kumar
இரண்டு வார காலத்திற்கு பாராளுமன்றத்தில் ஒதுக்கப்பட்ட நேரத்தை விட 200 நிமிடங்களுக்கும் மேலாக எதிர்க்கட்சித் தலைவர் பயன்படுத்தியதாகக் கூறிய அரசாங்கத்தின் பிரதம கொறடா பிரசன்ன ரணதுங்க, நேரத்தை நிர்வகிக்க நடவடிக்கை எடுக்குமாறு சபாநாயகரிடம் வலியுறுத்தினார்.
பாராளுமன்றத்தில் ஆளும் மற்றும் எதிர்க்கட்சி பாராளுமன்ற உறுப்பினர்கள் அன்றைய அலுவல்களுக்கு ஒதுக்கப்பட்ட நேரத்திற்கு மேலதிகமாக 552 நிமிடங்களை பயன்படுத்தியதாகவும், எதிர்க்கட்சி தலைவர் சஜித் பிரேமதாச நவம்பர் 14 மற்றும் 28 க்கு இடையில் 204 நிமிடங்களை பயன்படுத்தியதாகவும் அவர் பாராளுமன்றத்தில் தெரிவித்தார்.
காலை பாராளுமன்ற உறுப்பினர்களால் அன்றைய அலுவல்களுக்கு புறம்பான விடயங்களுக்காக 50 நிமிடங்கள் வீணடிக்கப்பட்டுள்ளதாக அமைச்சர் ரணதுங்க தெரிவித்துள்ளார்.
நேரத்தை நிர்வகிப்பதற்கான தீர்வைக் காணுமாறு சபாநாயகரை வலியுறுத்திய அவர், ஆளும் மற்றும் எதிர்க்கட்சி ஆகிய இரு தரப்பிலிருந்தும் ஒதுக்கப்பட்ட நேரத்தை இரு தரப்பினரும் வீணடிக்கும் விகிதத்தில் குறைக்க முன்மொழிந்தார்.
நீதிமன்றத்தை அவமதித்த குற்றச்சாட்டின் பேரில் சட்ட நடவடிக்கை எடுக்குமாறு முன்னாள் விளையாட்டுத்துறை அமைச்சர் ரொஷான் ரணசிங்கவுக்கு எதிராக மேன்முறையீட்டு நீதிமன்றில் மனு ஒன்று தாக்கல் செய்யப்பட்டுள்ளது.
வழக்கறிஞர் ஒருவரால் இந்த மனு தாக்கல் செய்யப்பட்டுள்ளது.
புதிய பதில் பொலிஸ் மா அதிபராக சிரேஷ்ட பிரதி பொலிஸ் மா அதிபர் தேஷ்பந்து தென்னகோன் ஜனாதிபதி ரணில் விக்கிரமசிங்கவினால் நியமிக்கப்பட்டுள்ளார்.
மூன்று வருடங்கள் பொலிஸ் மா அதிபராக கடமையாற்றிய சி.டி.விக்ரமரத்ன அண்மையில் ஓய்வுபெற்றதையடுத்து அவருக்கு பதிலாக பதில் பொலிஸ் மா அதிபராக சிரேஷ்ட பிரதி பொலிஸ் மா அதிபர் தேஷ்பந்து தென்னகோன் நியமிக்கப்பட்டுள்ளார்.
பொது நிர்வாக மற்றும் உள்நாட்டலுவல்கள் அமைச்சின் வரவு செலவுத் திட்ட விவாதத்தில் கலந்து கொண்டு ஐக்கிய மக்கள் சக்தி பாராளுமன்ற உறுப்பினர் ஜே.சி.அலவத்துவல முதலில் கருத்து தெரிவித்துள்ளார்.
அதன் பின்னர் பிரதமர் தினேஷ் குணவர்தன கருத்து வெளியிட்டார்.
“பிரதமரே அவ்வாறு கூறி பயனில்லை. தேர்தலை நடத்துங்கள்" என அலவத்துவல கூறியதும் பிரதமர் சற்று கோபமடைந்தார்.
“நீங்க அப்படி என்னிடம் சொல்றது சரியில்ல, ஜனாதிபதியிடம் போய்ச் சொல்லுங்க, நீங்க எப்பவுமே ஜனாதிபதி அலுவலகத்தில்தானே இருக்கீங்க” என்று கிண்டலாக பிரதமர் கூறினார்.
சர்ச்சைக்குரிய ஞாயிறு பிரசங்கம் தொடர்பில் தம்மை கைது செய்ய வேண்டாம் என கடந்த வாரம் நீதிமன்ற உத்தரவு பிறப்பிக்கப்பட்டதைத் தொடர்ந்து ஆயர் ஜெரோம் பெர்னாண்டோ இன்று காலை பண்டாரநாயக்க சர்வதேச விமான நிலையத்தை (BIA) வந்தடைந்தார்.
பௌத்தம், இஸ்லாம் மற்றும் இந்து மதத்திற்கு எதிரான சர்ச்சைக்குரிய கருத்துக்களுக்காக CID விசாரணைகளின் கீழ் இருந்த பெர்னாண்டோ, இந்த ஆண்டு மே 15 அன்று நாட்டை விட்டு வெளியேறினார்.
பாதிரியார் ஜெரோம் தாக்கல் செய்த ரிட் மனுவை ஏற்று, கடந்த வாரம் மேல்முறையீட்டு நீதிமன்றம் அவரை விமான நிலையத்திலோ அல்லது வேறு எங்கும் கைது செய்யக் கூடாது என்று காவல்துறைக்கு உத்தரவு பிறப்பித்தது.
மேலும், நாட்டிற்கு வந்த 48 மணி நேரத்திற்குள் குற்றப் புலனாய்வுப் பிரிவினரிடம் வாக்குமூலம் வழங்குமாறு போதகருக்கு நீதிமன்றம் அறிவுறுத்தியுள்ளது.
இன்று அதிகாலை டோஹாவில் இருந்து கட்டார் ஏர்வேஸ் விமானம் மூலம் கட்டுநாயக்க விமான நிலையத்தை வந்தடைந்த அவர், "கோல்ட் ரூட்" ஊடாக விமான நிலையத்திலிருந்து புறப்பட்டார். போதகருடன் மேலும் இரண்டு பயணிகளும் வந்ததாக கூறப்படுகிறது.
அடுத்த பொலிஸ் மா அதிபரை (IGP) நியமிப்பது தொடர்பில் ஜனாதிபதி ரணில் விக்கிரமசிங்கவுடன் பொது பாதுகாப்பு அமைச்சர் டிரான் அலஸ் கலந்துரையாடல் ஒன்றை நடத்தியுள்ளதாக தகவல் வெளியாகியுள்ளது.
அரசியலமைப்புச் சட்டத்தின்படி பொலிஸ் மா அதிபரை நியமிக்கும் அதிகாரம் ஜனாதிபதி வசம் உள்ளது. இந்த பதவியில் நீண்ட காலம் பணியாற்றிய சி.டி. விக்கிரமரத்ன அண்மையில் ஓய்வுபெற்றார்.
முன்மொழியப்பட்ட பெயர் தொடர்பில் ஜனாதிபதிக்கும் அமைச்சருக்கும் இடையில் ஏற்பட்ட கருத்து வேறுபாடு காரணமாகவே பொலிஸ் மா அதிபர் நியமனம் தாமதமானதாக முன்னர் செய்திகள் வெளியாகியிருந்தன.
ஜனாதிபதி இந்த நியமனத்தை வழங்கியவுடன், சபாநாயகர் மஹிந்த யாப்பா அபேவர்தன தலைமையிலான அரசியலமைப்பு சபையின் அங்கீகாரம் பெறப்பட வேண்டும்.
பிரதமர் தினேஷ் குணவர்தன மற்றும் எதிர்க்கட்சித் தலைவர் சஜித் பிரேமதாச ஆகியோரும் இதன் உறுப்பினர்களாக உள்ளனர். இது சிவில் சமூகத்தைச் சேர்ந்த மூன்று பேர் உட்பட பத்து உறுப்பினர்களைக் கொண்ட சபையாகும்.
உத்தேச நியமனத்திற்கு ஜனாதிபதியும் அமைச்சரும் இணக்கம் தெரிவித்துள்ளதாக தகவலறிந்த வட்டாரம் ஒன்று தெரிவித்துள்ளது. அந்தப் பதவிக்கு சிரேஷ்ட பிரதிப் பொலிஸ் மா அதிபர் தேசபந்து தென்னகோன் தெரிவு செய்யப்படலாம் என அரசியல் வட்டாரங்களில் ஊகிக்கப்படுகிறது.
இளைஞர் சமூகம் மீண்டும் எச்.ஐ.வி தொற்றுக்கு ஆளாவது அதிகரிப்பதைக் காணக் கூடும் என பால்வினை நோய்கள் தொடர்பான நிபுணரான டொக்டர் திலானி ரத்நாயக்க குறிப்பிட்டுள்ளார்.
அதன்படி, 2022ல் எச்.ஐ.வி பாதிக்கப்பட்ட 607 பேரில் 73 பேர் இளைஞர் சமூகத்தைச் சேர்ந்தவர்கள் என்று அவர் கூறினார். இந்த குழு 15 முதல் 24 வயதுக்குட்பட்டது என்றும் அவர் கூறினார்.
டிசம்பர் 1ஆம் திகதி உலக எயிட்ஸ் தினத்தை முன்னிட்டு கொழும்பு சுகாதார மேம்பாட்டுப் பணியகத்தில் நடைபெற்ற ஊடகவியலாளர் சந்திப்பில் அவர் இதனைத் தெரிவித்தார்.
அவர் தொடர்ந்து கூறுகையில்
“2018 முதல், 15 முதல் 24 வயது வரையிலான இளைஞர் சமூகத்தில் எச்.ஐ.வி. பாதிக்கப்பட்டவர்களின் எண்ணிக்கையில் குறிப்பிடத்தக்க அதிகரிப்பு காணப்படுகிறது. 2022 இல் புதிய எச்.ஐ.வி பாதிக்கப்பட்டவர்களில் 73 பேர் இளைஞர்கள். அதாவது 12 சதவீதம். அவர்களில் 66 பேர் ஆண்கள். எனவே, இளைஞர்களிடையே எச்.ஐ.வி. தடுப்பு மிகவும் முக்கியமானது. நம்பகமான துணையுடன் உடலுறவு கொள்ளுங்கள். பிற தொடர்புகள் இருந்தால் பாதுகாப்பு நடவடிக்கையாக ஆணுறையைப் பயன்படுத்துவது முக்கியம். எங்கள் நாடு முழுவதும் ஏற்கனவே 41 கிளினிக்குகள் இலவசமாக ஆணுறை வழங்குகின்றன என்றார்.
ஐக்கிய மக்கள் சக்தி (SJB) பாராளுமன்ற உறுப்பினர் வடிவேல் சுரேஷ் வரவு செலவுத் திட்டத்தின் இரண்டாம் வாசிப்பின் போது அரசாங்கத்திற்கு ஆதரவாக வாக்களித்த காரணத்தால் அவர் வகித்து வந்த பசறை தொகுதி அமைப்பாளர் பதவியில் இருந்து நீக்கப்பட்டுள்ளார்.
இதன்படி வெற்றிடமான பசறை ஆசனத்தில் ஐக்கிய மக்கள் சக்தி ஆசன அமைப்பாளர் பதவி லெட்சுமணன் சஞ்சய்க்கு வழங்கப்பட்டுள்ளது.
கட்சித் தலைவர் சஜித் பிரேமதாசவிடம் இருந்து உரிய நியமனக் கடிதத்தை சஞ்சய் பெற்றுக்கொண்டதுடன், அதனைத் தொடர்ந்து ஊடகங்களுக்கு கருத்துத் தெரிவித்த அவர், குறித்த பதவிக்கு தாம் நியமிக்கப்பட்டதில் மகிழ்ச்சியடைவதாகவும், பசறை இளைஞர்களுக்கு சேவையாற்றுவேன் என நம்புவதாகவும் தெரிவித்தார்.
ஸ்ரீ ஜயவர்தனபுர பல்கலைக்கழகத்தின் ஒவ்வாமை மற்றும் உயிரியல் துறையின் பணிப்பாளர் பேராசிரியர் சந்தன ஜீவந்த கருத்துப்படி, நாடு முழுவதும் பதிவாகும் சளி மற்றும் காய்ச்சல் உள்ளிட்ட சுவாச அமைப்பு தொடர்பான நோய்கள் பல வைரஸ்களின் கலவையாக இருக்கலாம் என கருதப்படுகிறது.
எவ்வாறாயினும், சீனாவில் பரவிவரும் நிமோனியா நிலைமை இந்நாட்டிலும் பரவினால், அதனைக் கண்டறிவதற்கான ஆய்வகங்கள் நாட்டில் உள்ளதாகவும், வைரஸ் தொடர்பில் இதுவரை குறிப்பிட்ட தகவல்கள் எதுவும் இல்லை எனவும் சந்தன ஜீவந்த கூறுகிறார்.
சீனாவில் கடந்த 21ஆம் திகதி கண்டறியப்படாத நிமோனியா நோய்த் தொற்று பதிவாகியுள்ளதாகவும், சிறுவர்கள் உட்பட பல குழந்தைகள் வைத்தியசாலையில் சிகிச்சை பெற்று வருவதாகவும் சுகாதாரத் திணைக்களம் தெரிவித்துள்ளது.
இந்த நோய் பெரும்பாலும் குழந்தைகளிடையே பரவுவதாக வெளிநாட்டு ஊடகங்கள் தெரிவிக்கின்றன.
பரவி வரும் புதிய நோய் குறித்து சரியான தகவல்களை சமர்ப்பிக்குமாறு சீன அரசாங்கத்திற்கு உலக சுகாதார நிறுவனம் அறிவித்துள்ளதாக வெளிநாட்டு செய்திகள் தெரிவிக்கின்றன.
எதிர்க்கட்சித் தலைவர் சஜித் பிரேமதாச மற்றும் முன்னாள் அமைச்சர் ரொஷான் ரணசிங்க ஆகியோர் எதிர்வரும் தேர்தலுக்கான உடன்படிக்கையில் கைச்சாத்திடவுள்ளதாக நம்பத்தகுந்த வட்டாரங்கள் தெரிவித்துள்ளன.
அமைச்சர் பதவியிலிருந்து நீக்கப்படுவதற்கு சில தினங்களுக்கு முன்னர் எதிர்க்கட்சித் தலைவரை சந்தித்து அந்த அரசியல் நடவடிக்கையை அவர் ஏற்பாடு செய்திருந்ததாக அந்த செய்தியில் தெரிவிக்கப்பட்டுள்ளது.
இந்த நடவடிக்கையில் ஜனாதிபதி விக்கிரமசிங்கவின் வேலைத்திட்டத்தை சீர்குலைக்கும் நடவடிக்கையும் உள்ளடக்கப்பட்டுள்ளது.
ஐக்கிய மக்கள் சக்தியின் பிரதமர் வேட்பாளராக ரொஷான் ரணசிங்கவை நியமிப்பது தொடர்பில் விசேட கலந்துரையாடல் ஒன்று இடம்பெற்றுள்ளதாகவும் அறியமுடிகிறது.