நாடு முழுவதிலும் உள்ள மத ஸ்தலங்களுக்குச் சொந்தமான சொத்துக்கள் மற்றும் பொறுப்புக்கள் தொடர்பான தகவல்களைப் பெற்றுக்கொள்ள அரசாங்கம் தீர்மானித்துள்ளது.

அந்த மத  ஸ்தலங்களின் சொத்துக்கள் தொடர்பில் அரசாங்கத்திடம் சரியான தகவல்கள் இல்லாத காரணத்தினால் இந்த நடவடிக்கை எடுக்கப்பட்டுள்ளதாக புத்தசாசன சமய மற்றும் கலாசார அலுவல்கள் அமைச்சர் விதுர விக்கிரமநாயக்க தெரிவித்துள்ளார்.

மத வழிபாட்டுத் தலங்களைப் பதிவு செய்யும் பணியுடன் இந்தத் தகவல் சேகரிப்பும் தொடங்கப்பட உள்ளது.

எதிர்காலத்தில், கிராம அதிகாரிகளின் எல்லைக்குள்  இருக்கக்கூடிய மத இடங்களுக்கான அளவுகோல்களை தயார் செய்ய அரசாங்கம் எதிர்பார்க்கிறது. 

ஸ்ரீலங்கா சுதந்திரக் கட்சியின் தலைமைப் பொறுப்பை ஏற்கத் தயார் என ஸ்ரீலங்கா சுதந்திரக் கட்சியின் செயலாளர் நாயகம் நாடாளுமன்ற உறுப்பினர் தயாசிறி ஜயசேகர தெரிவித்துள்ளார்.

கட்சி தனது தலைமையைக் கோரினால், கட்சித் தலைவர் அதை ஒப்படைக்கத் தயார் என்றால் கட்சியைக் கைப்பற்றத் தயார் என்றும், கட்சியை வெற்றிபெறச் செய்ய பாடுபடுவேன் என்றும் கூறினார். 

எதிர்வரும் பெரும் போகத்தில் விவசாயிகளுக்கு மற்றுமொரு இரசாயன உரத்தை இலவசமாக வழங்குவதற்கு திட்டமிடப்பட்டுள்ளதாக விவசாய அமைச்சு அறிவித்துள்ளது.

இந்த விடயம் தொடர்பில் ஜனாதிபதி ரணில் விக்ரமசிங்கவுடன் கலந்துரையாடியதாகவும் அதற்கு ஜனாதிபதி சாதகமாக பதிலளித்துள்ளதாகவும் விவசாய அமைச்சர் மஹிந்த அமரவீர தெரிவித்துள்ளார்.
 
இதேவேளை, அடுத்த பெரும் போகத்தில் அனைத்து விவசாயிகளுக்கும் உரங்களை கொள்வனவு செய்வதற்கான வவுச்சர்களுக்கு பதிலாக விவசாயிகளின் கணக்குகளுக்கு பணத்தை வழங்கவும் அரசாங்கம் தீர்மானித்துள்ளது.

அதன்படி, பொது மக்கள் தமது விருப்பத்திற்கு ஏற்ப  இரசாயன உரங்கள் அல்லது கரிம உரங்களை தனியார் அல்லது அரச உரக் கூட்டுத்தாபனத்தில் கொள்வனவு செய்யலாம் என மஹிந்த அமரவீர தெரித்தார்.

தனிச் சிங்களச் சட்டத்தைத் தொடர்ந்து அரசியல்வாதிகள் சிலரால் மொழியின் பெயரால் பிரித்து வைக்கப்பட்டுள்ள இலங்கை மக்கள், இலங்கையர்களாக முன்னோக்கி செல்ல வேண்டிய நிலையில், நாங்கள் ஒவ்வொருவரும், அமைச்சர் டக்ளஸ் தேவானந்தாவை போன்று நிதானமான முறையில் கருத்துக்களை வெளியிட வேண்டும் என்று அமைச்சர் மனுஷ நாணயக்கார தெரிவித்தார்.

யாழ். முற்றவெளியில் இன்று (15.07.2023) இடம்பெற்ற தொழில் சந்தை மற்றும் கண்காட்சி நிகழ்வை ஆரம்பித்து வைத்து உரையாற்றுகையிலேயே அமைச்சர் மேற்கண்டவாறு தெரிவித்தார்.

தொழில் மற்றும் வெளிநாட்டு வேலை வாய்ப்புக்கள் அமைச்சர் மேலும் தெரிவிக்கையில், இந்நாட்டில் வாழ்கின்ற அனைவரும் தங்களுடைய கலாச்சார பண்பாட்டு விழுமியங்களை பேணிப் பாதுகாக்க வேண்டியது அவசியம். 

அதேவேளை, இனம், மொழி, மதம், நிறம் போன்ற அனைத்து விடயங்களையும் கடந்து இலங்கையர்களாக சவால்களை எதிர்கொள்ளுகின்ற போதே, நாட்டின் எதிர்காலத்தினை வளமானதாக மாற்றியமைக்க முடியும். 

இந்த நிலையில், மொழியின் பெயரால் அரசியல்வாதிகள் சிலரினால் பிரித்து வைக்கப்பட்டுள்ள இந்நாட்டில் நல்லிணக்கத்தினை ஏற்படுத்துவதற்கு, நாம் அனைவரும் வெளியிடுகின்ற கருத்துக்கள் நிதானமானவையாக அமைய வேண்டியதன் அவசியத்தை வெளிப்படுத்தும் கதையொன்றை தெரிவித்த அமைச்சர் மனுஷ நாணயக்கார, குறித்த விடயத்தில் அமைச்சர் டக்ளஸ் தேவானந்தா வெளியிடுகின்ற கருத்துக்கள் மிகவும் நிதானமானவை எனவும் அவ்வாறான பக்குவமே இந்த நாட்டிற்கு அவசியம் எனவும் தெரிவித்தார்.

முன்னாள் நாடாளுமன்ற உறுப்பினர் முஜிபர் ரஹ்மான், தான் இராஜினாமா செய்த நாடாளுமன்ற உறுப்பினர் பதவியை தமக்கு மீட்டுத் தருமாறு கோரி உச்ச நீதிமன்றத்தை நாடத் தீர்மானித்துள்ளார்.

அதன்படி தமக்கு மீண்டும் எம்.பி பதவியை வழங்குமாறு கோரி அடிப்படை உரிமை மீறல் மனு ஒன்றை தாக்கல் செய்யவுள்ளதாக அவர் தெரிவித்துள்ளார்.

தற்போது சட்டத்தரணிகளுடன் கலந்துரையாடி வருவதாகவும், பிரதிவாதிகளாக நிதி அமைச்சர், தேர்தல்கள் ஆணைக்குழு, நிதி அமைச்சின் செயலாளர் மற்றும் சட்டமா அதிபர் ஆகியோரை பெயரிட்டுள்ளதாகவும் அவர் கூறினார்.

தேர்தல் நடத்தப்படும் என தேர்தல் ஆணையம் அறிவித்ததால் எம்பி பதவியை ராஜினாமா செய்ததாகவும், தன்னிடம் வேட்புமனு பணம் பெற்றதாகவும் அவர் கூறுகிறார்.

மேலும் தேர்தலில் போட்டியிட முன்வந்த அரசு ஊழியர்களுக்கு வேலை வாய்ப்பு மற்றும் சம்பளம் வழங்க அரசு நடவடிக்கை எடுத்திருப்பதால் தனக்கு க்கு மீண்டும் எம்.பி பதவியை வழங்கவும் நடவடிக்கை எடுக்க வேண்டும் என்றார்.

இதய அறுவை சிகிச்சைகளுக்காக 2,000 வரையிலான சிறுவர்கள் காத்திருப்புப் பட்டியலில் உள்ளதாக சீமாட்டி ரிட்ஜ்வே சிறுவர் வைத்தியசாலை தெரிவித்தது. 

வைத்தியசாலையின் இதய நோய் பிரிவின் மருத்துவ ஊழியர்கள் குழாம் நாளொன்றுக்கு 05 அறுவை சிகிச்சைகள் வீதம் மேற்கொள்ள நடவடிக்கை எடுத்துள்ளதாக, அதன் பணிப்பாளர் வைத்தியர் G.விஜேசூரிய குறிப்பிட்டார். 

மருத்துவ ஊழியர்கள் குழாம் இதற்காக மிகுந்த அர்ப்பணிப்புடன் செயற்பட்ட போதிலும், பௌதீக வளங்கள் பற்றாக்குறையினால் இதய அறுவை சிகிச்சைகளின் எண்ணிக்கையை அதிகரிக்க முடியாதுள்ளதாக அவர் கூறினார். 

இதற்கான தீர்வாக 11 மாடிகளைக் கொண்ட சிறுவர் இதய நோய் பிரிவொன்றை கொழும்பு சிறுவர் வைத்தியசாலையில் நிர்மாணிப்பதற்கான நடவடிக்கைகள் தற்போது ஆரம்பிக்கப்பட்டுள்ளன. 

இந்த நடவடிக்கைகள் எதிர்வரும் ஆண்டு நடுப்பகுதியில் நிறைவடையும் என எதிர்பார்க்கப்படுவதாக வைத்தியர் G.விஜேசூரிய குறிப்பிட்டார்.

நானுஓயா, மஹாஎலிய தோட்டத்தில், கோழியொன்று வித்தியாசமான முறையில் முட்டை இட்டுள்ளது.

K. கிருஷாந்தன் என்பவரே குறித்த கோழியை வளர்த்து வருகின்றார். 

இது தொடர்பான தகவல்கள் மற்றும் புகைப்படங்கள் சமூக வலைத்தளங்களில் பரவி வருகிறது.