kumar
உலக சந்தையில் தங்கத்தின் விலை வரலாற்றில் முதல் முறையாக 5,000 அமெரிக்க டொலர் எல்லையை கடந்துள்ளது.
ஒரு அவுன்ஸ் தங்கத்தின் விலை 5,024.95 அமெரிக்க டொலர்கள் வரை வரலாற்று ரீதியாக அதிகரித்துள்ளதாக வெளிநாட்டு ஊடகங்கள் செய்தி வெளியிட்டுள்ளன.
இதற்கிடையில், தங்கத்தின் விலை மேலும் உயர்வடையக்கூடும் எனவும், இவ்வருட இறுதிக்குள் அது 5,500 டொலரை தாண்டும் எனவும் நிபுணர்கள் கருத்து வெளியிட்டுள்ளனர்.
அத்துடன், இதற்கு இணையாக ஏனைய உலோகங்களின் விலைகளும் அதிகரித்துள்ளதுடன், அதற்கமைய ஒரு அவுன்ஸ் வெள்ளியின் விலை 1.74% இனால் அதிகரித்து 107.72 அமெரிக்க டொலர்களாக பதிவாகியுள்ளது.
மேலும், ஒரு அவுன்ஸ் பெலேடியத்தின் (Palladium) விலை 0.17% இனால் அதிகரித்து 2,013.50 அமெரிக்க டொலர்களாகவும் பதிவாகியுள்ளது.
நுகர்வோர் விவகார ஆணையத்தின் பிரதான அலுவலக விசாரணைப் பிரிவிற்கு கிடைத்த தகவலின் அடிப்படையில் மேற்கொள்ளப்பட்ட திடீர் சோதனையின்போது, கட்டுப்படுத்தப்பட்ட விலையை விட அதிக விலையில் குடிநீர் பாட்டில்களை விற்பனை செய்த நபர் ஒருவர் கைது செய்யப்பட்டுள்ளார்.
இந்த சோதனையின் போது, ரூபாய் 70 என்ற கட்டுப்படுத்தப்பட்ட விலை நிர்ணயிக்கப்பட்ட 500 மில்லி லிட்டர் கொள்ளளவு கொண்ட குடிநீர் பாட்டில்கள் 4, ரூபாய் 90 மற்றும் ரூபாய் 100 என்ற அதிக விலையில் விற்பனை செய்யப்பட்டுள்ளதாக தெரிய வந்துள்ளது.
இதனைத் தொடர்ந்து கைது செய்யப்பட்ட கொழும்பு பகுதியிலுள்ள பிரபல வர்த்தக நிலையத்தின் உரிமையாளருக்கு, கொழும்பு மேலதிக மகிஸ்திரேட் எச்.டி.டி.ஜே. பிரேமரத்ன அவர்களால் ரூபாய் 5 இலட்சம் அபராதம் விதிக்க உத்தரவிடப்பட்டது.
2003 ஆம் ஆண்டு இலக்கம் 09 கொண்ட நுகர்வோர் விவகார ஆணையச் சட்டத்தின் 20(5) மற்றும் 68 ஆகிய பிரிவுகளின் கீழும், 2021 ஆம் ஆண்டு இலக்கம் 20 கொண்ட திருத்தச் சட்டத்தின் 60(4A) பிரிவின் கீழும் குறித்த சந்தேகநபர் குற்றம் செய்துள்ளதாக விசாரணை அதிகாரிகள் நீதிமன்றத்திற்கு தெரிவித்தனர்.
கட்டுப்படுத்தப்பட்ட விலையை விட அதிக விலையில் குடிநீர் பாட்டில்களை விற்பனை செய்வதைத் தடைசெய்து அரசிதழ் அறிவிப்பு வெளியிடப்பட்டுள்ள நிலையில், அதனை மீறி விற்பனை நடைபெறுவதாக தகவல்கள் கிடைத்துள்ளதால், இவ்வாறான வர்த்தக நிலையங்கள் தொடர்பாக விரைவான நடவடிக்கைகள் மேற்கொள்ளப்படும் என்றும் விசாரணை அதிகாரிகள் நீதிமன்றத்தில் தெரிவித்தனர்.
தனியார் மேலதிக பாட வகுப்பு ஆசிரியர்களின் செயல்பாடுகள் குறித்து எழும் விமர்சனங்களை கருத்தில் கொண்டு, அந்தத் துறைக்காக ஒரு முறையான சட்டபூர்வ கட்டமைப்பை அறிமுகப்படுத்த அரசாங்கம் தீர்மானித்துள்ளதாக தகவல்கள் தெரிவிக்கின்றன.
இந்த சட்டபூர்வ கட்டமைப்புக்கான ஆரம்ப கட்ட நடவடிக்கையாக, முன்மொழியப்பட்ட யோசனைத் தொகுப்பு விரைவில் அமைச்சரவையின் ஒப்புதலுக்காக சமர்ப்பிக்கத் தயாராக இருப்பதாகவும் தகவல்கள் தெரிவிக்கின்றன.
மேலும், சில ஆசிரியர்களின் அநாகரிகமான நடத்தை மற்றும் சமீப காலத்தில் புகழ்பெற்ற எழுத்தாளர் மார்டின் விக்ரமசிங்கர் போன்ற மதிப்பிற்குரிய ஆளுமைகளை குறிவைத்து மேற்கொள்ளப்பட்ட பொது அவமதிப்பான கருத்துகள் இந்தத் தீர்மானத்திற்கு முக்கிய காரணங்களாக அமைந்துள்ளன எனவும் தெரிவிக்கப்படுகிறது.
இதன் அடிப்படையில், மாணவர் சமூகத்துக்கும் கலாச்சாரத்துக்கும் தீங்கு விளைவிக்கும் வகையில் செயல்படும் ஆசிரியர்களை கட்டுப்படுத்தும் நோக்கில், கடுமையான நிபந்தனைகள் அடங்கிய புதிய விதிமுறை அமைப்பு எதிர்வரும் காலத்தில் அமல்படுத்தப்படும் என குறிப்பிடப்படுகிறது.
நல்லாட்சி காலத்தில் நடைபெற்றதாகக் கூறப்படும் பத்திரப் பிணை (Bond) மோசடியில் இருந்து பெறப்பட்ட பணத்தின் ஒரு பகுதி மக்கள் விடுதலை முன்னணிக்கும் (JVP) வழங்கப்பட்டதாக ஊடகவியலாளர் உவிந்து குருகுலசூரிய தெரிவித்துள்ளார்.
அந்த காலத்தில் முன்னாள் மத்திய வங்கி ஆளுநர் அர்ஜுன மகேந்திரனுடன் சமீபத்தில் தொலைபேசி உரையாடல் ஒன்றையும் மேற்கொண்டிருந்த குருகுலசூரிய, இந்த குறிப்பை தனது சமூக ஊடகக் கணக்கில் பதிவிட்டுள்ளார்.
“நான் இலங்கையில் பெரிய அளவில் திருட்டில் ஈடுபட்டதாக குற்றம் சாட்டப்படும் நபர்களுடன் பழகியிருக்கிறேன்; இன்றும் பழகிக்கொண்டே இருக்கிறேன். ஆனால் அந்த நபர்களை எந்த நீதிமன்றமும் இதுவரை குற்றவாளிகளாக அறிவிக்கவில்லை. அவர்களுடன் பழகியதில் நான் கற்றுக் கொண்டது என்னவென்றால்;
‘திருட வேண்டும் என்றால், சட்ட மா அதிபர் துறை கட்டிடம், உச்ச நீதிமன்ற கட்டிடம் மற்றும் இலங்கையெங்கும் பரவி இருக்கும் நீதிமன்றக் கட்டிடங்களின் சந்தை மதிப்பை விட கூட அதிகமாகத் திருட வேண்டும்’ என்பதே.
அப்படிச் செய்தால் தான் வழக்குகளை ஒத்திவைத்துக் கொண்டு மரணிக்கும் வரை வாழ முடியும்.
நாமல் போன்றவர்கள் பெரிய பெரிய பேச்சுகள் பேசுவது அதற்காகத்தான்.
நான் இலங்கையிலும் மற்றொரு நாட்டிலும் ஊழல் தொடர்பாக ஊடகவியலாளர்களுக்கும் சிவில் சமூக தலைவர்களுக்கும் பயிற்சி அளிக்கும் மொட்யூல்களை உருவாக்குவதில் பங்கேற்ற ஒருவராக இதைச் சொல்கிறேன். இலங்கை போன்ற ஒரு நாட்டிற்கு அந்த நபர்களை கைது செய்யும் சக்தியும் திறனும் இல்லை. தேர்தல் மேடைகளில் பேசப்படும் கோஷங்களும் கடுமையான வார்த்தைகளுமே உள்ளன.
இப்போது அனுரவைச் சுற்றியும், ஒரு அரசையே வாங்கக்கூடியவர்கள் நண்பர்களாக எத்தனை பேர் இருக்கிறார்கள்?
உதாரணமாகச் சொன்னால், அர்ஜுன மகேந்திரனை மத்திய வங்கி ஆளுநராக நியமித்து ரணில் இரு முறை பத்திர மோசடி செய்தது மைத்திரிபால சிறிசேனவின் ஜனாதிபதி தேர்தலுக்காக பெற்ற கடனை அடைப்பதற்காகவும், இரண்டாவது பத்திர மோசடி பொதுத் தேர்தலுக்காக பணம் திரட்டுவதற்காகவும் தான். அந்த பணத்தின் ஒரு பகுதி ஜே.வி.பி-க்கும் சென்றது.
ஜனாதிபதி ஆணைக்குழுவில் இருந்த முன்னாள் உறுப்பினர்கள், இந்த பத்திர மோசடி குறைந்தது 2007 ஆம் ஆண்டிலிருந்தே நடைபெற்று வந்துள்ளதாகவும், அதற்கு ஒரு ஃபோரென்சிக் ஆடிட் நடத்த வேண்டும் என்றும் கூறியிருந்தனர்.
ஆனால் சிறிசேன அதை செய்யவில்லை, கோட்டாபய அதைக் செய்யவில்லை, ரணில் ஜனாதிபதியாக இருந்தபோதும் அதைக் செய்யவில்லை. ஏன் அனுரா அவர்களோ அல்லது தற்போதைய ஆட்சியோ இப்போது அந்த விசாரணையை நடத்தவில்லை? அதுவே எனக்கு இருக்கும் முக்கியமான கேள்வி.
மீதியதை பின்னர் எழுதுகிறேன்!”
பேராயர் கார்டினல் மல்கம் ரஞ்சித் ஆண்டகை வத்திக்கானில் பரிசுத்த பிதா XIV ஆம் லியோ போப்பரவர்களை சந்தித்தார்.
அந்தச் சந்திப்பில் நெவில் ஜோ பெரேரா, இந்திக ஜோசப் மற்றும் டெனிங்டன் சுபசிங்க் ஆகிய குருமார்களும் கலந்து கொண்டனர்.
வங்காள விரிகுடாவில் உருவாகிய வலுக்குறைந்த வளிமண்டல மேலடுக்கு சுழற்சி தற்போது வடக்கு மாகாணத்தினை அண்மித்து நிலை கொண்டுள்ளது.
இதன் காரணமாக வடக்கு மற்றும் கிழக்கு மாகாணங்கள் உட்பட்ட நாட்டின் பல பகுதிகளுக்கும் கிடைத்து வரும் மிதமான (சில இடங்களில்) மற்றும் சற்று கனமான ( சில இடங்களில்) மழை எதிர்வரும் 27.01.2026 வரை தொடரும் வாய்ப்புள்ளது.
குறிப்பாக இன்றும்(24.01.2026) நாளையும்(25.01.2026) வடக்கு மற்றும் கிழக்கு மாகாணங்களின் பல பகுதிகளுக்கும் மழை கிடைக்கும் வாய்ப்புள்ளது.
அதேவேளை ஈரப்பதன் நிறைந்த கீழைக்காற்றின் வருகை காரணமாக வடக்கு மற்றும் கிழக்கு மாகாணங்கள நிலவிய வரண்ட காற்றின் செல்வாக்கு குறைவடைந்து குளிர் நிலைமை சற்று சீரடைந்துள்ளது.
ஆனால் மீண்டும் எதிர்வரும் 27.01.2026 முதல் குளிரான வானிலை நிலவத் தொடங்கும்.
வடக்கு, கிழக்கு மற்றும் வட மத்திய மாகாணங்களில் நெல் அறுவடை மற்றும் நெல் அறுவடைக்கு பின்னான செயற்பாடுகளை மேற்கொள்ளும் விவசாயிகள் எதிர்வரும் 27.01.2026 வரை தமது செயற்பாடுகளைத் தவிர்ப்பது சிறந்தது.
ஜனாதிபதி அனுர குமார திஸாநாயக்க பாராளுமன்ற உறுப்பினர்களின் ஓய்வூதியத்தை ரத்து செய்யும் சட்டத்தை, தமக்கு இரண்டு ஓய்வூதியங்கள் கிடைக்கும் வகையில் உருவாக்கியுள்ளதாக, முன்னாள் அமைச்சர் மற்றும் ஜனாதிபதி சட்டத்தரணி விஜயதாச ராஜபக்ஷ குற்றம் சாட்டியுள்ளார்.
“தற்போதைய ஜனாதிபதி, பாராளுமன்ற உறுப்பினர்களின் ஓய்வூதியத்தை ரத்து செய்யும் புதிய சட்டத்தை கொண்டு வந்துள்ளார். ஆனால் அந்தச் சட்டம், அவருடைய இரண்டு ஓய்வூதியங்களையும் பாதுகாக்கும் விதத்தில் தயாரிக்கப்பட்டுள்ளது என்பது தெளிவாகத் தெரிகிறது.
புதிய சட்டத்தின் படி, ஒருவர் ஜனாதிபதியாக ஐந்து நாட்கள் கூட பணியாற்றினால், அவருக்கு அதற்கான ஓய்வூதியம் வழங்கப்படும். அதற்கு மேலாக, அவர் ஏற்கனவே பாராளுமன்ற உறுப்பினராக ஓய்வு பெற்றவர் என்பதால், அந்த ஓய்வூதியமும் அவருக்கு கிடைக்கும்.
இதன்படி பார்க்கும் போது, இரண்டு ஓய்வூதியங்கள் அனுர குமார திஸாநாயக்க ஜனாதிபதிக்கு மட்டுமல்ல, பாராளுமன்றத்தில் ஐந்து ஆண்டுகள் பணியாற்றி பின்னர் ஜனாதிபதியாக ஆன அனைவருக்கும் வழங்கப்படும் நிலை உருவாகியுள்ளது” என அவர் தெரிவித்துள்ளார்.
கொழும்பில் நடைபெற்ற ஊடக சந்திப்பொன்றில் கலந்து கொண்டு, விஜயதாச ராஜபக்ஷ இதனை தெரிவித்தார்.
நாட்டின் பிற மாகாணங்களுடன் ஒப்பிடுகையில், வடக்கு மற்றும் கிழக்கு மாகாணங்களுக்கும் அங்கு வாழும் மக்களுக்கும் சிறப்பு நியாயம் வழங்கப்பட வேண்டும் என அரசு நம்புவதாக அமைச்சர் சுனில் ஹந்துன்னெத்தி தெரிவித்துள்ளார்.
அந்த மாகாணங்களில் பொருளாதாரத்தை நாட்டின் பிற பகுதிகளை விட வேகமாக திறக்க வேண்டிய அவசியம் உள்ளது என்றும், அதுவே நியாயமும் சமத்துவமும் நிலைநாட்டும் செயல்முறையின் ஒரு பகுதியாகும் என்றும் அமைச்சர் வலியுறுத்தினார்.
மேலும், வடக்கு மாகாணத்தில் பல தொழிற்துறை முயற்சிகள் தொடங்கப்படும் என்றும், உலகம் முழுவதும் உள்ள முதலீட்டாளர்களையும், இலங்கைத் தமிழர் டயஸ்போராவையும் முதலீட்டிற்கு அழைக்கப்படுவதாக அமைச்சர் சுனில் ஹந்துன்னெத்தி தெரிவித்தார்.
பரந்தன் இரசாயன தொழிற்சாலையை திறக்கும் நிகழ்வில் கலந்து கொண்டு உரையாற்றிய போது அவர் இதனை கூறினார்.
தனியார் துறையிலும் அரை அரசுத் துறையிலும் பணியாற்றும் ஊழியர்களுக்கு ஓய்வூதியம் வழங்குவது தொடர்பாக அரசாங்கம் கவனம் செலுத்தி வருவதாக தொழில் துறை பிரதி அமைச்சர் மகிந்த ஜயசிங்க தெரிவித்தார்.
இன்று (23) பாராளுமன்றத்தில் உரையாற்றும் போது அவர் இதனை கூறினார்.
“EPF மற்றும் ETF ஆகிய இரு நிதிகளுக்கிடையிலான வேறுபாட்டை நான் மிகவும் தெளிவாக விளக்கியிருந்தேன். EPF நிதியை ஓய்வூதியமாக மாற்றுவதாக நான் எங்கும் கூறவில்லை. நான் கூறிய கருத்து தவறான விதத்தில் புரிந்துகொள்ளப்பட்டது. EPF என்பது சமூக பாதுகாப்பிற்காக உருவாக்கப்பட்ட நிதி. தனியார் துறைக்கும் அரை அரசுத் துறைக்கும் ஓய்வூதியம் வழங்குவது தொடர்பாகவே அரசாங்கம் கவனம் செலுத்தி வருகிறது. EPF நிதியை ஓய்வூதியமாக மாற்றுவதாக நான் கூறவில்லை” என அவர் வலியுறுத்தினார்.
யாழ்ப்பாணத்தில் ஜனாதிபதி அனுர திஸாநாயக்கர் மேற்கொண்ட உரை தைரியமானதும் உறுதியானதும் ஆகும் என்றும், இதுவரை எந்த அரசியல் தலைவருக்கும் அத்தகைய உரையை நிகழ்த்த இயலவில்லை என்றும், தமிழ் தேசிய கூட்டமைப்பின் பாராளுமன்ற உறுப்பினர் சாணக்கியன் ராசமாணிக்கம் தெரிவித்துள்ளார்.
அந்த உரையை எதிர்க்கட்சி தவறாக திரிபுபடுத்தி விளக்கம் அளித்து வருவதாகக் குற்றஞ்சாட்டிய அவர், பௌத்தர்கள் வசிக்காத பகுதிகளில் விகாரைகள் அமைத்து, பேருந்துகளில் மக்களை கொண்டு வந்து போராட்டங்களை நடத்தி நாட்டை அசாந்திக்குள் தள்ள முயற்சிக்கப்பட்ட சந்தர்ப்பங்களில், முந்தைய ஜனாதிபதிகள் மௌனம் காத்தனர் என்றும் சுட்டிக்காட்டினார்.
மேலும், புத்தமதம் இலங்கைக்கு வருவதற்கு முன்னரே தமிழர்கள் கதிர்காமக் கடவுளை வழிபட்டு வந்ததாகவும், அதனை பௌத்தர்கள் திஸ்ஸ விகாரைக்கு செல்வதுடன் ஒப்பிட முடியாது என்றும் சாணக்கியன் ராசமாணிக்கம் வலியுறுத்தினார்.
இன்றைய தினம் (23) பாராளுமன்றத்தில் உரையாற்றும் போது அவர் இவ்வாறு தெரிவித்தார்.