஒருவர். சாதனை சிறுமிக்கு நினைவு பரிசு, பூங்கொத்து கொடுத்து தமிழக டிஜிபி சைலேந்திரபாபு பாராட்டியுள்ளார்.

மும்பை இந்திய கடற்படை நிலையத்தில் பணிபுரிபவர் மதன் ராய் இவரது மனைவி ரச்சானா ராய். இத்தம்பதியரின் மகளான ஜியா ராய் என்ற 13 வயது சிறுமி காது கேளாத வாய்பேசாத மாற்றுத்திறனாளி ஆவார்.

சிறுமி ஜியாராய் ஆட்டிசம் ஸ்பெக்டரம் பாதிப்புக்குள்ளானவர். இந்த நிலையில் கடந்த 2019ஆம் ஆண்டு குளத்தில் குளிக்கும்போது மாற்றுத்திறனாளியான ஜியா ராய் நீச்சல் அடிப்பதில் அதிக ஆர்வம் காட்டி வந்துள்ளார்.

மேலும் இதுவரை இலங்கை தலைமன்னாரில் இருந்து அரிச்சல்முனை வரை மாற்றுத்திறனாளி யாருமே நீந்தி வராத நிலையில் முதல் முதலாக மும்பையைச் சேர்ந்த காதுகேளாத வாய்பேச முடியாத மாற்றுத்திறனாளியான ஜியா ராய் 13 மணி நேரத்தில் கடலில் நீந்தி வந்து சாதனை படைத்துள்ளார்.

மேலும் அரிச்சல்முனை பகுதியை வந்தடைந்த மாற்றுத்திறனாளி ஜியா ராயை கரையில் இருந்த சுற்றுலா பயணிகள், மீனவர்கள் மற்றும் பொதுமக்கள் ஏராளமானோர் கைதட்டி ஆரவாரத்துடன் வரவேற்றனர்.

பின்னர் தமிழக டிஜிபி சைலேந்திரபாபு மாற்றுத்திறனாளி சிறுமிக்கு நினைவு பரிசு, பூங்கொத்து கொடுத்து பொன்னாடை போர்த்தி வாழ்த்தினார். இதனால் மாற்றுத்திறனாளியின் பெற்றோர்கள் மிகுந்த மகிழ்ச்சியடைந்துள்ளனர்.

மேலும் கடலில் நீந்தி வந்த மாற்றுத்திறனாளி பெண்ணுக்கு இந்திய கடலோர காவல் படை, கடற்படை, மரைன் போலீசார் கடலில் பாதுகாப்பு வழங்கியதோடு கடற்கரைக்கு வந்த பின்னர் ராமநாதபுரம் மாவட்ட காவல்துறை சார்பாக பாதுகாப்பு வழங்கப்பட்டது.

பின்னர் செய்தியாளர்களை சந்தித்த தமிழக டிஜிபி சைலேந்திரபாபு கூறியதாவது:-

இலங்கை தலைமன்னாரில் இருந்து அரிச்சல்முனை வரை பலவிதமான கடல் உயிரினங்களான கடல் பசு, ஜெல்லி மீன் வாழகூடிய கடல் பகுதியாக இருப்பதால் பலவித சவால்களை சந்தித்து மாற்றுத்திறனாளி சிறுமி நீந்தி வந்தது பாராட்டுக்குரிய விஷயம் என்றார்.

மேலும் நீச்சல் தெரியாமல் குளங்களில் ஆறுகளில் மற்றும் மெரினா கடற்கரையில் ஒரு ஆண்டிற்கு 100 பேர் இறப்பதாகவும், நீச்சல் பயில தற்போதைய இளைஞர்கள் மத்தியில் கடலில் நீச்சலடிக்கும் ஆர்வம் அதிகரித்து வருவதாக தெரிவித்தார்.

இதையடுத்து, சிறுமியை ஊக்கப்படுத்தி இவ்வளவு தூரம் பயணிக்க வைத்த பெற்றோர்களை அவர் வெகுவாக பாராட்டினார்.

ஜியாராய் 2021 ஆம் ஆண்டு மும்பை கடலில் 36 கிலோமீட்டர் நீந்தி சாதனை படைத்தார். இவரது சாதனையை பிரதமர் நரேந்திர மோடி 'மான் கி பாத்’ நிகழ்ச்சியில் பாராட்டினார் என்பது குறிப்பிடத்தக்கது.