பொலிஸ் சார்ஜன்ட் ஒருவரின் வீட்டிற்குள் புகுந்து அரிசி, பருப்பு, சீனி, பிஸ்கட் உள்ளிட்ட உணவுப் பொருட்களைத் திருடிச் சென்றுள்ளதாக பொலிஸார் தெரிவிக்கின்றனர்.

குறித்த சார்ஜன்ட் தற்போது அம்பாறை பிரதேசத்தில் கடமையாற்றி வருவதாகவும், அவரது மனைவி மற்றும் பிள்ளைகள் வீட்டில் இருந்து வெளியில் சென்றிருந்த போது ஜன்னலை உடைத்து திருடியுள்ளதாகவும் கோனாபினுவல பொலிஸார் தெரிவித்தனர்.

திருட்டுச் சம்பவத்தின் பின்னர் அறையும் தீக்கிரையாக்கப்பட்டுள்ளதாகவும், தீயினால் அறையில் இருந்த பொருட்கள் சேதமடைந்துள்ளதாகவும் பொலிஸார் தெரிவித்தனர்.

எரிபொருளுக்காக எரிபொருள் நிரப்பு நிலையத்தில் வரிசையில் காத்திருந்த மற்றொரு நபர் உயிரிழந்துள்ளார்.

பாணந்துறை, வெகட பிரதேசத்தில் எரிபொருள் நிரப்பு நிலையத்தில் வரிசையில் காத்திருந்த 55 வயதுடைய முச்சக்கர வண்டி சாரதி ஒருவர் உயிரிழந்துள்ளார்.

சம்பவம் தொடர்பில் விசாரணைகள் இடம்பெற்று வருவதாக பொலிஸார் தெரிவிக்கின்றனர்.

ஸ்ரீலங்கா பொதுஜன பெரமுனவின் தேசிய பட்டியல் நாடாளுமன்ற உறுப்பினராக நியமிக்கப்பட்டுள்ள தம்மிக்க பெரேராவுக்கு எதிராக உச்ச நீதிமன்றில் அடிப்படை உரிமை மீறல் மனு தாக்கல் செய்யப்பட்டுள்ளது.

ஸ்ரீலங்கா பொதுஜன பெரமுனவின் தேசிய பட்டியலிலிருந்து தம்மிக்க பெரேராவை பாராளுமன்றத்திற்கு நியமிக்க எடுத்த தீர்மானம் அரசியலமைப்பை மீறும் செயலாகும் என அதில் தெரிவிக்கப்பட்டுள்ளது.

தேர்தலில் மாவட்டத்திற்கு சமர்ப்பிக்கப்படும் வேட்புமனுக்களில் அல்லது தேசியப்பட்டியலில் குறிப்பிடப்பட்டிருந்தால் மாத்திரமே ஒருவர் தேசியப்பட்டியல் நாடாளுமன்ற உறுப்பினராக நியமிக்கப்பட முடியும்.

ஆனால், கடந்த தேர்தலுக்கான வேட்பு மனுக்கள் எதிலும் தம்மிக்க பெரேராவின் பெயர் இல்லாததால், அவரால் நாடாளுமன்றத்திற்கு பிரவேசிக்க முடியாது என மனுதாரர் தெரிவித்துள்ளார்.

மாற்றுக் கொள்கைகளுக்கான நிலையமும் அதன் நிறைவேற்றுப் பணிப்பாளருமான பாக்கியசோதி சரவணமுத்துவினால் இந்த முறைப்பாடு செய்யப்பட்டுள்ளது.

பாராளுமன்றத்தை பலப்படுத்தும் மற்றும் நிறைவேற்று அதிகாரம் கொண்ட ஜனாதிபதி முறைமையை இல்லாதொழிக்கும் திருத்தங்களை பொதுஜன பெரமுன 21வது ஆதரவளிக்கும் என முன்னாள் பிரதமர் மஹிந்த ராஜபக்ஷ தெரிவித்துள்ளார்.

கட்சி உறுப்பினர்களுடனான கலந்துரையாடலின் போதே மஹிந்த ராஜபக்ஷ இந்த கருத்தை வெளியிட்டதாக கட்சியின் பொதுச் செயலாளர் சாகர காரியவசம் தெரிவித்துள்ளார்.

சட்டத்திருத்தம் கொண்டு வரப்படுவதற்கு முன்னர் நாட்டு மக்களின் பிரச்சினைகளுக்கு தீர்வு காணப்பட வேண்டும் எனவும், அதிகாரம் இல்லாத பிரதமரை நியமிப்பதை எதிர்ப்பதாகவும் பாராளுமன்றத்தை பலப்படுத்தும் திருத்தத்தை ஆதரிப்பதில் தனக்கு பிரச்சினையில்லை எனவும் மஹிந்த ராஜபக்ஷ தெரிவித்துள்ளார்.  

இன்று முதல் அத்தியாவசிய சேவைகளுக்கு மட்டுமே எரிபொருள் விடுவிக்கப்படும் என பெற்றோலிய விநியோகஸ்தர்கள் சங்கம் தெரிவித்துள்ளது.

மக்கள் வரிசையில் காத்திருந்து தேவையற்ற நெரிசலை ஏற்படுத்த வேண்டாம் என தொழிற்சங்கம் கேட்டுக் கொள்கிறது.

இன்று முதல் ஒவ்வொரு மாவட்டத்திலும் தெரிவு செய்யப்பட்ட எரிபொருள் நிரப்பு நிலையங்களுக்கு மாத்திரம் டீசல் விநியோகிக்கப்படும் என சங்கத்தின் செயலாளர் கபில நாதுன்ன தெரிவித்துள்ளார்.

நாளை நாட்டிற்கு வரவுள்ள டீசல் கப்பலை இறக்கிய பின்னரே வரிசையில் காத்திருக்கும் மக்களுக்கு டீசலை பெற்றுக்கொள்ள முடியும் எனவும் அவர் தெரிவித்துள்ளார்.

அனைத்து எரிபொருள் நிரப்பு நிலையங்களுக்கும் பெற்றோல் விநியோகம் கடுமையாக கட்டுப்படுத்தப்பட்டுள்ளதாகவும், பெட்ரோல் விநியோகத்தில் அத்தியாவசிய சேவைகளுக்கு முன்னுரிமை வழங்கப்பட்டுள்ளதாகவும் அவர் மேலும் தெரிவித்தார்.

அம்பலாந்தோட்டை பிரதேசத்தில் கடலுக்கு சென்ற ஒரே குடும்பத்தைச் சேர்ந்த தாய், மகன் மற்றும் மருமகன் ஆகியோர் நீரில் மூழ்கி காணாமல் போயுள்ளதாக தெரிவிக்கப்படுகின்றது.

அம்பலாந்தோட்டை, வெலிபதன்வில பகுதியில் உள்ள விகாரை ஒன்றுக்கு சென்ற குழுவினர் அங்கிருந்து கடலுக்கு சென்றுள்ளனர். 

காணாமல் போன தாய்க்கு 55 வயது எனவும் அவரது மகனுக்கு 16 வயது எனவும் மருமகனுக்கு 22 வயது எனவும் தெரிவிக்கப்படுகின்றது.