தற்போது நடைமுறையில் உள்ள எரிபொருள் மானியத் திட்டம் வரும் ஜூன் மாதத்துடன் நிறைவடைய உள்ளதால், எதிர்காலத்தில் இலங்கையில் எரிபொருள் விலைகள் மீண்டும் உயரக்கூடும் என்று ஐக்கிய குடியரசு முன்னணியின் தலைவர் மற்றும் முன்னாள் அமைச்சர் சம்பிக்க ரணவக்க தெரிவித்துள்ளார்.

சர்வதேச நாணய நிதியத்துடன் (IMF) செய்யப்பட்ட ஒப்பந்தங்களின் அடிப்படையிலேயே இந்த நிலை உருவாகும் என அவர் கூறினார்.

கொழும்பில் நடைபெற்ற கூட்டு எதிர்க்கட்சியின் ஊடக சந்திப்பில் கலந்து கொண்டு பேசிய முன்னாள் மின்சக்தி மற்றும் எரிசக்தி அமைச்சர், இந்த மானியத் திட்டத்திற்காக IMF ரூ. 57 பில்லியன் ஒதுக்கியிருந்ததாக தெரிவித்தார்.

அரசியல் கட்சிகளின் விமர்சனங்கள் மற்றும் விலை ஒப்பீடுகள் குறித்தும் அவர் கருத்து வெளியிட்டார். தாம் அமைச்சராக இருந்த காலத்தில் டீசல் விலையை நிர்ணயிக்க “சிங்கப்பூர் பிளாட்ஸ்” (Singapore Platts) குறியீட்டை அடிப்படையாகக் கொண்டதாக நினைவுகூர்ந்த அவர், அப்போது மக்கள் விடுதலை முன்னணி (JVP) உறுப்பினர்கள் இணையத்தில் சிங்கப்பூரின் சாதாரண டீசல் விலையை மட்டும் பார்த்து, தாம் பொய்யாகக் கூறுவதாக குற்றம்சாட்டியதையும் சுட்டிக்காட்டினார்.

தற்போதைய சந்தை நிலவரப்படி அந்தக் குறியீடு குறைந்து கொண்டிருக்கின்ற போதிலும், இலங்கையில் டீசல் விலை ரூ. 281 ஆக இருக்க வேண்டிய சூழலில், அனுர தலைமையிலான ஆட்சியில் அது ரூ. 403 ஆக உயர்ந்த நிலையில் உள்ளது என அவர் குறிப்பிட்டார். எனவே, தற்போதைய விலை உயர்வுக்கு உலக சந்தை நெருக்கடி காரணமல்ல என்பது அவரது கருத்தாகும்.

“கோட்டாபய ஆட்சிக் காலத்தில் உக்ரைன் போர் தொடங்கியபோது, பிரென்ட் கச்சா எண்ணெய் ஒரு பீப்பாய்க்கு 139 அமெரிக்க டாலர் வரை உயர்ந்திருந்தாலும், உள்நாட்டு சந்தையில் எரிபொருள் விலை உயர்த்தப்படவில்லை. ஆனால் இன்று ஒரு பீப்பாய்க்கு சுமார் 93 டாலர் மட்டுமே இருக்கும் நிலையில் கூட விலைகள் உயர்த்தப்படுகின்றன. யுத்தக் காலத்திலும் நாட்டில் இவ்வாறான எரிபொருள் தட்டுப்பாடு ஏற்படவில்லை. இன்று டீசல், பெட்ரோல் மட்டுமல்லாமல் நிலக்கரி தொடர்பாகவும் பிரச்சினைகள் உருவாகியுள்ளன; இது ஏதோ ஒரு மோசடி நடவடிக்கையின் விளைவாக இருக்கலாம்” என்று அவர் கூறினார்.

தற்போதைய அரசையும் ஜனாதிபதியையும் கடுமையாக விமர்சித்த ரணவக்க, அரச நிர்வாகத்தை வழிநடத்த தேவையான அறிவாற்றல் மற்றும் முதிர்ச்சி ஆட்சியாளர்களிடம் இல்லை என்றும், அவர்களிடம் இருப்பது அகந்தை மட்டுமே என்றும் தெரிவித்தார்.

சமூக ஊடகங்களில் பல்வேறு கருத்துக்களை வெளியிட்டு, தவறான தகவல்களைப் பரப்பி தாங்கள் வெற்றிகரமாக செயல்படுகின்றோம் என்ற தோற்றத்தை அரசு உருவாக்க முயன்றாலும், அந்தப் பிம்பம் தற்போது சிதைந்து வருவதாகவும் அவர் கூறினார். வெளிவிவகார அமைச்சரின் அவுஸ்திரேலியா பயணத்தின் போது காணப்பட்ட காலியான இருக்கைகள் இதற்கு சான்று எனவும் அவர் குறிப்பிட்டார்.

வெளிநாடுகளில் உருவாக்கப்பட்டதாகக் கூறப்படும் “மாலிமா”வின் புகழ் பலூன் தற்போது உள்நாட்டிலும் சர்வதேச ரீதியிலும் காற்றிழந்து வருவதாக ஐக்கிய குடியரசு முன்னணித் தலைவர் மேலும் வலியுறுத்தினார்.

மத்திய கிழக்கில் நிலவி வரும் போர் சூழ்நிலையால் உலக சந்தையில் எரிபொருள் விலைகள் உயர்ந்த நிலையில் காணப்படுகின்றன. இந்நிலையில், உள்நாட்டு சந்தையில் எரிபொருள் விலையை கட்டுப்படுத்தி நிவாரணம் வழங்க முயற்சிப்பது இலங்கையின் பொருளாதாரத்தை மேலும் கடுமையான நெருக்கடிக்குள் தள்ளக்கூடும் என இலங்கை மத்திய வங்கியின் ஆளுநர் டாக்டர் நந்தலால் வீரசிங்க எச்சரித்துள்ளார்.

தெரண தொலைக்காட்சிக்கு வழங்கிய நேர்காணலில் அவர் கூறியதாவது, தற்போதைய சூழ்நிலையில் பணவீக்கத்தை கட்டுப்படுத்த கடுமையான தீர்மானங்கள் எடுக்க வேண்டிய அவசியம் உள்ளது.

ஆளுநரின் கூற்றுப்படி, முன்னர் 1.6 சதவீதமாக இருந்த பணவீக்கம் தற்போது 5.5 சதவீதமாக உயர்ந்துள்ளது. ஆரம்பத்தில் இந்தப் போர் குறுகிய காலத்திலேயே முடிவடையும் என எதிர்பார்க்கப்பட்டாலும், அது நீடித்ததன் காரணமாக சர்வதேச எண்ணெய் விலைகள் தொடர்ந்து உயர்ந்த நிலையில் உள்ளதாக அவர் தெரிவித்தார்.

“தற்போது சுமார் 5 சதவீதமாக உள்ள பணவீக்கம் எதிர்காலத்தில் 7 சதவீதம் வரை உயரக்கூடிய அபாயம் உள்ளது” என்றும் அவர் குறிப்பிட்டார்.

உலக சந்தையில் எண்ணெய் விலைகள் உயர்ந்துள்ள போதிலும், நாட்டில் எரிபொருள் பயன்பாட்டில் குறிப்பிடத்தக்க குறைவு எதுவும் காணப்படவில்லை எனவும் அவர் சுட்டிக்காட்டினார்.

கடந்த மார்ச், ஏப்ரல் மற்றும் மே மாதங்களில் இலங்கையின் இறக்குமதி செலவு தொடர்ந்து 2 பில்லியன் அமெரிக்க டொலர்களைத் தாண்டியுள்ளதாகவும், இவ்வளவு உயர்ந்த செலவில் எண்ணெயை இறக்குமதி செய்து குறைந்த விலையில் வழங்குவது பொருளாதார ரீதியாக தாங்க முடியாத ஒன்றாகும் என்றும் அவர் தெரிவித்தார்.

இலங்கை பெற்றோலிய கூட்டுத்தாபனமே தற்போதைய சூழ்நிலையை கருத்தில் கொண்டு எரிபொருள் விலை திருத்தம் செய்ய வேண்டுமென கோரிக்கை விடுத்துள்ளதாகவும் அவர் கூறினார்.

அடுத்த சில மாதங்களில் பணவீக்கம் மேலும் அதிகரிப்பதைத் தடுக்க மத்திய வங்கி ஏற்கனவே தனது நாணயக் கொள்கையை கடுமையாக்கும் நடவடிக்கைகளை மேற்கொண்டுள்ளதாகவும் அவர் தெரிவித்தார். இதன் முக்கிய நோக்கம் நாட்டில் நிலவும் தேவையை கட்டுப்படுத்துவதாகும்.

“தேவையை கட்டுப்படுத்துவதன் மூலம் பணவீக்கத்தை கட்டுப்படுத்த முயற்சிக்கிறோம். அது சாத்தியமாகவில்லை என்றால் வட்டி விகிதங்களை மேலும் உயர்த்த வேண்டிய நிலை ஏற்படும்” என டாக்டர் நந்தலால் வீரசிங்க தெரிவித்தார்.

எதிர்பார்த்ததை விட நீண்ட காலமாக எண்ணெய் விலைகள் உயர்ந்த நிலையில் தொடர்வதும், விநியோகச் சங்கிலிகளில் காணப்படும் தடைகளும் இலங்கையின் பொருளாதார மேலாண்மைக்கு புதிய சவால்களை உருவாக்கியுள்ளதாகவும் அவர் அந்த நேர்காணலில் மேலும் குறிப்பிட்டார்.

ஹோமாகம, மீகொட பகுதியில் அமைக்கப்படிருந்த 'தன்சல்' (தானப் பந்தல்) ஒன்றுக்குள் கேப் ரக வாகனமொன்று கட்டுப்பாட்டை இழந்து மோதி விபத்துக்குள்ளானதில் ஆறு பேர் பரிதாபமாக உயிரிழந்துள்ளனர்.

இந்த விபத்தில் மேலும் நால்வர் படுகாயமடைந்த நிலையில் ஹோமாகம வைத்தியசாலையில் அனுமதிக்கப்பட்டு சிகிச்சை பெற்று வருவதாக பொலிஸார் தெரிவித்துள்ளனர்.

விபத்தில் உயிரிழந்தவர்களில் மூன்று ஆண்களும், மூன்று பெண்களும் அடங்குவர்.

விபத்தை ஏற்படுத்திய கேப் வாகனத்தின் ஓட்டுநர், விபத்து இடம்பெற்ற வேளையில் மதுபோதையில் இருந்ததாக நம்பப்படும் நிலையில், அவர் பொலிஸாரால் கைது செய்யப்பட்டுள்ளார்.

இவ்விபத்து குறித்த மேலதிக விசாரணைகளை பொலிஸார் தீவிரமாக முன்னெடுத்து வருகின்றனர்.

நேற்று (30) நள்ளிரவு முதல் எரிபொருட்களின் விலை உயர்த்தப்படுகிறது.

விபரம் வருமாறு,

92 ஒக்ரெய்ன் பெற்றோல் 24 ரூபாவால் அதிகரிப்பு புதிய விலை- ரூ.434

95 ஒக்ரெய்ன் பெற்றோல் 25 ரூபாவால் அதிகரிப்பு புதிய விலை ரூ.495

ஒட்டோ டீசல் 15 ரூபாவால் அதிகரிப்பு புதிய விலை - ரூ.407

சுப்பர் டீசல் 20 ரூபாவால் அதிகரிப்பு புதிய விலை ரூ.478

மண்ணெண்ணெய் 20 ரூபாவால் அதிகரிப்பு புதிய விலை ரூ.285.

அனுராதபுரம் அட்டமஸ்தானத்தின் பிரதம சங்கநாயகர் பல்லேகம ஹேமரதன தேரர், சிறுவர் பாலியல் துஷ்பிரயோக வழக்கைத் தொடர்ந்து எழுந்துள்ள கடும் பொதுமக்கள் எதிர்ப்பை முன்னிட்டு தனது பதவியில் இருந்து விலக உள்ளதாக நம்பகமான தகவல்கள் தெரிவிக்கின்றன.

71 வயதுடைய ஹேமரதன தேரர், 14 வயது சிறுமியை பாலியல் துஷ்பிரயோகம் செய்ததாகக் கூறப்படும் குற்றச்சாட்டின் பேரில் இம்மாதம் கைது செய்யப்பட்டார்.

இவ்வழக்கில் சிறுமியின் தாயாரும் குற்றத்திற்கு உடந்தையாக இருந்ததாகக் கூறி கைது செய்யப்பட்டு வழக்குத் தொடரப்பட்டுள்ளது.

கைது செய்யப்பட்ட பின்னர், உடல்நலக்குறைவு ஏற்பட்டதாகக் கூறி அவர் பொலிஸ் பாதுகாப்பின் கீழ் மருத்துவமனையில் அனுமதிக்கப்பட்டார். பின்னர், அனுராதபுரம் நீதவான் நீதிமன்றம் இரு சந்தேகநபர்களுக்கும் பிணை வழங்கியது.

இந்த சம்பவம் நாடு முழுவதும் பெரும் சர்ச்சையையும் பொதுமக்கள் எதிர்ப்பையும் ஏற்படுத்தியுள்ளது.

நீதிமன்ற விசாரணைகள் நிறைவடையும் வரை, ருவன்வெலிசாய மகா சேயாவின் பிரதம சங்கநாயகர் ஈத்தலவெடுனாவெவ ஞானதிலக தேரர், அட்டமஸ்தானத்தின் நிர்வாகப் பொறுப்புகளையும் கடமைகளையும் தற்காலிகமாக மேற்கொள்வார் என தெரிவிக்கப்பட்டுள்ளது.