ஜனாதிபதி அனுர குமார திஸாநாயக்க பாராளுமன்ற உறுப்பினர்களின் ஓய்வூதியத்தை ரத்து செய்யும் சட்டத்தை, தமக்கு இரண்டு ஓய்வூதியங்கள் கிடைக்கும் வகையில் உருவாக்கியுள்ளதாக, முன்னாள் அமைச்சர் மற்றும் ஜனாதிபதி சட்டத்தரணி விஜயதாச ராஜபக்ஷ குற்றம் சாட்டியுள்ளார்.

“தற்போதைய ஜனாதிபதி, பாராளுமன்ற உறுப்பினர்களின் ஓய்வூதியத்தை ரத்து செய்யும் புதிய சட்டத்தை கொண்டு வந்துள்ளார். ஆனால் அந்தச் சட்டம், அவருடைய இரண்டு ஓய்வூதியங்களையும் பாதுகாக்கும் விதத்தில் தயாரிக்கப்பட்டுள்ளது என்பது தெளிவாகத் தெரிகிறது.

புதிய சட்டத்தின் படி, ஒருவர் ஜனாதிபதியாக ஐந்து நாட்கள் கூட பணியாற்றினால், அவருக்கு அதற்கான ஓய்வூதியம் வழங்கப்படும். அதற்கு மேலாக, அவர் ஏற்கனவே பாராளுமன்ற உறுப்பினராக ஓய்வு பெற்றவர் என்பதால், அந்த ஓய்வூதியமும் அவருக்கு கிடைக்கும்.

இதன்படி பார்க்கும் போது, இரண்டு ஓய்வூதியங்கள் அனுர குமார திஸாநாயக்க ஜனாதிபதிக்கு மட்டுமல்ல, பாராளுமன்றத்தில் ஐந்து ஆண்டுகள் பணியாற்றி பின்னர் ஜனாதிபதியாக ஆன அனைவருக்கும் வழங்கப்படும் நிலை உருவாகியுள்ளது” என அவர் தெரிவித்துள்ளார்.

கொழும்பில் நடைபெற்ற ஊடக சந்திப்பொன்றில் கலந்து கொண்டு, விஜயதாச ராஜபக்ஷ இதனை தெரிவித்தார்.

நாட்டின் பிற மாகாணங்களுடன் ஒப்பிடுகையில், வடக்கு மற்றும் கிழக்கு மாகாணங்களுக்கும் அங்கு வாழும் மக்களுக்கும் சிறப்பு நியாயம் வழங்கப்பட வேண்டும் என அரசு நம்புவதாக அமைச்சர் சுனில் ஹந்துன்னெத்தி தெரிவித்துள்ளார்.

அந்த மாகாணங்களில் பொருளாதாரத்தை நாட்டின் பிற பகுதிகளை விட வேகமாக திறக்க வேண்டிய அவசியம் உள்ளது என்றும், அதுவே நியாயமும் சமத்துவமும் நிலைநாட்டும் செயல்முறையின் ஒரு பகுதியாகும் என்றும் அமைச்சர் வலியுறுத்தினார்.

மேலும், வடக்கு மாகாணத்தில் பல தொழிற்துறை முயற்சிகள் தொடங்கப்படும் என்றும், உலகம் முழுவதும் உள்ள முதலீட்டாளர்களையும், இலங்கைத் தமிழர் டயஸ்போராவையும் முதலீட்டிற்கு அழைக்கப்படுவதாக அமைச்சர் சுனில் ஹந்துன்னெத்தி தெரிவித்தார்.

பரந்தன் இரசாயன தொழிற்சாலையை திறக்கும் நிகழ்வில் கலந்து கொண்டு உரையாற்றிய போது அவர் இதனை கூறினார்.

தனியார் துறையிலும் அரை அரசுத் துறையிலும் பணியாற்றும் ஊழியர்களுக்கு ஓய்வூதியம் வழங்குவது தொடர்பாக அரசாங்கம் கவனம் செலுத்தி வருவதாக தொழில் துறை பிரதி அமைச்சர் மகிந்த ஜயசிங்க தெரிவித்தார்.

இன்று (23) பாராளுமன்றத்தில் உரையாற்றும் போது அவர் இதனை கூறினார்.

“EPF மற்றும் ETF ஆகிய இரு நிதிகளுக்கிடையிலான வேறுபாட்டை நான் மிகவும் தெளிவாக விளக்கியிருந்தேன். EPF நிதியை ஓய்வூதியமாக மாற்றுவதாக நான் எங்கும் கூறவில்லை. நான் கூறிய கருத்து தவறான விதத்தில் புரிந்துகொள்ளப்பட்டது. EPF என்பது சமூக பாதுகாப்பிற்காக உருவாக்கப்பட்ட நிதி. தனியார் துறைக்கும் அரை அரசுத் துறைக்கும் ஓய்வூதியம் வழங்குவது தொடர்பாகவே அரசாங்கம் கவனம் செலுத்தி வருகிறது. EPF நிதியை ஓய்வூதியமாக மாற்றுவதாக நான் கூறவில்லை” என அவர் வலியுறுத்தினார்.

பாராளுமன்ற உறுப்பினர்களின் ஓய்வூதியத்தை இரத்து செய்வது தொடர்பில், முன்னாள் சபாநாயகர் கரு ஜயசூரிய ஜனாதிபதி அநுர குமார திசாநாயக்கவுக்கு கடிதம் ஒன்றை அனுப்பியுள்ளார். 

முன்னாள் பாராளுமன்ற உறுப்பினர்கள் சங்கத்தின் சார்பில், அதன் ஆலோசகர் என்ற ரீதியிலேயே அவர் இந்தக் கடிதத்தை ஜனாதிபதிக்கு அனுப்பியுள்ளார். 

அக்கடிதத்தில் அவர் தெரிவித்துள்ளதாவது, 

நாடு சுதந்திரம் பெற்ற காலத்தில், அரசியல் என்பது நில உரித்துடையோருக்கும், படித்த மற்றும் செல்வந்த உயர்குடியினருக்கும் மட்டுமே மட்டுப்படுத்தப்பட்டிருந்தது. 

எனினும், 1956ஆம் ஆண்டுக்குப் பின்னர் சாதாரண பொதுமக்களுக்கும் அரசியலில் வாய்ப்பு கிடைத்ததால் பாரிய சமூக மாற்றம் ஏற்பட்டது. 

பாராளுமன்ற உறுப்பினர்களின் ஓய்வூதியத்தை நீக்குவது போன்ற நடவடிக்கைகள் எடுக்கப்பட்டால், அரசியல் என்பது செல்வந்தர்கள், வர்த்தகர்கள், முறையற்ற வகையில் பணம் சம்பாதிப்பவர்கள் மற்றும் செல்வந்த அரசியல் கட்சிகளுக்கு மட்டுமே மட்டுப்படுத்தப்படும். 

இதன் காரணமாக, நேர்மையான சமூக சேவகர்கள் அரசியல் துறைக்கு வருவது தடைப்படும் என முன்னாள் சபாநாயகர் சுட்டிக்காட்டியுள்ளார். 

மேலும், தாமும் மற்றும் ஒரு சிலரும் மாத்திரமே இந்த ஓய்வூதியத்தை சமூக மற்றும் தொண்டு நிறுவனங்களுக்குப் பயன்படுத்துவதாகவும், ஆனால் பெரும்பான்மையான உறுப்பினர்கள் இந்த ஓய்வூதியத்தை நம்பியே வாழ்வதாகவும் அவர் குறிப்பிட்டுள்ளார். 

எதிர்காலத்தில் புதிய அரசியலமைப்பை உருவாக்க அரசாங்கம் உத்தேசித்துள்ளதால், அந்த சந்தர்ப்பத்தில் இவ்விடயம் குறித்து கவனம் செலுத்தி தகுந்த நடவடிக்கை எடுக்குமாறு கரு ஜயசூரிய ஜனாதிபதியிடம் கோரிக்கை விடுத்துள்ளார்.

வங்காள விரிகுடாவில் இலங்கைக்கு தென்கிழக்கு திசையில் சிறிய அளவிலான வளிமண்டல மேலடுக்கு சுழற்சி உருவாகி, இந்த சுழற்சி தற்போது வடக்கு, வடமேற்கு திசை நோக்கி நகர்ந்து வருகின்றது.

இதனால் இன்று முதல் எதிர்வரும் 27ஆம் திகதிவரை வடக்கு, கிழக்கு, ஊவா, மத்திய, மேற்கு மற்றும் வடமத்திய மாகாணங்களில் கனமழை பெய்ய வாய்ப்புள்ளதாக யாழ்ப்பாண பல்கலைக்கழக புவியியல் துறையின் சிரேஷ்ட விரிவுரையாளர் நாகமுத்து பிரதீபராஜா எதிர்வுகூறியுள்ளார்.

மேற்படி மாகாணங்களில் பரவலாக மிதமானது முதல் சற்றுக் கனமானதுமான மழை பெய்ய வாய்ப்புள்ளதாகத் தெரிவித்த அவர், நெல் அறுவடைச் செயற்பாடுகளில் ஈடுபடும் விவசாயிகள் மற்றும் நெல் உலர விடும் விவசாயிகள், எதிர்வரும் மழை நாட்களைகருத்தில் கொண்டு தகுந்த திட்டமிடலுடன் செயல்படுவது அவசியம் எனவும் குறிப்பிட்டார்.

இதேவேளை தற்போது வடக்கு, கிழக்கு மாகாணங்கள் உட்பட நாட்டின் பல பகுதிகளில் மாலை மற்றும் இரவு நேரங்களில் நிலவும் குளிரான நிலைக்கு காரணமான குறைந்த வெப்பநிலை எதிர்வரும் 27ஆம் திகதிவரை சற்று உயர்வடையும் எனவும் எதிர்பார்க்கப்படுகிறது.

ராஜகிரிய, ஒபேசேகரபுர, அருணோதய மாவத்தையில் 300 வீட்டு அலகுகளை நிர்மாணிக்கும் திட்டத்தை செயல்படுத்த அமைச்சரவை ஒப்புதல் வழங்கியுள்ளது.

ஆசிய உட்கட்டமைப்பு முதலீட்டு வங்கியின் அமெரிக்க டொலர் 200 மில்லியன் கடன் உதவியின் கீழ் 4,074 வீட்டு அலகுகளை நிர்மாணிக்கும் திட்டத்தில் அடங்கிய 06 துணைத் திட்டங்களில் ஒன்றாக, ராஜகிரிய, ஒபேசேகரபுர, அருணோதய மாவத்தையில் 300 வீட்டு அலகுகளை நிர்மாணிக்கும் இந்த துணைத் திட்டத்திற்கு, 2020-03-04 அன்று நடைபெற்ற அமைச்சரவை கூட்டத்தில் ஒப்புதல் வழங்கப்பட்டிருந்தது.

அந்த திட்டத்தின் ஒப்பந்தக்காரரின் பலவீனமான செயல்திறன் காரணமாக, சம்பந்தப்பட்ட ஒப்பந்தம் ரத்து செய்யப்பட்டதுடன், திட்டத்தை மீண்டும் செயல்படுத்துவதற்காக பொருத்தமான ஒப்பந்தக்காரரைத் தேர்ந்தெடுக்கும் நோக்கில் தேசிய போட்டித் டெண்டர் முறையின் கீழ் டெண்டர்கள் அழைக்கப்பட்டுள்ளன.

இதற்கமைய பெறப்பட்ட 06 டெண்டர்களை உயர் மட்ட நிலையான கொள்முதல் குழு (Procurement Committee) பரிசீலித்து வழங்கிய பரிந்துரைகளின் அடிப்படையில், ராஜகிரிய, ஒபேசேகரபுர, அருணோதய மாவத்தையில் 300 வீட்டு அலகுகளை நிர்மாணிக்கும் திட்டத்தை செயல்படுத்தும் ஒப்பந்தத்தை ஒரு தனியார் நிறுவனத்திற்கு வழங்குவதற்காக போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் முன்வைத்த யோசனையை அமைச்சரவை அங்கீகரித்துள்ளது.

நிட்டம்புவ, பின்னகொல்ல பகுதியில் முன்னெடுக்கப்பட்ட விசேட நடவடிக்கையின் போது, 61 கி.கி இற்கும் அதிக எடையுடைய ‘ஐஸ்’ (Crystal Methamphetamine) போதைப்பொருளுடன் நபர் ஒருவர் கைது செய்யப்பட்டுள்ளார்.

கோணஹேன விசேட அதிரடிப்படை (STF) முகாமிற்கு கிடைத்த இரகசிய தகவலொன்றின் அடிப்படையில் இந்த சுற்றிவளைப்பு மேற்கொள்ளப்பட்டது.

சந்தேகநபர் தனது முச்சக்கர வண்டியில் 61 கி.கி 838 கிராம் எடையுடைய போதைப்பொருளைக் கடத்திச் சென்ற போதே விசேட அதிரடிப்படையினரால் மடக்கிப் பிடிக்கப்பட்டார்.

கைப்பற்றப்பட்ட இந்த போதைப்பொருட்களின் பெறுமதி சுமார் ரூ. 90 கோடி என மதிப்பிடப்பட்டுள்ளதுடன், கடத்தலுக்குப் பயன்படுத்தப்பட்டமுச்சக்கர வண்டியும் பொலிஸாரால் பறிமுதல் செய்யப்பட்டது.

சம்பவம் தொடர்பில் விசாரணைகளின் மூலம், கைது செய்யப்பட்ட நபர் தற்போது வெளிநாடுகளில் தலைமறைவாக இருக்கும் “துபாய் வருண்” (Dubai Varun) மற்றும் மொஹமட் சித்திக் (Mohammed Siddiq), அத்துடன் தற்போது சிறைத்தண்டனை அனுபவித்து வரும் “லெனா” (Lena) எனப்படும் திலிந்து சஞ்சீவ போன்ற ஒழுங்கமைக்கப்பட்ட குற்றவாளிகள் மற்றும் போதைப்பொருள் கடத்தல்காரர்களுடன் நெருங்கிய தொடர்புகளைப் பேணி வந்துள்ளார் என்பது தெரியவந்துள்ளது.

கிரீன்லாந்து தொடர்பாக அமெரிக்காவிற்கும் – ஐரோப்பாவிற்கும் இடையே நிலவும் இராஜதந்திர நெருக்கடி தீவிரமடைந்துள்ள நிலையில், உலக சந்தையில் தங்கத்தின் விலை இன்று (21) முன்னெப்போதும் இல்லாத வகையில் உயர்வடைந்துள்ளது.

இதன்படி, ஒரு அவுன்ஸ் தங்கத்தின் விலை 4,800 அமெரிக்க டொலர்களைக் கடந்து புதிய உலக சாதனையைப் படைத்துள்ளது.

இந்த அரசியல் ஸ்திரமற்ற நிலை தொடருமானால், வரும் நாட்களில் தங்கத்தின் விலை 5,000 டொலர் எல்லையை எட்டக்கூடும் என பொருளாதார ஆய்வாளர்கள் எதிர்வு கூறியுள்ளனர்.