கொழும்பின் பல பகுதிகளில் நாளை மறுநாள் (15) காலை 8 மணி முதல் இரவு 10 மணி வரை 14 மணிநேர நீர் வெட்டு அமுல்படுத்தப்படும் என தேசிய நீர் வழங்கல் மற்றும் வடிகாலமைப்புச் சபை தெரிவித்துள்ளது.

இதன்படி கொழும்பு 1 முதல் 4 வரை மற்றும் 7 முதல் 15 வரையான பகுதிகளுக்கு நீர் விநியோகம் தடைப்படவுள்ளது.

மாளிகாகந்த மற்றும் எலிஹவுஸ் நீர்த்தேக்கங்களுக்கு நீர் இறைக்கும் நீரேற்று நிலையத்திற்கு நீர் விநியோகிக்கும் மின்சார விநியோக அமைப்பின் அத்தியாவசிய பராமரிப்பு பணிகள் காரணமாக நீர் விநியோகம் இடைநிறுத்தப்படுவதாக சபை அறிக்கையில் தெரிவிக்கப்பட்டுள்ளது.

நீதிமன்றத்தை அவமதித்ததாகக் கூறப்படும் இராஜாங்க அமைச்சர் சனத் நிஷாந்தவுக்கு எதிராக தாக்கல் செய்யப்பட்ட 03 மனுக்களை எதிர்வரும் செப்டெம்பர் மாதம் 27ஆம் திகதி மீளப் பரிசீலிக்க மேன்முறையீட்டு நீதிமன்றம் இன்று உத்தரவிட்டுள்ளது.

இந்த மனுக்கள் இன்று மேன்முறையீட்டு நீதிமன்றத்தின் தலைவர் நீதிபதி நிஷங்க பந்துல கருணாரத்ன மற்றும் ஏ. மரிக்கார் ஆகியோர் முன்னிலையில் விசாரணைக்கு வந்தது.

சட்டமா அதிபர் சார்பில் ஆஜரான பிரதி சொலிசிட்டர் ஜெனரல், இந்த முறைப்பாடு தொடர்பில் குரல் பரீட்சை நடத்த வேண்டிய அவசியம் உள்ளதாகவும், அதனை அரசாங்கத்தின் இரசாயன பகுப்பாய்வு திணைக்கள அதிகாரிகள் முன்னிலையில் மேற்கொள்ள வேண்டியது அவசியமானது எனவும் நீதிமன்றில் தெரிவித்தார்.

அப்போது, மனுவொன்றை சமர்ப்பித்திருந்த இலங்கை நீதித்துறை அதிகாரிகள் சங்கம் சார்பில் ஆஜரான சட்டத்தரணி, இவ்வாறான விசாரணையின்றி இந்த மனுவை பேணுவதில் தமக்கு ஆட்சேபனை இல்லை என தெரிவித்தார்.

அதன்படி, மனுவை செப்டம்பர் 27-ம் திகதி மீண்டும் விசாரணைக்கு எடுத்துக் கொள்ள உத்தரவிடப்பட்டது.

அமெரிக்க டொலருக்கு நிகரான இலங்கை ரூபாவின் பெறுமதி இன்று வீழ்ச்சியடைந்துள்ளது.

இன்றைய தினம் டொலரின் கொள்வனவு விலை 308.16 ரூபாவாகவும் விற்பனை விலை 321.87 ரூபாவாகவும் இலங்கையின் மாற்று விகிதங்கள் காட்டுகின்றன.

நேற்றைய தினம் டொலரின் கொள்வனவு விலை 306.15 ரூபாவாகவும் விற்பனை விலை 320.68 ரூபாவாகவும் காணப்பட்டது.

இதேவேளை, இலங்கை மத்திய வங்கியினால் நேற்று அழைக்கப்பட்ட திறைசேரி உண்டியல் ஏலத்தின் வட்டி வீதமும் அதிகரித்துள்ளது.

91 நாள் பில் வட்டி விகிதம் 17.79%லிருந்து 19.08% ஆகவும், 182 நாள் பில் வட்டி 15.93%லிருந்து 16.95% ஆகவும், 364 நாள் பில் வட்டி 13.86%லிருந்து 14.04% ஆகவும் அதிகரித்துள்ளது.

யாழ்ப்பாணம் பலாலி பிரதேசத்தில் உள்ள அரச பாடசாலை ஒன்றில் கல்வி கற்கும் மாணவி ஒருவரை துஷ்பிரயோகம் செய்த சந்தேகநபர் ஒருவர் கைது செய்யப்பட்டுள்ளதாக பலாலி பொலிஸார் தெரிவித்துள்ளனர்.

எதிர்வரும் 12ஆம் திகதி 3 பாடசாலை மாணவிகளிடம் வாக்குமூலம் பெறவிருந்த போதிலும், கல்வி நடவடிக்கைகளில் ஈடுபட்டமையினால் அவர்களால் வாக்குமூலம் பெறமுடியவில்லை எனவும், கல்வி நடவடிக்கைகள் நிறைவடைந்ததன் பின்னர் மூவரிடமும் வாக்குமூலங்களை பெற்றுக்கொள்ள நடவடிக்கை எடுக்கப்படும் எனவும் பொலிஸார் தெரிவித்தனர். 

குறித்த நபர் தன்னை துன்புறுத்தி துஷ்பிரயோகம் செய்வதாக பாடசாலை அதிபருக்கு அறிவித்ததையடுத்து அதிபர் பலாலி பொலிஸாருக்கு அறிவித்ததையடுத்து பலாலி பிரதேசத்தை சேர்ந்த சந்தேக நபரை பொலிஸார் கைது செய்துள்ளனர்.

கைது செய்யப்பட்ட சந்தேகநபரை பாடசாலை மாணவிகளிடம் வாக்குமூலம் பெற்று யாழ்ப்பாணம் நீதிவான் நீதிமன்றில் முன்னிலைப்படுத்த நடவடிக்கை எடுத்துள்ளதாக விசாரணைகளை மேற்கொண்டு வரும் பலாலி பொலிஸார் மேலும் தெரிவித்தனர்.

நடு வீதியில் பிக்கு ஒருவர் சடலமாக கிடந்த நிலையில் பொலீசாரால் மீட்கப்பட்டுள்ளார். 

துன்பானே பிரதி சங்கநாயக்க மற்றும் தம்பிட்ட விகாரையின் விஹாராதிப தேரரே இவ்வாறு சடலமாக மீட்கப்பட்டதாக பொலிஸார் குறிப்பிட்டுள்ளனர்.

காவி உடை அன்றி வேறு ஆடை அணிந்திருந்த அவர், கீழே விழுந்து உயிரிழந்ததுடன், சடலத்தின் அருகில் காய்கறிப் பை மற்றும் கைத்தொலைபேசி என்பன காணப்பட்டதாக கூறப்படுகிறது. 

சம்பவம் தொடர்பில் பொலிஸார் மேலதிக விசாரணைகளை மேற்கொண்டு வருகின்றனர். 

தம்புள்ளை நோக்கிப் பேருந்தில் பயணித்துக் கொண்டிருந்த துருக்கிய யுவதிக்கு பாலியல் தொல்லை கொடுத்ததாக சந்தேகத்தின் பேரில் இராணுவ கோப்ரல் ஒருவர் கைது செய்யப்பட்டுள்ளார்.

சந்தேக நபர் மாத்தளை மெல்பிட்டிய பிரதேசத்தை சேர்ந்தவர் என தெரியவந்துள்ளது.

மூன்று துருக்கிய யுவதிகளும் பாகிஸ்தானிய இளைஞரும் அடங்கிய குழுவொன்று கண்டியிலிருந்து தம்புள்ளை நோக்கி பேருந்தில் சென்று கொண்டிருந்த போது சந்தேகநபர் தமக்கு அருகில் அமர்ந்திருந்த பெண் ஒருவரின் உடலை தடவியது விசாரணையில் தெரியவந்துள்ளது.

குறித்த பாகிஸ்தானிய இளைஞன் நடத்துனர் மற்றும் பயணிகளின் உதவியுடன் சந்தேக நபரை பிடித்து தம்புள்ளை பொலிஸாரிடம் ஒப்படைத்துள்ளார்.

சந்தேகநபர் இன்று தம்புள்ளை நீதவான் முன்னிலையில் ஆஜர்படுத்தப்படவுள்ளார். 

தொழில் மற்றும் வெளிநாட்டு வேலைவாய்ப்பு அமைச்சின் “Glocal Fair 2023″ என்ற நடமாடும் சேவை எதிர்வரும் 15 மற்றும் 16 ஆம் திகதிகளில் யாழ்ப்பாணம் முற்றவெளி விளையாட்டரங்கில் நடைபெறவுள்ளது.

இதனுடன் இணைந்ததாக இலங்கை வெளிநாட்டு வேலைவாய்ப்பு பணியகம், யாழ்ப்பாண மாவட்டம் முழுவதும் விழிப்புணர்வு நிகழ்ச்சிகளை மேற்கொண்டுவருகிறது.

இதன் கீழ் வெளிநாட்டு வேலைவாய்ப்பு பணியகத்தின் அதிகாரிகள் மற்றும் அமைச்சின் அபிவிருத்தி உத்தியோகத்தர்கள் வீடு வீடாகச் சென்று சட்டவிரோத ஆள் கடத்தல் தடுப்பு குறித்து மக்களுக்கு தெளிவுபடுத்தியுள்ளனர்.

கடந்த சில தினங்களுக்கு முன்னர் பருத்தித்துறை அலவி, யாழ்ப்பாணம், குருநாகர் போன்ற பகுதிகளில் இந்த விழிப்புணர்வு நிகழ்ச்சிகள் நடத்தப்பட்டன.

உள்ளூர் மற்றும் வெளிநாட்டு வேலை வாய்ப்புகளுக்கான வசதிகளுடன் தொழில் மற்றும் வெளிநாட்டு வேலைவாய்ப்பு அமைச்சின் அனைத்து சேவைகளையும் சமகால அரசாங்கம் வடக்கு, தெற்கு என்ற பாகுபாடு இல்லாமல் சமமாக நடத்துகிறது என்ற செய்தியை முன்னெடுக்கும் நோக்கில் யாழ்ப்பாணத்தில் “Glocal Fair 2023” அமைச்சின் நடமாடும் சேவை இடம்பெறவுள்ளமை குறிப்பிடத்தக்கது. 

ஹொரணை, எட்டுகொட பிரதேசத்தில் உள்ள வீடொன்றுக்கு போதைப்பொருளுக்கு அடிமையான நபர் ஒருவர் வந்து நான்கு மாதக் குழந்தையை பத்து வயதுக் சிறுவனிடம் ஒப்படைத்துவிட்டு தப்பிச் சென்றுள்ளதாக ஹொரணை பொலிஸார் தெரிவிக்கின்றனர்.

தனது மகன் வீட்டில் தனியாக இருந்த போது, ​​ஒரு நபர் சிசுவுடன் வந்து, தனது மகனுக்கு சிசுவை கொடுத்துவிட்டு விரைவில் வருவேன் என்று கூறிவிட்டு, இரண்டு மணி நேரத்துக்கு மேலாகியும், அந்த நபர் வரவில்லை என சிறுவனின் தாய் தெரிவித்ததாக ஹொரணை பொலிஸ் பரிசோதகர் நேற்று (11) மாலை தெரிவித்தார். 

பொலிஸ் பரிசோதகர் உடனடியாக சிறுவர் மற்றும் பெண்கள் பணியகத்தின் நிலைய பொறுப்பாளர் எல்.டி.லியனகே உட்பட அதிகாரிகள் குழுவை வீட்டுக்கு அனுப்பிவிட்டு சிசுவை மீட்தாக தெரிவித்தார்.

சிசுவை ஹொரண ஆதார வைத்தியசாலைக்குக் கொண்டு சென்றதாக பொலிஸ் அதிகாரி மேலும் தெரிவித்தார்.

பத்து வயது சிறுவனை காவலில் வைத்து தப்பியோடிய நபர் தீவிர போதைக்கு அடிமையானவர் என தமக்கு தகவல் கிடைத்துள்ளதாகவும், அவரைக் கைது செய்ய விசேட பொலிஸ் குழுவை பயன்படுத்தி விசாரணைகளை ஆரம்பித்துள்ளதாகவும் பொலிஸார் தெரிவித்தனர்.