kumar
எதிர்க்கட்சிகளின் கடும் எதிர்ப்புக்களுக்கு மத்தியில் மின்சார சபை மறுசீரமைப்பு சட்டமூலம் 44 மேலதிக வாக்குகளினால் நிறைவேற்றப்பட்டது.
இந்த சட்டமூலத்திற்கு ஆதரவாக103 வாக்குகளும் எதிராக 59 வாக்குகளும் அளிக்கப்பட்ட நிலையிலேயே 44மேலதிக வாக்குகளினால் சட்டமூலம் நிறை வேற்றப்பட்டது. அரசு மற்றும் எதிர் கட்சிகளை சேர்ந்த 62 எம்.பி.க்கள் வாக்கெடுப்பில் பங்கேற்கவில்லை.
விவாத முடிவில் பிரதான எதிர்க்கட்சியான ஐக்கிய மக்கள் சக்தியின் எம்.பி. யும் எதிர்க்கட்சிகளின் பிரதம கொறடாவுமான லக்ஷ்மன் கிரியெல்ல எம்.பி.வாக்கெடுப்பைக் கோரினார்.
இதனையடுத்து இடம்பெற்ற இலத்திரனியல் முறையிலான வாக்கெடுப்பில் சட்டமூலத்திற்கு ஆதரவாக 103 வாக்குகளும் எதிராக 59 வாக்குகளும் அளிக்கப்பட்டன. அரசாங்கத்துடன் இணைந்து சுயாதீன எதிரணி எம்.பி.க்களான அலி சப்ரி ரஹீம்,,ஜோன் செனவிரத்ன அநுர பிரியதர்சன யாப்பா,பிரியங்கர ஜயரத்ன நிமல் லான்ச மற்றும் ஐக்கிய மக்கள் சக்தி எம்.பி.யான பௌசி ஆகியோர் வாக்களித்தனர்
இந்த வாக்கெடுப்பை தமிழ் தேசியக்கூட்டமைப்பு ,தமிழ் தேசிய மக்கள் முன்னணி , தமிழ் மக்கள் தேசிய கூட்டணி ஆகிய கட்சிகள் புறக்கணித்திருந்தன. அதேவேளை ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீம்,அகில இலங்கை மக்கள் காங்கிரஸ் தலைவர் ரிஷாட் பதியுதீன்,தேசிய காங்கிரஸ் தலைவர் அதாவுல்லா ஆகியோரும் வாக்களிப்பில் பங்கேற்கவில்லை.
தமிழீழ விடுதலைப் புலிகள் இயக்கத்தின் தலைவர் வேலுபிள்ளை பிரபாகரனின் சகோதரர் மனோகரன் என்பவர், ஐரோப்பாவில் உள்ள டென்மார்க் பகுதியில் வசித்து வருகிறார்.
இவர் 1975ஆம் ஆண்டு இலங்கையில் இருந்து வெளியேறியதாகக் கூறப்படுகிறது. இந்நிலையில், தனது சகோதரர் பிரபாகரன் மற்றும் அவரது குடும்பத்தினர் அனைவரும் கடந்த 2009ஆம் ஆண்டு மரணமடைந்து விட்டதாக பொதுத் தளத்தில் முதல் முறையாக அவர் தெரிவித்துள்ளார்.
மேலும், பிரபாகரனின் உறவினர்கள் சிலர் குறிப்பாக, அவரது மகள் உயிரோடு இருக்கிறார் என்பது பொய்யான தகவல் என தமிழகத்தைச் சேர்ந்த சிலரின் கருத்துகளுக்கு மறுப்பு தெரிவித்துள்ளார். இது குறித்து இலங்கையில் பிரபல செய்தி தளத்திற்கு வேலுப்பிள்ளை மனோகரன் விளக்கம் அளித்துள்ளார்.
அதில் "2009ஆம் ஆண்டு நடைபெற்ற இலங்கை போரில் வேலுப்பிள்ளை பிரபாகரன், அவரது மனைவி மற்றும் அவரது குழந்தைகள் என அனைவரும் மரணமடைந்து விட்டனர். அவர் வெளிநாட்டில் உயிருடன் இருப்பதாக பொய்யான தகவலை சிலர் பரப்பி வருகின்றனர். அவரது மூத்த சகோதரன் என்ற முறையில் அத்தகைய பொய்யான தகவல்களுக்கு நானே பொறுப்பு ஏற்கிறேன்" எனத் தெரிவித்தார்.
மேலும், பிரபாகரன் மற்றும் அவரது குடும்பத்தினர் உயிருடன் இருப்பதாகக் கூறி இலங்கையில் புலம்பெயர் தமிழ் மக்களை ஏமாற்றி பணம் பறிக்கும் பெரும் மோசடியில் பலர் ஈடுபட்டு வருவதாக இலங்கையில் செய்தித் தளம் ஒன்று தெரிவித்துள்ளது.
தொடர்ந்து, "எனது சகோதரர் பிரபாகரன் மற்றும் அவரது குடும்பத்தினர் அனைவரும் மரணமடைந்து தியாகத்தை அடைந்துள்ளனர். இதனை உண்மை என ஏற்றுக் கொள்வது முக்கியமானதாகும். மேலும், எனது சகோதரர் மற்றும் அவரது குடும்பம் உயிருடன் இருப்பதாகக் கூறி ஏமாற்றுபவர்களை நம்ப வேண்டாம் என கேட்டுக் கொள்கிறேன். கடந்த சில மாதங்களாக, இளம்பெண் ஒருவர் தன்னை பிரபாகரனின் மகள் என பொய்யாகக் கூறி வருகிறார். மேலும், இதனை சுட்டிக்காட்டி இலங்கையில் புலம்பெயர் தமிழ் மக்களிடம் பல லட்சம் ரூபாய் பணம் மோசடி செய்யப்பட்டுள்ளது” என மனோகரன் கூறியதாக இலங்கையின் செய்தித் தளம் தெரிவித்துள்ளது.
எதிர்வரும் தேர்தலை கருத்திற்கொண்டு கட்சி மாறும் எதிர்க்கட்சி எம்.பி.க்களின் இரகசிய கலந்துரையாடல்கள் வேகமாக அதிகரித்து வருவதாக அரசியல் வட்டாரங்கள் தெரிவிக்கின்றன.
இதன்படி எதிர்வரும் ஜனாதிபதித் தேர்தலில் ரணில் விக்கிரமசிங்கவுக்கு ஆதரவளிக்க எதிர்க்கட்சிகளின் சிரேஷ்ட உறுப்பினர்கள் பலர் தயாராகி வருவதுடன், விசேட கலந்துரையாடலொன்று நேற்று பாராளுமன்றத்தில் இடம்பெற்றது.
இதற்கு சப்ரகமுவ மாகாண நாடாளுமன்ற உறுப்பினர் ஒருவர் தலைமை தாங்கியுள்ளதாக தெரியவந்துள்ளது.
இந்த நிலைமை எதிர்காலத்தில் மிகவும் சூடு பிடிக்கும் என மேற்கண்ட வட்டாரங்கள் மேலும் தெரிவித்தன.
பயங்கரவாத மற்றும் தீவிரவாத நடவடிக்கைகளில் ஈடுபட்ட 15 அமைப்புக்கள் மற்றும் 210 நபர்களின் அனைத்து நிதி மற்றும் சொத்துக்களை முடக்க அரசாங்கம் நடவடிக்கை எடுத்துள்ளதாக பாதுகாப்பு அமைச்சு வர்த்தமானி அறிவித்தலில் குறிப்பிட்டுள்ளது.
ஐக்கிய நாடுகள் சபையின் 2012 ஆம் ஆண்டின் 01 ஆம் இலக்க கட்டளையின் பிரகாரம் இந்த நாட்டில் 15 பயங்கரவாத மற்றும் தீவிரவாத அமைப்புக்கள் மற்றும் அவர்களுடன் தொடர்புடைய 210 பேரின் நிதி, ஏனைய நிதி சொத்துக்கள் மற்றும் பொருளாதார வளங்கள் அனைத்தும் முடக்கப்பட்டுள்ளன.
அதன்படி, தமிழீழ விடுதலைப் புலிகள், ஈழ விடுதலைப் புலிகள், தமிழர் புனர்வாழ்வு அமைப்பு அல்லது TRO, தேசிய தவ்தீஹ் ஜமாத் அல்லது NTJ, ஜமாதே மிலாதே இப்ராஹிம் அல்லது ஜேஎம்ஐ போன்ற 15 பேரின் அனைத்து நிதி மற்றும் சொத்துக்கள் முடக்கப்பட்டுள்ளதாகத் தெரிவிக்கப்படுகிறது.
பயங்கரவாத செயற்பாடுகள் மற்றும் பயங்கரவாதத்திற்கு பணம் வழங்கியதாக குற்றம் சுமத்தப்பட்டுள்ள 113 பேரின் பணம் மற்றும் சொத்துக்கள் அனைத்தும் முடக்கப்பட்டுள்ளதாகவும் தெரிவிக்கப்படுகின்றது.
நாடாளுமன்றம் இன்று கூடிய போது சபாநாயகர் மஹிந்த யாப்பா அபேவர்தன விடுத்துள்ள அறிக்கையில், மக்களின் பாதுகாப்பிற்காக நாடு முழுவதிலும் உள்ள இராணுவத்தினரை அழைக்குமாறு ஜனாதிபதி உத்தரவு பிறப்பித்துள்ளார்.
பொது பாதுகாப்பு சட்டத்தின் 12வது பிரிவின் கீழ் வழங்கப்பட்ட அதிகாரங்களுக்கு அமைய ஜனாதிபதி இந்த உத்தரவை பிறப்பித்துள்ளதாக தெரிவிக்கப்படுகின்றது.
மோசமான வானிலை காரணமாக இதுவரை 26 பேர் உயிரிழந்துள்ளனர்.
இன்று (04) பாராளுமன்றத்தில் கருத்து வெளியிடும் போதே பாதுகாப்பு இராஜாங்க அமைச்சர் பிரமித பண்டார தென்னகோன் மேற்கண்டவாறு தெரிவித்தார்.
மோசமான காலநிலை காரணமாக 41 பேர் காயமடைந்துள்ளதாக இராஜாங்க அமைச்சர் மேலும் குறிப்பிட்டுள்ளார்.
அத்துடன், 23 மாவட்டங்களின் 262 பிரதேச செயலகப் பிரிவுகளில் 33,422 குடும்பங்களைச் சேர்ந்த 130,021 பேர் அனர்த்தத்தினால் பாதிக்கப்பட்டுள்ளனர்.
அந்த பிரதேசங்களில் அரசாங்கத்தினால் நடத்தப்படும் 116 பாதுகாப்பு நிலையங்களில் 2,368 குடும்பங்களைச் சேர்ந்த 9,248 பேர் தடுத்து வைக்கப்பட்டுள்ளதாக இராஜாங்க அமைச்சர் மேலும் குறிப்பிட்டுள்ளார்.
இன்று (ஜூன் 4) நள்ளிரவு முதல் எரிவாயு சிலிண்டர்களின் விலையை குறைக்க லிட்ரோ கேஸ் நிறுவனம் நடவடிக்கை எடுத்துள்ளது.
இதன்படி, 3,940 ரூபாய்க்கு விற்பனை செய்யப்பட்ட 12.5 கிலோ எடையுள்ள எரிவாயு சிலிண்டரின் விலை, 150 ரூபாவால் குறைக்கப்பட்டு, அதன் புதிய விலை, 3,790 ரூபாயாக குறையும்.
மேலும், 5 கிலோ எடை கொண்ட சிலிண்டர் ரூ.1,582க்கு விற்பனை செய்யப்பட்டு வந்த நிலையில், அதன் விலை ரூ.60 குறைக்கப்பட்டுள்ளது.
அதன்படி, அதன் புதிய விலை ரூ.1,522 ஆக குறையும்.
தவிர, 2.3 கிலோ எடை கொண்ட சிலிண்டரின் விலை ரூ.28 குறைக்கப்பட்டுள்ளது.
740 ரூபாய்க்கு விற்கப்பட்ட அந்த சிலிண்டரின் விலை 712 ரூபாயாக குறைந்துள்ளது.
மேல் மாகாணத்தில் பதிவு செய்யப்பட்ட வாகனங்கள் தவிர்ந்த ஏனைய மாகாணங்களின் வாகனங்களுக்கான வருமான அனுமதிப்பத்திரத்தை தென் மாகாண மோட்டார் போக்குவரத்து திணைக்களத்திலோ அல்லது தென்மாகாண பிரதேச செயலகங்களிலோ பெற்றுக்கொள்ள முடியும்.
தென் மாகாணத்தில் இருந்து வேறு மாகாணத்திலிருந்து வருமான அனுமதிப்பத்திரம் பெறும்போது உரிமக் கட்டணத்திற்கு மேலதிகமாக 100 ரூபா கட்டணமாக அறவிடப்படும் என தென் மாகாண பிரதம செயலாளர் சுமித் அழககோன் தெரிவித்துள்ளார்.
இதுவரை, வருவாய் உரிமம் வழங்கும் முறையின் மூலம் வருவாய் உரிமம் பெறும் திறன் அந்தந்த மாகாணத்தில் பதிவு செய்யப்பட்ட வாகனங்களுக்கு மட்டுமே இருந்தது.
மிக விரைவில் ஊடகத்துறை அமைச்சர் பதவியை மாற்றுவது குறித்து அரசாங்கம் கவனம் செலுத்தி வருகிறது.
இதன்படி தற்போது போக்குவரத்து அமைச்சராக பதவி வகித்து வரும் பந்துல குணவர்தன நீக்கப்பட்டு அமைச்சரவையில் மாற்றம் செய்யப்படவுள்ளதாக தெரிவிக்கப்படுகின்றது.
ஐக்கிய தேசியக் கட்சியின் உறுப்பினர் வஜிர அபேவர்தனவுக்கு அமைச்சுப் பதவி கிடைக்க வாய்ப்பு உள்ளதாகவும் அறியப்படுகிறது.
அதன் பின்னர் அவர் அரசாங்கத்தின் அமைச்சரவைப் பேச்சாளராக நியமிக்கப்படவுள்ளதாக ஐக்கிய தேசியக் கட்சி வட்டாரங்கள் தெரிவித்தன.
நாட்டின் தென்மேற்குப் பகுதியில் தற்போது நிலவும் பலத்த மழை நிலைமை இன்று தொடக்கம் (04 ஆம் திகதி) தற்காலிகமாக குறைவடையும் என எதிர்பார்க்கப்படுவதாக வளிமண்டலவியல் திணைக்களம் எதிர்வு கூறியுள்ளது.
மேல், சப்ரகமுவ, மத்திய, தென் மற்றும் வடமேல் மாகாணங்களில் அவ்வப்போது மழையோ அல்லது இடியுடன் கூடிய மழையோ பெய்யக் கூடிய சாத்தியம் காணப்படுகின்றது.
நாட்டின் ஏனைய பிரதேசங்களில் பல இடங்களில் மாலையில் அல்லது இரவில் மழையோ அல்லது இடியுடன் கூடிய மழையோ பெய்யக் கூடிய சாத்தியம் காணப்படுகின்றது.
நாட்டைச் சூழவுள்ள கடற்பரப்புகளில் காற்றானது தென்மேற்கு திசையிலிருந்து வீசக் கூடுவதுடன் காற்றின் வேகமானது மணித்தியாலத்துக்கு 30-40 கிலோ மீற்றர் வரை காணப்படும் என எதிர்பார்க்கப்படுகின்றது.
காங்கேசந்துறையிலிருந்து மன்னார் ஊடாக புத்தளம் வரையான கரையோரத்திற்கு அப்பாற்பட்ட கடற்பரப்புகளிலும் ஹம்பாந்தோட்டையிலிருந்து பொத்துவில் வரையான கரையோரத்திற்கு அப்பாற்பட்ட கடற்பரப்புகளிலும் காற்றின் வேகமானது அவ்வப்போது மணித்தியாலத்துக்கு 50-60 கிலோ மீற்றர் வரை அதிகரிக்கக் கூடிய சாத்தியம் காணப்படுவதுடன், காலியிலிருந்து மாத்தறை ஊடாக ஹம்பாந்தோட்டை வரையான கரையோரத்திற்கு அப்பாற்பட்ட கடற்பரப்புகளில் காற்றின் வேகமானது அவ்வப்போது மணித்தியாலத்துக்கு 50 கிலோ மீற்றர் வரை அதிகரிக்கக் கூடிய சாத்தியம் காணப்படுகின்றது.
இடியுடன் கூடிய மழை பெய்யும் வேளைகளில் அப் பிரதேசங்களில் தற்காலிகமாக பலத்த காற்றும் வீசக்கூடும். மின்னல் தாக்கங்களினால் ஏற்படக்கூடிய பாதிப்புகளை குறைத்துக்கொள்ள தேவையான முன்னெச்சரிக்கை நடவடிக்கைகளை எடுத்துக் கொள்ளுமாறு பொதுமக்கள் அறிவுறுத்தப்படுகின்றார்கள்.