இலங்கையில் எரிபொருள் விலையை உயர்த்தாமல் வைத்திருக்க அரசு கடுமையான நிதிச் சுமையை ஏற்றுக்கொண்டு வருவதாக போக்குவரத்து துணை அமைச்சர் பிரசன்ன குணசேகர  தெரிவித்துள்ளார்.

அவர் கூறியதாவது, நாட்டில் எரிபொருள் பயன்பாட்டின் பெரும்பங்கு தற்போது தனியார் துறையின் மூலம் நடைபெறுகிறது. இழப்பில் வியாபாரம் செய்ய தனியார் துறை முன்வராததால், தற்போதைய நிலைமையில் எரிபொருள் விலையை ரூ.140 முதல் ரூ.200 வரை உயர்த்த வேண்டும் என அவர்கள் கோரிக்கை விடுத்துள்ளதாக தெரிவித்தார்.

எனினும், அரசு மற்றும் தனியார் துறை இணைந்து அந்த சுமையை பகிர்ந்து கொண்டு, மக்களுக்கு சலுகை விலையில் எரிபொருள் வழங்க நடவடிக்கை எடுத்து வருவதாகவும் அவர் குறிப்பிட்டார்.

இதன்படி, தற்போது ஒரு லிட்டர் டீசலுக்கு ரூ.100 மற்றும் ஒரு லிட்டர் பெற்றோலுக்கு ரூ.20 இழப்பை அரசு ஏற்றுக்கொண்டு வருகிறது. இந்த சலுகை காரணமாக, மாதந்தோறும் அரசுக்கு சுமார் ரூ.20 பில்லியன் இழப்பு ஏற்படுகிறது என்றும் அவர் தெரிவித்தார்.

மேலும், போர் நிலைமை எப்போது முடிவடையும் என்பது தெளிவாக இல்லாததால், உலக சந்தையில் எண்ணெய் விலை உயர்ந்து கொண்டிருக்கும் நிலையில், இந்த இழப்பை தொடர்ந்து சுமந்து செல்லுவது சவாலானதாக உள்ளது என்றும் அவர் வலியுறுத்தினார்.

நாட்டில் நிலவும் உஷண்மான வானிலை தொடர்ந்தும் நிலவுமென எதிர்பார்க்கப்படுவதாக, வளிமண்டலவியல் திணைக்களம் எதிர்வுகூறியுள்ளது.

இன்றையதினம் (30) நாட்டின் மேல், சப்ரகமுவ, வடமேல் மாகாணங்களிலும் காலி, மாத்தறை மாவட்டங்களில் சில இடங்களில் பி.ப. 2.00 மணிக்குப் பின்னர் மழை அல்லது இடியுடன் கூடிய மழை பெய்யக் கூடிய சாத்தியம் காணப்படும். 

நாட்டின் ஏனைய பிரதேசங்களில் பிரதானமாக வரண்ட வானிலை நிலவும் என எதிர்பார்க்கப்படுகின்றது.

மத்திய, சப்ரகமுவ மாகாணங்களிலும் காலி, மாத்தறை மாவட்டங்களிலும் சில இடங்களில் அதிகாலை வேளையில் பனிமூட்டமான நிலை காணப்படும் என எதிர்பார்க்கப்படுகின்றது.

இடியுடன் கூடிய மழை பெய்யும் போது தற்காலிகமாக பலத்த காற்று மற்றும் மின்னலால் ஏற்படும் சேதங்களைக் குறைக்க உரிய முன்னெச்சரிக்கை நடவடிக்கைகளை எடுக்குமாறு பொதுமக்கள் கேட்டுக் கொள்ளப்படுகிறார்கள்.

மத்திய கிழக்கு போரில் அமெரிக்க இராணுவ வீரரான விசாகன் சத்தியமூர்த்தி என்ற தமிழ் இராணுவ வீரரும் கொல்லப்பட்டுள்ளார்.

ஈரான், இஸ்ரேல் மற்றும் அமெரிக்கா இடையே கடந்த பெப்ரவரி மாதம் 28ஆம் திகதி ஆரம்பமான போர் இன்று ஒரு மாதம் கடந்தும் தொடர்ந்து நடைபெறுகின்றது.

இந்தப் போரில் முக்கிய தலைவர்கள், இராணுவ வீரர்கள், பொதுமக்கள் உள்ளிட்ட ஆயிரக்கணக்கானோர் உயிரிழந்துள்ளனர்.

இந்நிலையில் 1993 ஆம் ஆண்டு மே மாதம் 10 ஆம் திகதி அமெரிக்க இராணுவத்தில் இணைந்த விசாகன் சத்தியமூர்த்தி கடந்த 21 ஆம் திகதி மத்திய கிழக்கு யுத்தத்தில் உயிரிழந்துள்ளார்.

இவருடைய இறுதி கிரியைகள் ஏப்ரல் 2ஆம் திகதி மதியம் 1.00 மணியளவில் 950 S Sepulveda Blvd, Los Angeles, CA 90049, United States என்ற முகவரியில் அமைந்துள்ள Los Angels National Cemetory யில் நடைபெறவுள்ளதாக அறிவிக்கப்பட்டுள்ளது.

இந்நிலையில் அமெரிக்க இராணுவ வீரர்களால் இறுதி இராணுவ மரியாதையும் செலுத்தப்படவுள்ளது.

மத்திய கிழக்கு போரில் கொல்லப்பட்ட முதல் தமிழ் அமெரிக்க இராணுவ வீரர் இவர் என்பது குறிப்பிடத்தக்கது.

இலங்கையில் திட்டமிட்ட குற்றச் செயல்களில் ஈடுபட்டு வந்த முக்கிய நபரான பிரபாத் மதுசங்க என்ற மிதிகம சூட்டி இன்று (30) அதிகாலை ஓமானில் இருந்து இலங்கைக்கு அழைத்து வரப்பட்டார்.

சர்வதேச பொலிஸாரால் 'சிவப்பு அறிவித்தல்' பிறப்பிக்கப்பட்டிருந்த இவர், ஓமான் பாதுகாப்புப் பிரிவினரால் அண்மையில் கைது செய்யப்பட்டார்.

இவரைக் பொறுப்பேற்பதற்காக குற்றப்புலனாய்வுத் திணைக்களத்தின் (CID) மூன்று அதிகாரிகள் ஓமானுக்குச் சென்றிருந்தனர்.

அதிகாரிகளுடன் இன்று அதிகாலை 4.27 மணிக்கு ஓமானின் மஸ்கட் நகரில் இருந்து சலாம் எயார் (OV-437) விமானம் மூலம் அவர் கட்டுநாயக்க சர்வதேச விமான நிலையத்தை வந்தடைந்தார்.

போதைப்பொருள் கடத்தல் மற்றும் திட்டமிட்ட குற்றச் செயல்களுடன் தொடர்புடைய பல வழக்குகள் இவர் மீது நிலுவையில் உள்ளன.

இலங்கையில் இருந்து தப்பிச் சென்றிருந்த நிலையில், சர்வதேச பொலிஸாரின் உதவியுடன் ஓமானில் வைத்து மடக்கிப் பிடிக்கப்பட்டார்.

தற்போது இலங்கைக்கு அழைத்து வரப்பட்டுள்ள சந்தேகநபரைக் மேலதிக விசாரணைகளுக்காக குற்றப்புலனாய்வுத் திணைக்களத்தினர் தமது பொறுப்பில் எடுத்துள்ளனர். விசாரணைகளின் பின்னர் அவர் நீதிமன்றத்தில் ஆஜர்படுத்தப்படவுள்ளார்.

எதிர்வரும் ஏப்ரல் 1ஆம் திகதி முதல் சிங்கள-தமிழ் புத்தாண்டு காலத்தை முன்னிட்டு விசேட பாதுகாப்பு நடவடிக்கை திட்டம் ஆரம்பிக்கப்படவுள்ளதாக இலங்கை பொலிஸார் அறிவித்துள்ளது.

இதுகுறித்து போக்குவரத்து கட்டுப்பாடு மற்றும் சாலை பாதுகாப்பு தொடர்பான பிரதிப் பொலிஸ் மா அதிபர் டபிள்யூ. பி. ஜே. சேனாதீர தெரிவித்ததாவது, புத்தாண்டு காலத்தில் மக்களின் பயணம் அதிகரிப்பதை கருத்தில் கொண்டு, போக்குவரத்து பொலிஸாரும் பாதுகாப்பு அதிகாரிகளும் அதிக அளவில் பணியில் ஈடுபடுத்தப்படவுள்ளனர்.

மேலும், கொழும்பு உள்ளிட்ட முக்கிய நகரங்களில் உள்ள ரயில் நிலையங்கள் மற்றும் பிரதான பேருந்து நிலையங்களை மையமாகக் கொண்டு போக்குவரத்து கட்டுப்பாட்டு மற்றும் பாதுகாப்பு திட்டங்கள் நடைமுறைப்படுத்தப்படும் என்றும் தெரிவிக்கப்பட்டுள்ளது.

அவர் மேலும் குறிப்பிட்டதாவது, புத்தாண்டை முன்னிட்டு கிராமங்களுக்கு செல்லும் பொதுமக்கள் மற்றும் நகரங்களுக்கு பொருட்கள் வாங்க வரும்வர்கள் அதிகரிப்பதால், அதனை சமாளிக்க சிறப்பு திட்டங்கள் அமல்படுத்தப்பட உள்ளன.

எரிபொருள் விலை ரூ.5000 வரை உயர்ந்தாலும்,தேசிய மக்கள் சக்திக்கு தாம் வழங்கும் ஆதரவை எந்த விதத்திலும் திரும்பப் பெறமாட்டேன் என ராஜாங்கனே சத்தாரதன தேரர் தெரிவித்துள்ளார்.

தாம் மாலிமாவுடன் இணைந்தது, நாட்டில் நிலவிய ஊழல் அரசியலை நிராகரித்ததாலேயே அன்றி, எந்த தனிப்பட்ட நோக்கத்திற்காகவும் அல்ல என அவர் வலியுறுத்தினார்.

தமது சமூக ஊடகக் கணக்கின் மூலம் வெளியிட்ட காணொளியில்,

“எரிபொருள் விலை 5000 ஆக உயர்ந்தாலும் நாங்கள் மாலிமாவுடன் தான் இருப்போம். ஊழல் அரசியல் வெறுத்ததால் தான் மாலிமாவுடன் சேர்ந்தோம். திரும்பிச் செல்ல அல்ல, முழு மனதுடன் ஆதரிக்கத்தான் வந்தோம்” என அவர் தெரிவித்துள்ளார்.

மேலும், தாம் அரசியலில் ஈடுபடுவது ஜனாதிபதி அல்லது அமைச்சர்களுடன் ‘செல்ஃபி’ எடுக்கவோ, தனிப்பட்ட பலன்களைப் பெறவோ அல்ல என்றும், அரசாங்கத்திடமிருந்து ஒரு சொட்டு தண்ணீரையும் எதிர்பார்ப்பதில்லை என்றும் அவர் குறிப்பிட்டார்.

மாலிமாவுக்கு ஆதரவு வழங்கினாலும், அரசு நாட்டை சரியான பாதையில் முன்னேற்றவில்லை என்றால் அதையும் விமர்சிக்கத் தயங்கமாட்டேன் எனவும், ஊழல் குழுக்களுக்கு மீண்டும் இந்த நாட்டை சீரழிக்க இடமளிக்கமாட்டோம் எனவும் அவர் மேலும் தெரிவித்தார்.

நாட்டில் தற்போதைய அனைத்து துறைகளும் எதிர்கொண்டு வரும் கடுமையான பொருளாதார நெருக்கடியின் பின்னணியில் பல பொருட்களின் விலைகள் அதிகரித்து வருகின்றன.

இத்தகைய சூழ்நிலையில், எரிபொருள் விலை உயர்வின் தாக்கத்தால் எதிர்காலத்தில் மதுபானங்களின் விலைகளிலும் மாற்றம் ஏற்படலாம் என்ற கருத்துக்கள் சமூகத்தில் பரவலாக பேசப்பட்டு வருகின்றன.

இதுகுறித்து மதுபான உற்பத்தியாளர்கள் தெரிவிப்பதாவது, எரிபொருள் விலை அதிகரித்துள்ளதால் மதுபான விலையை உயர்த்த வேண்டிய நிலை உருவாகியுள்ளதாலும், விலையை அதிகரித்தால் தற்போது நிலவும் விற்பனைக்கு பாதிப்பு ஏற்படும் அபாயம் உள்ளதாகும்.

எனவே, இதுவரை மதுபான விலை உயர்வு குறித்து எந்தத் தீர்மானமும் எடுக்கப்படவில்லை என்றும் மேலும் தகவல்கள் தெரிவிக்கின்றன.