சர்வகட்சி அரசாங்கத்திற்கு பதிலாக தேசிய அரசாங்கத்தை நிறுவுவது தொடர்பில் ஜனாதிபதி ரணில் விக்கிரமசிங்கவினால் கவனம் செலுத்தப்பட்டுள்ளது.

சர்வகட்சி அரசாங்கத்தில் கட்சிகளாக இணைவதை விடுத்து பாராளுமன்ற உறுப்பினர்கள் தனித்தனியாக அரசாங்கத்தில் இணைந்து கொள்வதால் தேசிய அரசாங்கத்தை அமைப்பதே பொருத்தமானது என அரசியல் கட்சிகள் ஜனாதிபதியிடம் சுட்டிக்காட்டியுள்ளன.

பத்தொன்பதாவது அரசியலமைப்புத் திருத்தத்தில் அமைச்சுப் பதவிகளின் எண்ணிக்கையை முப்பதிலிருந்து நாற்பத்தி இரண்டாக அதிகரிக்கக்கூடிய ஏற்பாடுகள் செய்யப்பட்டுள்ளன.

அமைச்சரவை அடுத்த வாரம் பதவியேற்கவுள்ளதாக ஜனாதிபதி அலுவலக வட்டாரங்கள் தெரிவிக்கின்றன.

ஶ்ரீலங்கா பொதுஜன பெரமுன அமைச்சரவைக்கு நியமிக்கப்படவுள்ள 16 உறுப்பினர்களின் பட்டியலை ஜனாதிபதிக்கு அனுப்பி வைத்துள்ளது.

மேலும், ஸ்ரீலங்கா பொதுஜன பெரமுனவின் அங்கத்துவக் கட்சிகளின் தலைவர்களுக்கும் அமைச்சுப் பதவிகள் வழங்கப்பட உள்ளன.

30 இராஜாங்க அமைச்சர்கள் பதவியேற்க உள்ளனர்.

ஜோன்ஸ்டன் பெர்னாண்டோ, ரோஹித அபேகுணவர்தன, நாமல் ராஜபக்ஷ, எஸ். எம். சந்திரசேன, மஹிந்தானந்த அளுத்கமகே, பவித்ரா வன்னியாராச்சி மற்றும் ஏனைய பாராளுமன்ற உறுப்பினர்களுக்கு ஸ்ரீலங்கா பொதுஜன பெரமுனவினால் அமைச்சர் பதவிகள் வழங்க முன்மொழியப்பட்டுள்ளது.

இவர்களில் நால்வருக்கு அமைச்சர் பதவி வழங்க வேண்டாம் என எதிர்கட்சியைச் சேர்ந்த நாடாளுமன்ற உறுப்பினர்கள் குழுவொன்று ஜனாதிபதியிடம் தெரிவித்துள்ளனர்.

ஜீவன் தொண்டமான், ஏ.எல்.எம். அதாவுல்லா போன்ற கட்சித் தலைவர்களுக்கும் அமைச்சர் பதவி வழங்கப்பட உள்ளது.

எவ்வாறாயினும், ஸ்ரீலங்கா பொதுஜன பெரமுனவின் உறுப்பினர்களுக்கு அமைச்சு மற்றும் இராஜாங்க அமைச்சுப் பதவிகளை வழங்குவது தொடர்பில் ஜனாதிபதிக்கும் முன்னாள் அமைச்சர் பசில் ராஜபக்ஷவிற்கும் இடையில் நேற்று (17) இரவு முக்கிய கலந்துரையாடல் ஒன்று இடம்பெறவுள்ளதாக தெரிவிக்கப்படுகிறது. 

கல்விப் பொதுத் தராதர உயர்தர பரீட்சை செயன்முறை பரீட்சை இந்த வாரத்துக்குள் நிறைவடையும். பரீட்சை பெறுபேறுகளை எப்போது வெளியிடுவது என்பது தொடர்பாக பரீட்சைகள் ஆணையாளர் நாயகம் இன்னும் சித தினங்களில் அறிவிப்பார் என கல்வி அமைச்சர் சுசில் பிரேமஜயந்த தெரிவித்தார்.

கல்வி பொதுத் தராதர உயர்தர பரீட்சை பெறுபேறு இதுவரை வெளியிட முடியாமல் போயிருப்பதன் காரணம் தொடர்பாக குறிப்பிடுகையிலேயே இவ்வாறு தெரிவித்தார். இதுதொடர்பாக அவர் தொடர்ந்து தெரிவிக்கையில்,

நாட்டில் கடந்த மாதம் ஆரம்ப நாட்களில் ஏற்பட்ட அசம்பாவித நிலைமைகள் காரணமாகவே கல்வி பொதுத் தராதர உயர்தர பரீட்சை பெறுபேறுகள் தாமதிக்க காரணமாகும். ஏனெனில் உயர்தர பரீட்சையின் சென்முறை பரீட்சைக்கு சுமார் 400 மாணவர்களுக்கு அந்த காலப்பகுதியில் கலந்துகொள்ள முடியாமல் போயிருந்தது. அதனால் அந்த மாணவர்களுக்கு அந்த சந்தர்ப்பத்தை மீண்டும் வழங்கவேண்டி இருக்கி்ன்றது.

அதன் பிரகாரம் நாளை 19ஆம் திகதி முதல் 21ஆம் திகதிவரை செயன்முறை பரீட்சை இடம்பெறுகின்றது. அதற்கிடையில் பரீட்சை தொடர்பான ஏனைய நடவடிக்கைகளை பரீட்சைகள் திணைக்களம் மேற்கொள்ள நடவடிக்கை எடுத்திருக்கின்றது. அத்துடன் செயன்முறை பரீட்சை பெரும்பாலும் இந்த வாரத்துடன் முடிவடையும். அதன் பிரகாரம் உயர் தர பரீட்சை பெறுபேறு எப்போது வெளியிட முடியும் என்பதை பரீட்சைகள் ஆணையாளர் இன்னும் சில தினங்களில் அறிவிப்பார்.

அதேபோன்று பல்கலைக்கழகங்களின் நடவடிக்கைகள் தொடர்பாகவும் நாங்கள் மாணவர் சங்கங்களுடன் பல்லைக்கழக மானியங்கள் ஆணைக்குழுவில் கலந்துரையாடி இருந்தோம். அவர்களுக்கும் பல்வேறு பிரச்சினைகள் இருக்கின்றன. அதேநேரம் அரசாங்கமும் பாரிய சவால்களுக்கு முகம்கொடுத்திருக்கும் இந்த சந்தர்ப்பத்தில் அந்த மாணவர்கள் தொடர்பாகவும் நடவடிக்கை எடுத்து வருகின்றோம். அத்துடன் பல்கலைக்கழங்களில் கஹபொல மற்றும் வேறு கொடுப்பனவுகளை பெறும் சுமார் ஒரு இலட்சத்தி 40ஆயிரம் மாணவர்கள் இருக்கின்றார்கள்.

அந்த கொடுப்பனவு போதுமானதாக இல்லை என்பதும் தற்போது பிரச்சினை என்பதுடன் அதனை எவ்வாறு திறைசேரி பெற்றுக்கொள்வது என்பதும் பிரச்சினையாகவே இருக்கின்றது. என்றாலும் பல்கலைக்கழக கட்டமைப்பை மேலும் உயர்ந்த நிலைக்கு கொண்டுசென்று, மாணவர்களுக்கு கல்வியை பெற்றுக்கொடுக்கும் அடிப்படை உரிமையை நாங்கள் பெற்றுக்கொடுக்கவேண்டும்.

அதனை இலக்குவைத்து எமது நடவடிக்கைகளை மேற்கொண்டு செல்கின்றோம். மேலும் பாடசாலை கல்வி நடவடிக்கையை 5தினங்களும் நடத்த தீர்மானிக்கப்பட்டு தற்போது இடம்பெற்று வருகின்றது. இதுதொடர்பாக எந்த முறைப்பாடும் இதுவரை எமக்கு கிடைக்கவில்லை. என்றாலும் நாங்கள் ஒவ்வாெரு சனிக்கிழமை நாட்களிலும் மாகாண கல்வி அதிகாரிகளுடன் இணையவழியில் கலந்துரையாடி, இதுதொடர்பாக ஆராய்ந்து வருகின்றோம். போக்குவரத்து வசதி குறைவாக காணப்படும் பிரதேசங்களுக்கு போக்குவரத்து சேவைகளை அதிகரிப்பதற்கு நாங்கள் நடவடிக்கை எடுத்து வருகின்றோம் என்றார்.

வேலைவாய்ப்பிற்காக அவசரமாக வெளிநாடு செல்ல எதிர்பார்க்கும் இலங்கையர்களுக்கு கடவுச்சீட்டை வழங்குவதற்காக திங்கட்கிழமை (22) முதல் குடிவரவு மற்றும் குடியகல்வு திணைக்களத்தில் விசேட கவுன்டர் அறிமுகப்படுத்தப்படவுள்ளது.

அதிக கிராக்கி காரணமாக, வெளிநாட்டு வேலைவாய்ப்புக்கான புதிய கடவுச்சீட்டைப் பெறுவதற்கு பத்தரமுல்லையில் உள்ள திணைக்கள அலுவலகத்தில் நியமனம் செய்வதற்கு குறைந்தது இரண்டு மாதங்களாவது காத்திருக்க வேண்டிய நிலைக்கு மக்கள் தள்ளப்பட்டுள்ளனர்.

இதனால் தொழில் நிமித்தம் அவசரமாக வெளிநாடு செல்ல வேண்டிய இலங்கையர்கள் பெரிதும் பாதிக்கப்பட்டுள்ளதாக வெளிநாட்டு வேலைவாய்ப்பு அமைச்சர் மனுஷ நாணயக்கார தெரிவித்துள்ளார்.

இதனால், குடிவரவு குடியகல்வு திணைக்களத்தின் கோரிக்கைக்கு அமைய, இந்தப் பிரச்சினைக்கு தீர்வு காண்பதற்காக புதிய கவுன்டர் ஒன்றை அறிமுகப்படுத்த நடவடிக்கை எடுக்கப்பட்டுள்ளது என்றார்

2023 ஆம் ஆண்டு தேசிய சுதந்திர தினத்தின் போது தமிழில் தேசிய கீதம் பாடப்படும் என கடற்றொழில் அமைச்சர் டக்ளஸ் தேவானந்தா குறிப்பிட்டுள்ளார்.

அமைச்சரவையில் பிரேரணையை சமர்ப்பித்ததாகவும் அவர் குறிப்பிட்டுள்ளார்.

அவர் மேலும் தெரிவிக்கையில், தேசிய கீதத்தை தமிழில் பாடுவது இந்நாட்டு தமிழ் முஸ்லிம் மக்களின் மகிழ்ச்சிக்கும் பலமான பாராட்டிற்கும் பெரும் காரணமாக அமையும் எனவும், அது அவர்களின் இதயங்களை வெல்வதாகவும் அமையும்.

வெளிநாட்டுப் பயணத்தை முடித்துக் கொண்டு கோத்தபாய இலங்கை வரவுள்ளார்
முன்னாள் ஜனாதிபதி கோட்டாபய ராஜபக்ச எதிர்வரும் 24ஆம் திகதி இலங்கை திரும்பவுள்ளதாக ரஷ்யாவுக்கான முன்னாள் இலங்கை தூதுவர் உதயங்க வீரதுங்க தெரிவித்துள்ளார்.

இரகசியப் பொலிஸாரிடம் வாக்குமூலம் வழங்கிய பின்னர் அங்கிருந்து வெளியேறும் போதே அவர் ஊடகங்களிடம் இதனைக் கூறினார்.

2015 ஆம் ஆண்டுக்கு முன்னர் அரசாங்க காலத்தில் மிக் விமானங்கள் கொள்வனவு செய்யப்பட்ட சம்பவம் தொடர்பில் நீதிமன்றத்தில் வழக்கு தொடரப்பட்ட போது, ​​இரகசிய பொலிஸாருக்கு வழங்கப்பட்ட உத்தரவின் அடிப்படையில் இவரிடம் இருந்து இந்த வாக்குமூலம் பெறப்பட்டுள்ளது

தெற்கு தாய்லாந்தில் இன்று (17) 17 இடங்களில் குண்டு வெடிப்புகள் மற்றும் தீ விபத்துகள் பதிவாகியுள்ளன.

இந்த சம்பவங்கள் ஒன்றுடன் ஒன்று தொடர்புடையவை என அந்நாட்டு அதிகாரிகள் தெரிவிக்கின்றனர்.

இன்று காலை குண்டுவெடிப்பு மற்றும் தீ வைப்பு நடத்தப்பட்டதுடன் பல்பொருள் அங்காடிகள் மற்றும் எரிபொருள் நிரப்பு நிலையங்களை குறிவைத்து தாக்குதல்கள் நடத்தப்பட்டுள்ளன.

இந்த தாக்குதல்களினால் 7 பேர் காயமடைந்துள்ளதாக தெரிவிக்கப்படுகிறது.

பாராளுமன்ற உறுப்பினர் பாட்டலி சம்பிக்க ரணவக்க தற்போதைய அரசாங்கத்தின் கீழ் அமைச்சுப் பதவியை ஏற்க உள்ளதாக கூறப்படும் வதந்திகளை மறுத்துள்ளார்.

கடந்த சில நாட்களாக சில தனிநபர்களும் குழுக்களும் தமது சந்தேகத்திற்குரிய அரசியல் நிகழ்ச்சி நிரலை முன்னிறுத்த முயல்வதுடன், அவர் அமைச்சர் பதவியை ஏற்று அரசாங்கத்தில் இணைவதாக வதந்திகளை உருவாக்கி வதந்திகளை பரப்புவதில் மும்முரமாக இருப்பதாகவும் , இதனை முற்றிலும் மறுப்பதாக பாராளுமன்ற உறுப்பினர் பாட்டலி சம்பிக்க ரணவக்க டுவிட்டர் செய்தியில் தெரிவித்துள்ளார்.

5 கிலோ கிராம் கொக்கெய்ன் போதைப்பொருளை கடத்த முயன்ற பிரஜை ஒருவர் இலங்கை சுங்க அதிகாரிகளால் கைது செய்யப்பட்டுள்ளார்.

சந்தேக நபர் தோஹாவில் இருந்து கட்டுநாயக்க விமான நிலையத்தில் தரையிறங்கியுள்ளார்.

சந்தேக நபர் மேலதிக விசாரணைகளுக்காக பொலிஸாரிடம் ஒப்படைக்கப்பட்டுள்ளார்.

இலங்கை சுங்கத்தின் போதைப்பொருள் கட்டுப்பாட்டு பிரிவின் அதிகாரிகளால் 5 கிலோகிராம் கொக்கெய்ன் போதைப்பொருளை மறைத்து வைத்திருந்த போலிஷ் பிரஜை ஒருவர் கைது செய்யப்பட்டுள்ளார். கொக்கெய்னின் மொத்த பெறுமதி 245 மில்லியன் என மதிப்பிடப்பட்டுள்ளது” என இலங்கை சுங்கம் தனது அறிக்கையில் தெரிவித்துள்ளது

இலங்கையிலுள்ள சிறுவர் அபிவிருத்தி நிலையங்களுக்கான தேசிய வழிகாட்டுதல்கள் மற்றும் குறைந்தபட்ச நியமங்களை நடைமுறைப்படுத்துவதற்காக ஜனாதிபதி ரணில் விக்கிரமசிங்கவினால் சமர்ப்பிக்கப்பட்ட அமைச்சரவை பத்திரத்திற்கு அமைச்சரவை அங்கீகாரம் வழங்கப்பட்டுள்ளது.

எதிர்கால குழந்தைகளுக்கு தரமான சேவைகளை வழங்குவதற்காக சிறுவர் அபிவிருத்தி நிலையங்களுக்கு மாகாண மட்டத்தில் தயாரிக்கப்பட்ட வழிகாட்டுதல்கள் மற்றும் கொள்கைகள் ஏற்கனவே நடைமுறைப்படுத்தப்பட்டு வருவதாக ஜனாதிபதியின் ஊடகப் பிரிவு (PMD) தெரிவித்துள்ளது. இருப்பினும், தேசிய அளவில் அங்கீகரிக்கப்பட்ட வழிகாட்டுதலின் பற்றாக்குறை இருந்தது.

குழந்தைகள் மேம்பாட்டு மையங்களுக்கான தேசிய வழிகாட்டுதல்கள் மற்றும் குறைந்தபட்ச தரநிலைகளின் ஆரம்ப வரைவு 2013 இல் தொடங்கப்பட்டது.

தேசிய சிறுவர் பாதுகாப்பு அதிகார சபையினால் முன்வைக்கப்பட்டுள்ள இந்த தேசிய வழிகாட்டுதல் அனைத்து சிறுவர் அபிவிருத்தி நிலையங்களையும் உள்ளடக்கிய வகையில் நாடு முழுவதும் நடைமுறைப்படுத்த திட்டமிடப்பட்டுள்ளது.

நாட்டின் நிலைமை வழமைக்குத் திரும்பியுள்ளதால், இந்த வார இறுதிக்குள் காலாவதியாகவிருக்கும் அவசரகாலச் சட்டத்தை நான் நீடிக்கமாட்டேன்” என ஜனாதிபதி ரணில் விக்கிரமசிங்க  தெரிவித்தார்.