இலங்கையில் எரிபொருள் விலையை குறைத்தது போன்று உணவுப் பொருள் விலைகளும் குறைக்கப்படும் என பிரதி அமைச்சர் நளின் ஹேவகே தெரிவித்துள்ளார்.

காலியில் நடைபெற்ற நிகழ்வு ஒன்றில் கலந்துகொண்டு உரையாற்றிய போது அவர் இந்த விடயத்தினை குறிப்பிட்டுள்ளார்.

அத்துடன் எரிபொருள் விலை சிறிதளவு குறைக்கப்பட்டது போன்று, எதிர்காலத்தில் உணவுப்பொருட்கள் மீதான வரிகளும் குறைக்கப்படும் என அவர் குறிப்பிட்டார்.  

மேலும், எதிர்வரும் வரவு செலவுத் திட்டத்தில் இவ்வாறு விலை குறைப்பு நடைமுறைப்படுத்தப்பட உள்ளதாகத் தெரிவித்துள்ளார்.

இதேவேளை ஜனாதிபதி உள்ளிட்ட அனைத்து அமைச்சர்களும் அதிகாரபூர்வ இல்லங்களை பெற்றுக்கொள்ளாது சாதாரண வாகனங்களை பயன்படுத்துவதாக குறிப்பிட்டுள்ளார்.

இந்தநிலையில், அமைச்சர்களுக்கு வாகனங்கள் இன்றி செயற்பட முடியாது எனவும் இதனால் சாதாரண வாகனங்கள் பயன்படுத்தப்படும் எனவும் அவர் தெரிவித்துள்ளமை குறிப்பிடத்தக்கது.

மக்களுக்கு நிவாரணம் வழங்க அரசாங்கம் தேவையான அனைத்து நடவடிக்கைகளையும் எடுத்துள்ளதாக அமைச்சர் வசந்த சமரசிங்க தெரிவித்துள்ளார்.

எதிர்வரும் பண்டிகைக் காலத்திற்காக பல அத்தியாவசியப் பொருட்களின் விலைகளைக் குறைப்பது குறித்து ஆலோசித்து வருவதாகவும் அவர் கூறுகிறார்.

மக்களுக்கு நிவாரணம் வழங்கும் அதே வேளையில் வெள்ளத்தால் பாதிக்கப்பட்ட மக்களுக்கும் நிவாரணம் வழங்கி வருகின்றனர் என்றார்.

ஜனாதிபதி நாட்டிற்கு வழங்கிய உறுதிமொழியின் பிரகாரம் எதிர்வரும் மூன்று வருடங்களுக்குள் 30 வீதத்திற்கும் அதிகமான மின்சார கட்டணங்கள் குறைக்கப்படும் எனவும் அவர் தெரிவித்துள்ளார்.

2025ஆம் ஆண்டு ஏப்ரல் மாதம் முதல் வழமை போன்று வாகனங்களை இறக்குமதி செய்யவும், பெப்ரவரி மாதம் முதல் அத்தியாவசிய வாகனங்களை இறக்குமதி செய்யவும் அரசாங்கம் திட்டமிட்டுள்ளதாக தெரிவிக்கப்படுகின்றது.

தனியார் வாகனங்களை இறக்குமதி செய்வதில் மின்சார மற்றும் ஹைபிரிட் வாகனங்களுக்கு முன்னுரிமை அளிப்பது தொடர்பில் அரசாங்கத்தின் கவனம் செலுத்தப்பட்டுள்ளதாக தெரிவிக்கப்படுகின்றது.

இதேவேளை, குறிப்பிட்ட தனியார் நிறுவனம் ஒன்று வாகனங்களை இறக்குமதி செய்வதற்காக முன்பணம் பெற்றுள்ளதாக வாகன இறக்குமதியாளர்கள் சங்கம் தெரிவித்துள்ளது.

அதன்படி இந்த நிறுவனம் சுமார் 1,700 வாடிக்கையாளர்களிடம் இருந்து லட்சக்கணக்கான ரூபாய் பணத்தை முன்பணமாக பெற்றுள்ளதாக அவர்கள் சுட்டிக்காட்டுகின்றனர்.

நுகர்வோர் விவகார அதிகார சபைக்கு கடிதம் ஒன்றை அனுப்பி வைத்து சங்கம் இதனைக் குறிப்பிட்டுள்ளது.

பிரதமர் கலாநிதி ஹரிணி அமரசூரிய பல்பொருள் அங்காடியில் தனியாக ஷாப்பிங் செய்யும் புகைப்படம் சமூக வலைதளங்களில் பரவி வருகிறது.

பிரதமருடன் பெரிய அளவிலான பாதுகாவலர்கள் இல்லை, ஒரே ஒரு பாதுகாவலரை மட்டுமே பார்க்க முடியும்.

தன் கூடையைக் கூட காவலாளியிடம் கொடுக்காமல் தானே சுமந்து வருகிறார்.

பிரதமரின் இந்த எளிய வாழ்க்கை முறை மக்களால் பெரிதும் பாராட்டப்பட்டு வருகிறது.

மக்களின் எதிர்பார்ப்புகளுக்கு அமைவாக பாராளுமன்றம் எவ்வாறு செயற்படுவது என்பது தொடர்பில் அவதானம் செலுத்தி வருவதாக கொழும்பு பேராயர் மல்கம் ரஞ்சித் கர்தினால் தெரிவித்துள்ளார்.

புதிய சபாநாயகர் அசோக ரன்வலவிடம் கர்தினால் இதனைத் தெரிவித்துள்ளார்.

கடந்த வாரம் கொழும்பில் உள்ள பேராயர் இல்லத்திற்கு அவரைச் சந்திப்பதற்காகச் சென்றிருந்த போதே சபாநாயகர் இதனைத் தெரிவித்ததாகக் குறிப்பிட்டுள்ளார்.

ஈஸ்டர் ஞாயிறு தாக்குதல் தொடர்பான விசாரணைப் பணிகளை கர்தினால் பாராட்டியதாகவும் சபாநாயகர் குறிப்பிட்டார்.

76 வருடங்களாக சிதைந்து போன நாட்டை ஒரே நாளில் கட்டியெழுப்ப முடியாது என பெருந்தோட்ட மற்றும் சமூக உட்கட்டமைப்பு அமைச்சர் சமந்தி வித்யாரத்ன தெரிவித்துள்ளார்.

சுமார் இரண்டு வருடங்களுக்கு முன்னர் 90 வினாடிகளுக்கு அவரது அமைச்சு ரூ. 1740 இலட்சம் செலவழிக்கப்பட்டதாகவும் இன்னும் விளம்பரம் வெளியிடப்படவில்லை எனவும் அவர் வெளிப்படுத்தியுள்ளார்.

இந்த பணம் விளம்பரத்திற்காக செலவிடப்பட்டதா அல்லது வேறு எங்காவது சென்றதா என்பது எதிர்காலத்தில் விசாரிக்கப்பட வேண்டும் என்றார். 

இந்த நாட்டில் தேவையற்ற விடயங்களை வீண்விரயம் செய்வதை நிறுத்துவதன் மூலம் நாடு சுத்தப்படுத்தப்படும் எனவும் அதனை ஒரே நாளில் எதிர்பார்க்கக் கூடாது எனவும் அவர் குறிப்பிட்டுள்ளார்.

தற்போது அமைச்சுக்களுக்குச் சொந்தமான சுமார் 254 அதி சொகுசு வாகனங்களை ஏலம் விடுவதற்கு அரசாங்கம் தீர்மானித்துள்ளது.

அமைச்சரவை, அரசாங்க மதிப்பீட்டாளரின் சான்றிதழைப் பெற்று இந்த கார்கள் ஏலம் விடப்படும் என எதிர்பார்க்கப்படுவதாக பொது பாதுகாப்பு மற்றும் நாடாளுமன்ற அலுவல்கள் அமைச்சர் ஆனந்த விஜேபால தெரிவித்துள்ளார்.

இந்த சொகுசு கார்களை பராமரிக்க அரசு பாரிய செலவை சுமக்க வேண்டியுள்ளதுடன், இவற்றில் பெரும்பாலானவை முன்னாள் அமைச்சர்களே பயன்படுத்தியுள்ளதாக கூறப்படுகிறது.

இதேவேளை, நாடாளுமன்ற உறுப்பினர்களுக்கு வரியில்லா வாகன அனுமதிப்பத்திரம் வழங்குவதையும் அரசாங்கம் இடைநிறுத்தியுள்ளது.

அத்துடன், 05 வருடங்களின் பின்னர் நாடாளுமன்ற உறுப்பினர்களுக்கு வழங்கப்படும் ஓய்வூதியத்தை இரத்து செய்வதற்கும் அரசாங்கம் தீர்மானித்துள்ளது.

இது தொடர்பில் ஆராய குழுவொன்று நியமிக்கப்பட்டுள்ளதாகவும் அமைச்சர் குறிப்பிட்டார்.

உள்ளூராட்சி சபைத் தேர்தலுக்கான வேட்புமனுக்களை இரத்துச் செய்வதா இல்லையா என்பது தொடர்பில் இறுதித் தீர்மானம் எடுப்பதற்காக கட்சித் தலைவர்களின் முக்கியக் கூட்டம் அடுத்த வாரம் நடைபெறவுள்ளது.

சபைத் தலைவர் அமைச்சர் பிமல் ரத்நாயக்க தலைமையில் நடைபெறவுள்ள இந்தக் கலந்துரையாடலில் பாராளுமன்றத்தை பிரதிநிதித்துவப்படுத்தும் அனைத்து அரசியல் கட்சிகளின் தலைவர்களும் கலந்துகொள்ளவுள்ளனர்.

அங்கு எடுக்கப்படும் தீர்மானங்களின் அடிப்படையில் உள்ளூராட்சி மன்றத் தேர்தலுக்கான வேட்புமனுக்கள் தொடர்பில் இறுதி இணக்கப்பாடு எட்டப்படும் என பொது நிர்வாக அமைச்சர் பேராசிரியர் சந்தன அபே ரத்ன தெரிவித்துள்ளார்.

தேர்தலுக்காக கோரப்பட்டுள்ள வேட்புமனுக்களை இரத்து செய்யுமாறு பல அரசியல் கட்சிகள் ஏற்கனவே அரசாங்கத்திடம் கோரிக்கை விடுத்துள்ளன.

உள்ளாட்சி தேர்தலை நடத்த தேர்தல் ஆணையம் முதலில் ஏற்பாடு செய்த போதிலும், நிதி ஒதுக்கீடு கிடைக்காததால் தேர்தல் ஆணையம் தேர்தலை நிறுத்தி வைத்தது.

இதேவேளை, உள்ளூராட்சி மன்றத் தேர்தல் மிக விரைவாக நடத்தப்படும் என தேர்தல்கள் ஆணைக்குழுவின் தலைவர் ஆனந்த ரத்நாயக்க தெரிவித்துள்ளார்.

உச்ச நீதிமன்ற உத்தரவுப்படி விரைவில் தேர்தலை நடத்த வேண்டும் என்றார்.

கடந்த ஆண்டு ஏப்ரல் மாதம் நடைபெற இருந்த உள்ளூராட்சி மன்றத் தேர்தலுக்காக 340 உள்ளூராட்சி மன்றங்களுக்கான 8,711 வேட்பாளர்களைத் தெரிவு செய்வதற்காக வேட்புமனுக்கள் கோரப்பட்டன, அதில் 80,672 வேட்பாளர்கள் கலந்து கொண்டனர்.

24 மாநகர சபைகள், 41 நகர சபைகள் மற்றும் 275 பிரதேச சபைகளுக்கு இவர்கள் முன்னிலை ஆகினர். 

உள்ளூராட்சி மன்றத் தேர்தலுக்கு வேட்புமனு தாக்கல் செய்த மக்களில் சுமார் மூவாயிரம் அரச ஊழியர்கள் உள்ளனர்.

வேட்புமனு தாக்கல் செய்த இவர்களில் சுமார் 8,000 பேர் வெளிநாடு சென்றுள்ளனர் அல்லது உயிரிழந்துள்ளனர் என மாகாண சபைகள் மற்றும் உள்ளூராட்சி அமைச்சு தெரிவித்துள்ளது.

இதனிடையே கடந்த காலத்தில் இரண்டாயிரத்திற்கும் மேற்பட்ட வேட்பாளர்கள் கட்சி மாறியுள்ளதாக அமைச்சுக்கு தகவல் வெளியாகியுள்ளது.

எல்பிட்டிய தவிர்ந்த அனைத்து உள்ளுராட்சி மன்றங்களும் தற்போது ஆணையாளரின் கட்டுப்பாட்டில் உள்ளன.